သျှမ်းပြည်နယ် အတွင်း တိုက်ပွဲများ ရပ်တန့်ရန်နှင့် သျှမ်းပြည်ဝန်ကြီးချုပ် အနေဖြင့် စစ်ပွဲနှင့် ပတ်သက်ပြီး ဆောင်ရွက်ပေးရန် တကိုယ်တော် ဆန္ဒပြ မှု ကို သီပေါမြို့တွင် ပြုလုပ်ခဲ့သည်။

တကိုယ်တော် ဆန္ဒပြမှု ကို သီပေါ မြို့နယ် ရဲစခန်းတွင် မတ် ၂၄ ရက်နေ့တွင် ခွင့်ပြုမိန့်တင်ခဲ့ကြောင်း၊ ရဲစခန်း၏ ခွင့်ပြုမိန့်ဖြင့် ဆန္ဒပြခြင်းဖြစ်ကြောင်း တကိုယ်တော် ဆန္ဒပြသူ သီပေါ မြို့ ဒေသခံ ကိုညီလတ် က ပြောပြသည်။

တကိုယ်တော် ဆန္ဒ ပြသည့် ကိုညီလတ် သည် “ စစ်ပွဲကြောင့် သျှမ်းပြည်နယ်မြောက်ပိုင်း က ဒုက္ခရောက်နေပါတယ်။ တချက်လောက် စောင်းငဲ့ကြည့်ပေးပါ” “ သျှမ်းမြောက် မှာ စစ်ပွဲကြောင့် ပြည်သူတွေ ဒုက္ခရောက်နေပါတယ်။ စစ်ပွဲဖန်တီး သူတွေကို ကန့်ကွက်ရှုတ်ချပါ” ဆိုသည့် ပိုစတာများကိုင်ထားသည်။

“ ရခိုင် နှင့် သျှမ်းပြည်မှာ စစ်ပွဲတွေ ရပ်တန့်ဖို့ နှင့် ကချင်ပြည်နယ် မြစ်ဆုံ ဆည် မတည်ဆောက်ဖို့ အတွက် ဆန္ဒပြရခြင်းဖြစ်ပါတယ်” ဟုလည်း ကိုညီလတ် က ဆိုသည်။

သီပေါ မြို့နယ် ရဲတပ်ဖွဲ့ကို ခွင့်ပြုမိန့် စတင်သည့် အချိန်တွင် တကိုယ်တော် အနေဖြင့် တင်ပြခဲ့ကာ နောက်ပိုင်းတွင် သီပေါမြို့ ခံများက ပါဝင်မည်ဟုပြောဆိုကြသဖြင့် အများပြည်သူ ဟု ပြောင်းလဲ တင်ခဲ့သော်လည်း ဆန္ဒပြသည့် ရက်တွင် တကိုယ်တည်း သာဖြစ်ခဲ့သည်ဟုဆိုပါသည်။

“အစကတည်းက ကျနော် တကိုယ်တော် လုပ်ဖို့တင်တာပါ။ တခြားလူတွေ ပါချင်တယ်ဆိုတော့ ကျနော် အများပြောင်းပေးတယ်။ နောက် ပါဝင်မယ်လို့ ပြောပြီး မလာနိုင်တဲ့သူတွေကိုလည်းကျနော် ဘာမှ မပြောလိုပါဘူး” ဟု ကိုညီလတ် က ဆိုပြန်သည်။

နှစ်ပေါင်းများစွာ တိုက်ပွဲများဖြစ်ပွားကာ ဒေသခံပြည်သူများလည်း ထွက်ပြေး တိမ်းရှောင်နေရသဖြင့် တိုင်းပြည် ဂုဏ်သိက္ခာ၊ သျှမ်းပြည် ဂုဏ်သိက္ခာ နှင့် တိုင်းရင်းသားလက်နက်ကိုင် ဂုဏ်သိက္ခာလည်း ထိခိုက်သည်ဟု သူက ပြောသည်။

“တိုင်းရင်းသားလက်နက်ကိုင် တွေ ရဲ့ ခံစားချက်တွေ ယုံကြည်ချက်တွေကိုလည်း လေးစားပါတယ်။ ဒါပေမယ့် သေနတ်နဲ့ တိုက်နေတာ အဆင်မပြေတော့ဘူး။ ဗျူဟာတွေ ပြောင်းစေချင်ပါတယ်” ဟု တကိုယ်တော် ဆန္ဒပြသူ ကိုညီလတ်က ပြောသည်။

ဆက်လက်ပြီး တိုင်းရင်းသားလက်နက်ကိုင် အနေဖြင့် ပြည်သူများကို မတရား မဖမ်းဆီးရန်၊ နိုင်ငံတော် သမ္မတ ဦးဝင်မြင့် နှင့် သျှမ်းပြည် ဝန်ကြီးချုပ်ကိုလည်း စစ်ပွဲနှင့် ပတ်သတ်ပြီး အသံထွက်ရန် ကိုညီလတ်က တောင်းဆိုလိုက်သည်။

“ ကျနော် အမျိုးသမီးတွေ ကလေးတွေ ပြေးနေတာ မခံစားနိုင်တော့ဘူး။ သျှမ်းပြည် ဝန်ကြီး ချုပ်အနေနဲ့ အသံထွက်ဖို့လိုအပ်တယ်။ ပြည်သူတွေဒုက္ခ ရောက်အောင် မလုပ်ပါနဲ့ လို့ ပြောစေချင်တယ်။ စစ်ရှောင်တွေကိုလည်း ဥပက္ခာ မပြုစေချင်ဘူး။ တလေးတစား လာကြည့်စေချင်ပါတယ်” ဟု ကိုညီလတ်က ထပ်လောင်းပြောသည်။

သျှမ်းပြည်နယ် တွင် ၂၀၁၈ ခုနစ် နှောင်းပိုင်းမှ စပြီး ယနေ့ထိ တိုက်ပွဲများ တင်းမာနေကြပြီး ဒေသခံ ပြည်သူများ အိုးအိမ်စွန့်ခွာက စစ်ဘေးရှောင်နေရသည်။