သျှမ်းပြည် တောင်ပိုင်း ကျေးသီးမြို့နယ် နားပန်ကျေးရွာ မှ ခန္ဓာကိုယ် တခုလုံး မီးလောင်ဒဏ်ရာရရှိသည့် အသက် ၉ နှစ်အရွယ် နန်းနွန်းပန် ထိုင်းနိုင်ငံ မဲဆောက်ဆေးရုံတွင် ဆေးကုသခံယူနေပြီး ဆေးကုသ စရိတ်များ လိုအပ်နေကြောင်း စုံစမ်းသိရသည်။
ခန္ဓာကိုယ် တခုလုံးမီးလောင် ဒဏ်ရာရသည့် နန်းနွန်းပန် သည် ဧပြီ ၂၇ ရက်နေ့ တွင် ထိုင်းနိုင်ငံ မဲဆောက် ဆေးရုံ သို့ ရောက်ရှိပြီး ဆေးကုသမှု စတင်ခံယူနေကြောင်း၊ ဆေးကုသရန် အတွက် အကူအညီများလည်း လိုအပ်နေ ကြောင်း သီပေါမြို့ မှ လိုက်ပါပို့ဆောင်ကူညီပေးနေသည့် သီပေါလူငယ် လူမှုကူညီရေးအသင်းမှ စိုင်းအိုက်စိုင်း က သျှမ်းသံတော်ဆင့်သို့ ပြောသည်။
“ အခုတော့ မဲဆောက်ဆေးရုံမှာ ဆေးကုသနေပါပြီ။ ခန္ဓာကိုယ်တခုလုံးက တော်တော် အခြေအနေဆိုးနေတော့ ကုသမှု ခွဲစိတ်မှုကတော့ နည်းနည်း ခက်မယ်။ သူ့ရဲ့ အရေးပြားက တော်တော်ပျက်စီးနေတော့ ၂ ခါ၊ ၃ ခါတော့ ခွဲစိတ်ရမယ်။ အချိန်ကတော့ ၁ လကျော်ကြာမယ်လို့တော့ မှန်းထားကြတယ်” ဟု စိုင်းအိုက်စိုင်းက ဆိုသည်။
နန်းနွန်းပန် သည် မတ် ၂၂ ရက်နေ့ နံနက် ပိုင်း ၂ နာရီတွင် နေအိမ်မီးလောင်ရာမှ ခန္ဓာကိုယ် တခုလုံး မီးစွဲ လောင် ကျွမ်း ဒဏ်ရာရရှိခဲ့ပြီး ကျေးသီးမြို့တွင် တလ ကျော် ဆေးကုသခံယူနေရာ မသက်သာသဖြင့် စေတနာရှင် အလှူ ရှင် များဖိတ်ခေါ်မှုဖြင့်ယခုကဲ့သို့ မဲဆောက်ဆေးရုံသို့ ပို့ဆောင်ဆေးကုသခဲ့ရကြောင်း သိရသည်။
မီးလောင်မှုကြောင့် နန်းနွန်းပန် ၏ အဖွားဖြစ်သူ ဒေါ်နိုင်းရင် လည်း လက်တွင် မီးလောင်ဒဏ်ရာရရှိ သကဲ့သို့ အသက် ၅ နှစ် အရွယ်သာ ရှိသေးသည့် နန်းနွန်းပန်၏ ညီမ တဦးလည်း မီးလောင်မှုကြောင့် သေဆုံးခဲ့ကြောင်း လည်း ကျေးသီး မြို့နယ် ပြည်နယ်လွှတ်တော်ကိုယ်စားလှယ် စိုင်းစံမိန်းက ပြောသည်။
“ တကယ်မီးလောင်တယ်။ ကျနော် သူတို့ အိမ်ရောက်သွားတယ်။ ကလေး ၅နှစ် တယောက် ဆုံးတယ်။ ကျနော် သူ့( နန်းနွန်းပန်) ကို ဆေးရုံမှာ သွားကြည့်တော့ ကျောမှာ အသားတောင်မရှိတော့ဘူး။ သူနာလို့ အော်နေတယ်။ ကျနော်တို့ နိုင်ငံမှာ ကုဖို့ ခက်တယ်လေ” ဟု စိုင်းစံမိန်း ကပြောသည်။
အဆိုပါ ခန္ဓာ တကိုယ်လုံး မီးလောင် ဒဏ်ရာ ရရှိသည့် အသက် ၉ နှစ်အရွယ် ရှိ နန်းနွန်းပန် ဆေးကုသရန် အတွက် အကူအညီ လိုအပ်နေသေးကြောင်းလည်း စိုင်းစံမိန်း ထပ်လောင်းပြောသည်။
ထိုင်းနိုင်ငံသို့ သွားရောက် ဆေးကုသရန် အစမှ အဆုံးအထိ ကူညီမှုပေးခဲ့သည့် သီပေါမြို့ မှ စိုင်းအိုက်စိုင်း က – “ ကျနော် သမီးလေး ကို လူမှု ကွန်ရက်မှာ စတွေ့တော့ တော်တော်တုန်လှုပ်ပြီး၊ ကျနော် ထောင်ထားတဲ့ သီပေါ သတင်း (Hsipaw News) မှာ ပြန်တင်တော့ ဆေးကုသပေးမယ့်သူက ဆက်သွယ်လာတယ်။ မဲဆောက်အထိပို့နိုင်ဖို့တော့အခက်အခဲတွေအများကြီးကြုံရပါတယ်။ ဒါမယ့် အောင်မြင်စွာနဲ့ဘဲ မဲဆောက်ဆေးရုံကို ပို့နိုင်ခဲ့ပြီ” ဟု စိုင်းအိုက်စိုင်း က ဆိုပြန်သည်။
နန်းနွန်းပန်သည် ထိုင်းနိုင်ငံ မဲဆောက်တွင် ဧပြီ ၂၈ ရက်နေ့ မနက်ပိုင်းတွင် ပထမဆုံးအကြိမ် ခွဲခန်းထဲဝင်နိုင်ခဲ့ပြီဖြစ်ကြောင်း၊ ကလေးအတွက် ဆေးကုသ စရိတ်ကို ထိုင်း ဘတ် ၁ သိန်း(မြန်မာငွေ သိန်း ၁၀၀) စရံငွေ ပေးသွင်းရန် အခက်အခဲဖြစ်နေကြောင်း ကူညီမှုပေးသည့် မနွေးနွေး၏ လူမှု ကွန်ရက် စာမျက်နှာတွင် ရေးသားထားသည်။
လက်ရှိမှာ ငွေကြေးမလောက်သဖြင့် ဘတ် ၃ သောင်းသာ မဲဆောက်ဆေးရုံသို့ ပေးသွင်းနိုင်သေးကြောင်း၊ ဆေးကုသရန် အကူအညီလိုနေကြောင်းလည်း မနွေးနွေး ၏ လူမှု ကွန်ရက်တွင် ရေးသားထားသည်။
ရပ်နီးရပ်ဝေးမှ စေတနာရှင်များအနေဖြင့်ဆက်သွယ်လှူဒါန်းလိုပါက – https://www.facebook.com/dawnway.nway/posts/1740307432780944 တွင်ဝင်ရောက်ကြည့်ရှုကာဆက်သွယ်လှူဒါန်းနိုင်ပါသည်။
