အသက် ၁ နှစ်အောက်ကလေးတဦးအပါအဝင် ၄ လောင်းပြိုင်လူသတ်မှုတခု သျှမ်းပြည်နယ် မြို့တော်တောင်ကြီးမြို့တွင် ဖြစ်ပွါးခဲ့သည်။
ဧပြီလ ၂၈ ရက် ယနေ့မနက်ပိုင်းက တောင်ကြီးမြို့၊ ကံသာရပ်ကွက် တိုင်းရင်းဆေးဝါး ထုတ်လုပ်သည့် (မြင်းဖြူ နှစ်ကောင်ဆေးတိုက်)တွင် မိသားစုအလိုက် သတ်ဖြတ်ခံရခြင်းဖြစ်ကြောင်း သိရသည် ။
” ဖြစ်တာက မနေ့ညက ၁၂ နာရီ လောက်ကလို့ ရဲတွေပြောတာကြားတယ် ၊ လူသတ်သမားက အိမ်သာတောင်တက်သွားသေးတယ်လို့ လဲပြောကြတယ် ၊သူတို့အိမ်ဝန်းက ကျနော်တို့ အိမ်ဝင်းထက်တောင် ပိုလုံခြုံသေးတယ် ၊ သွေးတွေ အိမ်ရှေ့ဖက်စီးကျလာလို့ အိမ်နီးချင်းတွေသွားကြည့်တော့ခြံရှေ့မှာ ကလေးအဖေက သေနေပြီ ။ အဖွားနဲ့အဒေါ်ကပင်လုံမှာ အလှူ ရှိလို့သွားကြတာ လွှတ်သွားတာပေါ့ ၊အ
ဆိုးဆုံးကတော့ တစ်နှစ်တောင်မပြည့်သေးတဲ့ ကလေးငယ်ပါ သတ်သွားတာ ” ဟု အသတ်ခံရသည့် မိသားစု၏ အိမ်နီးချင်း များ ကပြောသည်။
အဆိုပါ ဖြစ်စဉ်နှင့်ပတ်သက်၍ တောင်ကြီးမြို့နယ်ရဲတပ်ဖွဲ့မှူး ရဲမှူး မောင်မောင်နိုင်ထံဆက်သွယ်မေးမြန်းရာ ဖြစ်စဉ်အားစစ်ဆေးနေဆဲဖြစ်ကြောင်း ပြန်လည်ပြော ကြားခဲ့သည် ။
အသတ်ခံရသည့် မိသားစုဝင်များမှာ စိုင်းဆေမွန်း (အသက် ၂၇ နှစ် ) ၊ နန်းခမ်းလှိုင် (အသက် ၂၃ နှစ်) ၊ စိုင်းဖဖ (အသက် ရ လ) ၊ မအေးမိုး (အသက် ၁၇ နှစ် ) တို့ဖြစ်ကြောင်း ဆက်လက်သိရှိရပါသည် ။
တောင်ကြီးမြို့တွင် ပြီးခဲ့သည့်နှစ်သြဂုတ်လကလည်း တပ်မိသားစု ၄ လောင်းပြိုင်လည်းကောင်း၊ ယခုနှစ်ဖေဖော်ဝါရီလ က တောင်ကြီးမြို့ရွှေမုဌောဘုရားတွင်အာဂန္တု ရဟန်း ၂ ပါးလည်းကောင်း အမည်မသိလူမှသတ်ဖြတ်သွားခဲ့သည့်အမှုဖြစ်ပွါးခဲ့ဖူးပါသည်။
Leave a Comments