သျှမ်းပြည်မြောက်ပိုင်းလားရှိုးမြို့တွင် သိမ်းဆည်းခံထားရသောလယ်ယာမြေများအား လူထုထံပြန်လည်အပ်နှံပေးဖို့ တောင်သူလယ်သမားရာနှင့်ချီ လမ်းလျှောက်ဆန္ဒဖော် ထုတ်ခဲ့ကြကြောင်းသိရသည်။

ဧပြီလ ၅ ရက် ယနေ့နံနက် ၉ နာရီမှ မွန်းတည့်ချိန်အထိ လားရှိုးမြို့ ခေးနင်း ဘူတာမှ မြို့တော်ခန်းမအထိ လူထု ၂၀၀ ကျော်သည် ငြိမ်းချမ်းစွာ စီတန်း လမ်းလျှောက်ဆန္ဒထုတ်ဖော်ခဲ့ကြခြင်းဖြစ်ပြီး လားရှိုးမြို့ တပ်ရင်း ၃ ရင်းမှ လွန်ခဲ့သောနှစ်ပေါင်း ၃၀ ခန့်က သိမ်းဆည်းခဲ့သော လယ်ယာမြေများအား စီမံကိန်းသက်တမ်းအရ ပြုလုပ်ဆောင်ရွက်ခြင်းမရှိသော မြေပိုမြေလျှံများကိုနည်းဥပဒေအရ ပြန်လည်စွန့်လွတ်ပေးရန် တောင်းဆိုခဲ့ကြသည်။

လမ်းလျှောက် ဆန္ဒပြရာတွင် ပါ၀င်သည့် စိုင်းခမ်းကော်က – “သူတို့သိမ်းသွားတုန်းကတော့ အများကြီးပေါ့။ဧက ရာနဲ့ချီတယ်။ တချို့တော်တော်များများက သူတို့တပ်ဆောက်လိုက်တော့ ပြန်မရနိုင်တော့ဘူးလေ။ ကျန်တဲ့မြေ တွေ ထဲက သူတို့မသုံးဖြစ်တဲ့မြေတွေကိုကျနော်တို့ကပြန်တောင်းတာပါ။ ပြန်လည်စိုက်ပျိုး စားသောက်ဖို့ အတွက်ပါ” – ဟု သျှမ်းသံတော်ဆင့်အားပြောသည်။

လက်ရှိတွင်အသိမ်းခံရလယ်ယာမြေများအနက် တပ်ရင်းမှ မသုံးဘဲ ပိုနေသောမြေလွတ်များ ဧက ၁၀၀ ခန့်ရှိ နေကြောင်း၄င်းအနက် ရောင်းချရန် အကွက်ချထားသောမြေ ဧက ၅၀ ခန့်ရှိကြောင်း ထို့အတွက် ရွာသားများက ပြန်လည်တောင်းဆိုရခြင်းဖြစ်ကြောင်း ဆန္ဒပြ ခေးနင်းနှင့် ခေးခမ်းရွာသားများကပြောသည်။

လားရှိုးသျှမ်းလူငယ်များအဖွဲ့ခေါင်းဆောင် စိုင်းဟန်က – “ဒီအသိမ်းခံရလယ်ယာမြေတွေက ရွာသားတွေအကြိမ်ကြိမ်တောင်းဆိုပြီးပြီ။ ရုံးမှားသွားတောင်းတယ်၊ လွှတ်တော်ကနေလည်းတောင်းတယ် မရဘူး။ မြေတွေကိုတော့ အကွက်ချပြီး ရောင်းနေတာ။ အကွက်မချရသေးတဲ့နေရာမှာ ရွာသားတွေ သွားရှင်းပြီးတော့ သီးနှံစိုက်စားမယ်လို့ခွင့်တောင်းတာလည်းမပေးဘူး။ ဒါကြောင့်ရွာသားတွေ အခုလို ငြိမ်းချမ်းစွာ စုဝေးစီတန်းပြီးဆန္ဒထုတ်ဖော်တောင်းဆိုတာဖြစ်တယ်လို့ သိရပါတယ် ”- ဟု သျှမ်းသံတော်ဆင့်အားပြောသည်။

လားရှိုးမြို့နယ်အတွင်းရှိ ခေးနင်းရွာနှင့်ခေးခမ်းရွာသားများ၏ လယ်ယာမြေများအား လွန်ခဲ့သည့် ၁၉၉၀ သိမ်းဆည်းထားခြင်းဖြစ်ကြောင်းသိရသည်။