သျှမ်းပြည် ကျောက်မဲမြို့နယ် တောင်ထိပ်ကျေးရွာအုပ်စုရှိ ကျားဖြန့်လုပ်ငန်း နေရာများကို စစ်ကော်မရှင်တပ်မှ ဝင်ရောက်စီးနင်းခဲ့ရာ တရုတ်နိုင်ငံသား ၂၈ ဦးနှင့်အတူ ဆက်စပ်ပစ္စည်းများ ဖမ်းဆီးရမိခဲ့ကြောင်း သတင်းသိရသည်။

နိုဝင်ဘာလ ၃၀ ရက်နှင့် ဒီဇင်ဘာလ ၁ ရက်နေ့တို့တွင် ကျောက်မဲမြို့နယ် တောင်ထိပ်ကျေးရွာအုပ်စုရှိ ဒုဋ္ဌဝတီမြစ်အနီး တောတွင်းတစ်နေရာ၌ ဆောက်လုပ်ထားသည့် အွန်လိုင်းကျားဖြန့် လုပ်ငန်းနေရာများကို စစ်ကော်မရှင်တပ်မှ ဝင်ရောက်စီးနင်းခဲ့ရာ တရုတ်နိုင်ငံသား ၂၈ ဦးနှင့်အတူ ဆက်စပ်ပစ္စည်းများ၊ လူနေအဆောက်အအုံများ ဖမ်းဆီးရမိခဲ့ကြောင်း ယမန်နေ့ ရက်စွဲဖြင့် သတင်းထုတ်ပြန်လာသည်။

“စစ်တပ်က အစပိုင်းမှာ ဒရုန်းလွှတ်ပြီး ကျားဖြန့်နေရာကို ထောက်လှမ်းရေးလုပ်တာ၊ အဲ့တာကို သတိထားမိတဲ့ ကျားဖြန့်တချို့က တာလုံဘက်ကို ကားနဲ့ ထွက်ပြေးတယ် ပြောတယ်။ အခု ဖမ်းမိတာက တောင်ထိပ်အုပ်စုထဲက အုန်းနွေးဘက် တောထဲမှာ တဲဆောက်ပြီး ကျားဖြန့်လုပ်တဲ့နေရာ”ဟု ကျောက်မဲမြို့နယ်မှ ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။

ကျောက်မဲမြို့နယ် တောင်ထိပ်ကျေးရွာ တောင်ဘက်ရှိ ဒုဋ္ဌဝတီမြစ်အနီး မသင်္ကာဖွယ်ရာ အဆောက်အအုံများကို ဝင်ရောက်ရှာဖွေ စစ်ဆေးခဲ့ရာ ကျားဖြန့်လုပ်ကိုင်သည့် အိပ်ဆောင်၊ အစားအစာ သိုလှောင်ရုံ၊ အိမ်သာ၊ ကင်းစောင့်မျှော်စင်၊ မီးစက်၊ ကွန်ပျူတာ၊ Starlink ဗန်း၊ လေအေးပေးစက်၊ ငွေရေတွက်စက်နှင့် ကွန်ပျူတာဆက်စပ်ပစ္စည်းများ ဖမ်းဆီးရမိခဲ့ကြောင်း စစ်ကော်မရှင် ထုတ်ပြန်ချက်ထဲတွင် ရေးသားထားသည်။

ယင်းမတိုင်မီ နိုဝင်ဘာလ ၂၉ ရက် နေ့လယ်ပိုင်းတွင် ကျောက်မဲမြို့နယ် ပုံဝိုးကျေးရွာအုပ်စု တောတွင်းတစ်နေရာရှိ ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) တပ်စခန်းအနီးသို့ စစ်ကော်မရှင်တပ်မှ မြေပြင်ထိုးစစ်ဆင် ဝင်ရောက်လာခြင်းကြောင့် နှစ်ဘက်ထိတွေ့တိုက်ပွဲ အပြင်းအထန် ဖြစ်ပွားခဲ့ကြောင်း SSPP Info မှ သတင်းထုတ်ပြန်ထားသည်။

ပြီးခဲ့သည့် နိုဝင်ဘာလ (၂၄) ရက်မှ (၂၆) ရက်အတွင်း ကျေးသီးမြို့နယ် မိုင်းနောင်မြို့အနီးရှိ နောင်တောက်၊ ကောင်းဟိုင်းနှင့် ဝမ်ကျောင်းကျေးရွာအနီးရှိ ကျားဖြန့်လုပ်ငန်းနေရာများကို စစ်ကော်မရှင်တပ်က ဝင်ရောက်ဖမ်းဆီးခဲ့ရာ တရုတ်နိုင်ငံသား (၂၆) ဦး၊ မြန်မာနိုင်ငံသား (၈) ဦး၊ စုစုပေါင်း (၃၄) ဦးနှင့် ဆက်စပ်ပစ္စည်းများ၊ လက်နက်ခဲယမ်းများ ဖမ်းဆီးရမိခဲ့ကြောင်း စစ်ကော်မရှင်ဘက်မှ နိုဝင်ဘာလ (၂၈) ရက်တွင် သတင်းထုတ်ပြန်ခဲ့သည်။