သျှမ်းပြည်မြောက်ပိုင်း ကွတ်ခိုင်မြို့တွင် ဖုန်းဆိုင် မီးလောင်မှု ဖြစ်ပွားကာ လူ ၂ ဦး သေဆုံးခဲ့ကြောင်း သတင်း ရရှိသည်။

မေလ ၇ ရက်နေ့မနက်ပိုင်းက သျှမ်းပြည် မြောက်ပိုင်း လားရှိုး – မူဆယ် ပြည်ထောင်စု လမ်းမပေါ် ရပ်ကွက် ၅ ဘုန်းကြီးကျောင်းလမ်းဒေါင့် စျေးအနီးရှိ စေတနာ ဖုန်းဆိုင် မှ မီးစတင်လောင်ကျွမ်းရာ အသက် ၃၀ ဝန်းကျင် အမျိုးသား နှင့် အမျိုးသမီး သေဆုံးခဲ့ပြီး လူတဦး ထိခိုက်ဒဏ်ရာရကြောင်း ကွတ်ခိုင် ဒေသခံများပြောပြချက် အရသိရသည်။

“ မီးက စေတနာ ဖုန်းဆိုင်က စလောင်တာ။ ဖုန်းအားသွင်းကြိုး ကနေ လျှပ်စစ်ရှော့ ဖြစ်တယ်လို့လည်းပြောတယ်။ အိမ်ကတော့ ၁ လုံး ပဲ။ နောက်ဖုန်းဆိုင်၊ လျှပ်စစ် ပစ္စည်း ဆိုင် နဲ့ ကုန်စုံဆိုင်၊ ကား ၂ စီး ပါသွားတယ်။ ငွေကတော့ ရ၅ သိန်းပါသွားတယ် ” ဟု ကွတ်ခိုင်လူမှုကူညီရေး အသင်းမှ မိုင်းအိုက် ကသျှမ်းသံတော်ဆင့်ကို ပြောသည်။

မီးလောင်မှုကို ကွတ်ခိုင်မြို့ မှ မီးသတ်ကား ၃ စီး၊ သိန္နီမြို့ မှ မီးသတ်ကားနှင့် လားရှိုးမြို့မှ မီးသတ်ကားပါ လာရောက်ကူညီ ငြိမ်းသတ်ကာ မနက် ၆ နာရီ တွင် မီးညွှန့်ကျိုးခဲ့ကြောင်းလည်း မိုင်းအိုက်က ဆိုသည်။

“ စိုင်းစံက မီးထဲရောက်နေတဲ့သူ့ အဒေါ်ကို ဝင်ဆွဲချိန် မီးမွှန်သွားတာ။ နောက် အမျိုးသမီးတယောက်ကလည်း မီးထဲပိတ်မိတာ” ဟု ကွတ်ခိုင်ဒေသခံ တဦး ကပြောသည်။

မီးလောင်မှုကြောင့် သေဆုံးသွားသည့် ၂ ဦး အနက် အသက် ၃၀ ဝန်းကျင် ရှိ စိုင်းစံသည် ကွတ်ခိုင်မြို့ သျှမ်းစာပေနှင့်ယဉ်ကျေးမှုအသင်း၏ အတွင်းအရေးမှူးဖြစ်ပြီး ပရဟိတ လုပ်ငန်း ၊ စာပေယဉ်ကျေးမှုလုပ်ငန်း၊ လူမှုရေးလုပ်ငန်းများကို တက်ကြွစွာ ပါဝင်ဆောင်ရွက်နေသူတဦးဖြစ်ကြောင်း၊ မီးလောင်သည့်ထဲတွင် အဒေါ်ဖြစ်သူကို သွားရောက်ကယ်တင်ရာမှ မီးခိုးမွှန်ပြီး သေဆုံးသွားကြောင်း၊ ထိုနည်းတူ အမျိုးသမီး တဦးမှာလည်း မီးလောင်မှုထဲတွင် ပိတ်မိကာ သေဆုံးသွားကြောင်း သိရသည်။

“ကွတ်ခိုင်မှာလူငယ်တွေရဲ့ခေါင်းဆောင်တဦးလည်းဖြစ်တာကြောင့် စိုင်းစံကိုဆုံးရှုံးရတာ လူငယ်တွေအတွက်အများကြီးကို နစ်နာပါတယ်။ နမျောမိလို့မဆုံးပါဘူး။” – ဟု သီပေါမှ သျှမ်းလူငယ်အဖွဲ့ဝင်တဦးကလည်းပြောသည်။

လက်ရှိမှာတော့ မီးလောင် ဒဏ်ရာ ဖြင့် သေဆုံးသူ ၂ ဦးကို အပြင်သို့ ခေါ်ထုတ်နိုင်ခဲ့ပြီ ဖြစ်ကြောင်း ကွတ်ခိုင် လူမှု ကယ်ဆယ်ရေး အသင်း အဖွဲ့ ကပြောသည်။