သျှမ်းပြည် မြောက်ပိုင်း နမ့်ခမ်းမြို့ အောင်မေတ္တာရပ်ကွက်ရှိ နေအိမ်တလုံးကို လက်နက်ကိုင် တပ်ဖွဲ့ တခုက ဝင်ရောက်စီးနင်းရာ ရဲနှင့် ပြည်သူ့စစ်ပူးပေါင်းတပ်ဖွဲ့ တို့ဝင်ရောက် လာသဖြင့် အဆိုပါနေအိမ်အတွင်းပစ်ခတ်မှု ဖြစ်ပွါးခဲ့ကြောင်း သတင်းရရှိသည်။
မေလ ၁ ရက် ယမန်နေ့က ဆိုင်ကယ် ၃ စီးဖြင့်လာသော လက်နက်များကိုင်ဆောင်သည့် လူ ၆ ဦးသည် သျှမ်းဘောင်းဘီများဝတ်ဆင်ကာ နေအိမ်ထဲသို့ ဝင်လာပြီးအိမ်ရှင်အား ဖမ်းဆီးချုပ်နှောင် ဓါးပြတိုက်ကြောင်း ၊ထိုအချိန်တွင် ရဲနှင့်ပြည်သူ့စစ်ပူးပေါင်းတပ်ဖွဲ့များ ရောက်လာသဖြင့် သေနတ်ပစ်ခတ်မှု များ ဖြစ်ပွားခဲ့ကြောင်း အိမ်ပိုင်ရှင် ဦးစိုးသူ က သျှမ်းသံတော်ဆင့်သို့ ပြောသည်။
“ သူတို့တွေက ပလာင်(တအာင်း) စကားပြောပြီး ဝင်လာတယ်။ ကျနော့် အဖေကိုလည်း လက်ထိပ်ခတ်တယ်။ နောက် အခန်းအားလုံးကို လိုက်ရှာတယ်။ သေနတ်က အရှည် တလက် နဲ့ အတိုတလက်ပါတယ်” ဟု ဦးစိုးသူက ပြောသည်။
လက်နက်ကိုင်အဖွဲ့သည် အိမ်ရှင်၏ မြန်မာ ကျပ်ငွေ ပိုက်ဆံ ၃၅ သိန်းနှင့် တရုတ်ယွမ် တသိန်းခွဲကျော် ကိုယူဆောင်သွားကြောင်း အိမ်ရှင်ကဆိုသည်။
အဆိုပါ လက်နက်ကိုင်များဝင်လာချိန်၊ နေအိမ်ခြံဝင်းအတွင်း ပစ်ခတ်မှုဖြစ်ပွါးချိန်တွင် အဆိုပါအိမ်၌ ကလေး ၊ လူကြီး လူ ၁၀ ဦး ရှိကြောင်း လည်း ဦးစိုးသူ က ပြောသည်။
“ ကျနော်တို့က မိသားစု က ဆိုင်ပဲဖွင့်တယ်။ ကျနော်တို့နဲ့ သူတို့နဲ့ ဘာမှ အဆက်အသွယ်မရှိဘူး။ ကျနော်လည်း အံ့သြတယ် ဘာအဓိပ္ပာယ်ဆိုတာ မသိဘူး။ စဉ်းစားလို့မရဘူး” ဟု အိမ်ရှင် ဦးစိုးသူ ကဆိုသည်။
ဓါးပြအဖွဲ့သည် ဒဏ်ရာရရှိသွားဟန်တူကြောင်း ခြံဝင်းအတွင်း သွေးစက်များကျထားသည်ကိုတွေ့ရကြောင်းလည်း အောင်မေတ္တာရပ်ကွက်သားတဦးကပြောသည်။
အဆိုပါ လက်နက်ကိုင် ဓါးပြအဖွဲ့သည် ပလောင်(တအာင်း) စကားပြောဆိုကြသဖြင့် ပလောင်(တအာင်း) အမျိုးသားလွတ်မြောက်ရေး တပ်မတော်( TNLA) အဖွဲ့ ဟုလည်း အိမ်ရှင်များက ပြောဆိုကြသည်။
