သျှမ်းပြည်နယ် မြောက်ပိုင်း ပြည်သူလူထုမှ ကန့်ကွက်သည့်ကြားမှ အထက်ရဲရွာ ရေအားလျှပ်စစ် စီမံကိန်း လုပ်ငန်း ၃၉ ရာခိုင်နှုန်း ပြီးစီးကြောင်း လျှပ်စစ်စွမ်းအင်ဝန်ကြီးမှကွင်းဆင်းစစ်ဆေးပြီးသည့်နောက်ပြောဆိုလိုက်သည်။
သျှမ်းပြည်နယ် မြောက်ပိုင်း ကျောက်မဲမြို့နယ်အတွင်းရှိ ဒုဌဝတီ မြစ်(မြစ်ငယ်မြစ်) ပေါ်တွင် တည်ဆောက်သည့် အထက်ရဲရွာရေအား လျှပ်စစ် စီမံကိန်း သည် လက်ရှိမှာ (၃၈ ဒသမ ၇၃)ရာခိုင်နှုန်း တည်ဆောက်ပြီးစီးပြီး ၂၀၂၁- ၂၀၂၂ ခုနစ်တွင် စီမံကိန်း ပြီးစီးမည် ဟု လျှပ်စစ် နှင့် စွမ်းအင်ဝန်ကြီးဌာန ၏ ထုတ်ပြန်ချက်အရ သိရသည်။
လျှပ်စစ် နှင့် စွမ်းအင်ဝန်ကြီးဌာန ပြည်ထောင်စု ဝန်ကြီး ဦးဝင်းခိုင် နှင့် တာဝန်ရှိသူများသည် မေ ၄ ရက်နေ့တွင် အထက်ရဲရွာ ရေအားလျှပ်စစ် အကောင်အထည် ဖော်ရေး ဦးစီးဌာန ၊ အမှတ်(၃) တည်ဆောက်ရေး မှ အကောင် အထည်ဖော်ဆောက်ရွက်ရှိသည့် အထက်ရဲရွာ ရေအားလျှပ်စစ် စီမံကိန်း အခြေအနေ ကို သွားရောက် စစ်ဆေး ခဲ့သည်။
တည်ဆောက်မည့်ပင်မတမံအမျိုးအစားမှာ RCC ကွန်ကရစ်တမံဖြစ်၍ ကန်ရေပြည့် ရေသိုလှောင် ပမာဏမှာ ၂.၇၇ သိန်း ဧကပေ သိုလှောင်နိုင်မည် ဟုလည်း သိရသည်။
အထက်ရဲရွာရေအားလျှပ်စစ်စီမံကိန်းသည် ဒုဋ္ဌဝတီမြစ် (မြစ်ငယ်မြစ်) ပေါ်တွင် ရေလှောင်တမံတည်ဆောက်ပြီး (၂၈၀) မဂ္ဂါဝပ်ရှိ ဓာတ်အားပေးစက်ရုံတည်ဆောက်ပြီး နှစ်စဉ်ပျမ်းမျှ လျှပ်စစ်ဓာတ်အား ကီလိုဝပ်နာရီသန်းပေါင်း ၁၄၀၉ သန်းထုတ်လုပ်ပြီး နိုင်ငံတော်ဓာတ်အားကွန်ရက်စနစ်မှတစ်ဆင့် မြန်မာတစ်နိုင်ငံလုံးသို့ လျှပ်စစ်ဓာတ်အား များ ပို့လွှတ်ဖြန့်ဖြူးပေးနိုင်ရေးရည်ရွယ် ကြောင်း သိရသည်။
ထို့ပြင် ဒုဋ္ဌဝတီမြစ် (မြစ်ငယ်မြစ်) ပေါ်တွင် ဆောင်ရွက်ပြီး ရဲရွာရေအားလျှပ်စစ်စီမံကိန်းမှ (၇၉၀) မဂ္ဂါဝပ် ထုတ်လုပ်ရှိရာ ဆက်လက်၍ အနာဂါတ် စီမံချက်များအနေဖြင့် နမ္မတူ (သီပေါ) စီမံကိန်း (၂၁၀) မဂ္ဂါဝပ် အားလည်းကောင်း၊ အလယ်ရဲရွာ စီမံကိန်း (၇၃၅) မဂ္ဂါဝပ်အားလည်းကောင်း၊ ဒီးဒုတ်စီမံကိန်း (၆၀) မဂ္ဂါဝပ်အားလည်းကောင်း ထုတ်လုပ်နိုင်ရန် စီမံဆောင်ရွက်လျက်ရှိပါသည်။