နေအိမ်အတွင်းဝင်လာသူ ၆ ဦးအနက် တဦးမှာ အိမ်ခြံဝင်းအတွင်းရောက်သည်နှင့် ဆာလာအိတ်ဖြင့်ပတ်ပြီးယူဆောင်လာသော သေနတ်အရှည်ကို ဆွဲထုတ်ကာ နေအိမ်အတွင်းဝင်သွားခဲ့သည်။ ကျန် အမျိုးသားတဦး မှာ နေအိမ်ခြံတံခါးဝတွင် ရပ်စောင့်ဆိုင်းနေပြီး ပစ်ခတ်မှုဖြစ်ပွါးခဲ့ချိန်အထိ စီစီတီဝီမှမှတ်တမ်းဗီဒီယိုကလစ်တိုကို ယနေ့ လူမှု ကွန်ရက် စာမျက်နှာတွင် ပျံ့နှံ့ခဲ့သည်။
“လူမှုကွန်ရက်စာမျက်နှာမှာ ဒီကလစ်တွေတက်လာတာ ကျနော်တို့ တွေ့ရပါတယ်။ ကျနော်တို့ အဖွဲ့တွေကို ပြန်လိုက်မေးကြည့်တဲ့အခါမှာ ဒီလို လုပ်တာ မရှိပါဘူး။ ကျနော်တို့ ကတော့ ဖြေရှင်းဖို့မရှိပါဘူး။ ကျနော်တို့ အဖွဲ့မဟုတ်ဘူး။ လက်နက်ကိုင် ပေါင်းစုံနေထိုင်တဲ့ နေရာပါ” ဟု TNLA မှ ပြန်ကြားရေး တာဝန်ခံ တာအိုက်ကျော် က သျှမ်းသံတော်ဆင့် သို့ ပြောသည်။
လက်နက်ကိုင်ဆောင်ပြီး ပြည်သူများကို ဖမ်းချင်သည့်အချိန်ဖမ်း၊ ခေါ်ချင်သည့်အချိန် ခေါ်ယူသည်မှာ အဆင်မပြေကြောင်း၊ လက်ရှိမှာ မိသားစု အတွက် လုံခြုံရေး စိုးရိမ်ရကြောင်းလည်း ဦးစိုးသူ က ပြောသည်။
လက်နက်ကိုင်အဖွဲ့သည် ပစ်ခတ်မှုဖြစ်ပွါးပြီးနောက်အသီးသီးထွက်ပြေးကြသဖြင့် ၄င်းတို့စီးလာသည့်ဆိုင်ကယ် ၃ စီးအနက် ၁ စီးသာယူဆောင်သွားနိုင်ကြောင်း ၊ ကျန် ၂ စီးမှာ ကျန်နေခဲ့ကြောင်းလည်း လည်းဆိုပါသည်။
သျှမ်းပြည် မြောက်ပိုင်း နမ့်ခမ်းဒေသတွင် အစိုးရတပ်မတော်၊ ရဲတပ်ဖွဲ့များအပြင် ပြည်သူ့စစ်များ၊ လက်နက်ကိုင်အဖွဲ့အစည်းများစွာ လှုပ်ရှားနေထိုင်ပါသည်။
ပြီးခဲ့သည့်အပတ်ကလည်း နမ့်ခမ်းမြို့နေ တရုတ်တဦးအား လက်နက်ကိုင်အဖွဲ့တဖွဲ့က ဖမ်းဆီးပြန်ပေးဆွဲသွားရာ မိသားစုမှ ငွေကျပ်သိန်း ၁၀၀၀ ခန့်အထိ ကုန်ကျခံပြန်ရွေးယူခဲ့ရကြောင်းလည်း နမ့်ခမ်းဒေသခံများကပြောပြသည်။
Leave a Comments