သျှမ်းပြည်နယ်မြောက်ပိုင်း နမ္မတူမြို့နယ် မိုင်းမုကျေးရွာအနီးတွင် တိုင်းရင်းသား လက်နက်ကိုင်တပ်ဖွဲ့များ အကြား တိုက်ပွဲဖြစ်ပွားကာ အမျိုးသားတဦး ကျည်ထိမှန်သေဆုံးသွားကြောင်း သတင်းရရှိသည်။

အဆိုပါတိုက်ပွဲသည် မတ် ၂၂ ရက်မှ စတင်ဖြစ်ပွါးကာ ယမန်နေ့ မတ် ၂၃ ရက်ထိ မြောက်ပိုင်း မဟာမိတ် တပ်ဖွဲ့ဝင်နှင့် သျှမ်းပြည် ပြန်လည်ထူထောင်ရေး ကောင်စီ (RCSS/SSA) တို့ စစ်ရေး တင်းမာနေကြောင်း ဒေသခံ ပြောဆိုချက်အရ သိရသည်။

“ ကျည်ထိမှန်တဲ့သူက ဆန်ခါရွာက အသက် ၆၀ ကျော် လုံးတလိန်း ပါ။ ကျည်ကတော့ နံရိုးနေရာ ထိတယ်။ ပွဲချင်းပြီးသေဆုံးသွားတယ်” ဟု သေဆုံးသူကို လိုက်ပါကူညီပေးသည့် မန်စံ က စိုင်းကျော်က ပြောသည်။
ဖြစ်စဉ်မှာ ယမန်နေ့ မတ်၂၃ ရက် တွင် လုံးတလိန်း နှင့် ၄င်း၏မြေးသည် ကျေးရွာတွင် ရဟန်းခံ ရှင်ပြုပွဲနှင့် ကျောင်းရေစက်ချပွဲအတွက် မန်စံစျေးနေ့တွင် ခေါက်ဆွဲသွားဝယ်ရာ အပြန်လမ်းတွင် ကျည်ဆံထိမှန် သေဆုံးခဲ့ကြောင်း စိုင်းကျော် က ပြောသည်။

“ သူ့မြေးက အသက် ၁၇ နှစ်အရွယ်ပေါ့။ သူတို့ ဆန်ခါရွာက တိုက်ပွဲဖြစ်နေတဲ့ မိုင်းမု ကျေးရွာကို ဖြတ် ပြီးမှ ရောက်တော့။ ကြားမှ ကျည်ထိသွားတာပါ။ အလောင်းကိုတော့ နမ္မတူ ရင်ခွဲရုံပို့ထားတယ်” ဟု စိုင်းကျော် က ထပ်လောင်းပြောသည်။

သျှမ်းပြည်နယ်မြောက်ပိုင်း နမ္မတူမြို့နယ် အတွင်းတိုင်းရင်းသား လက်နက်ကိုင် အချင်းချင်းတိုက်ပွဲဖြစ် ပွားမှုကြောင့် စစ်ဘေးရှောင် ၁၅၀ ခန့်သည် နီးစပ်ရာသို့ ထွက်ပြေး တိမ်းရှောင်နေရသည်။

သျှမ်းပြည် မြောက်ပိုင်းတွင် RCSS နှင့် SSPP တို့ အကြား ပဋိပက္ခ များ အမြန်ရပ်တန့်နိုင် အတွက် ဖြစ်ပွားနေသည့် တိုက်ပွဲများ ရပ်တန့်ထားရန် လည်း မတ် ၂၁ ရက်နေ့တွင် RCSS ထုတ်ပြန် ကြေညာခဲ့သည်။

အလာတူ မတ်လ ၁၉ ရက်နေ့ ညနေ ၃ နာရီခွဲအချိန် ကလည်း SSPP အထက်ခေါင်းဆောင်များက ဒေသအသီးသီးရှိ တပ်ဖွဲ့တပ်သားများအား တိုက်ပွဲများ ရပ်တန့်ရန် ဆင့်ဆိုညွှန်ကြားခဲ့သဖြင့် ပစ်ခတ်မှုရပ်စဲထားရကြောင်း သိရသည်။

တိုက်ပွဲများ ရပ်ဆိုင်းထားရန် ထုတ်ပြန်ခဲ့ကြပေမယ့် လက်နက်ကိုင်များမှာ စစ်အင်အား များ ဆက်တိုက်တို့ချဲ့မှုများပြုလုပ်နေသည်ကိုလည်း ဒေသခံများပြောဆိုချက်အရ သိရသည်။

ထို့အပြင် မတ် ၂၁ ရက်နေ့တွင် နေပြည်တော်တွင် အပစ်ခတ်ရပ်စဲရေးသဘောတူညီ (NCA) မထိုးရသေးသည့် အဖွဲ့ ၈ ဖွဲ့ နှင့် အမျိုးသားပြန်လည် သင့်မြတ်ရေး နှင့် ငြိမ်းချမ်ေးရး ဗဟိုဌာန NRPC တို့တွေ့ဆုံခဲ့ကြသေးသည်။

“ အထက်မှာတော့ ငြိမ်းချမ်ေးရးလို့ပြောကြပေမယ့် မြေပြင်မှာ တိုက်ပွဲတွေဖြစ် စစ်ဘေးတွေ ရှောင် နေရတယ်။တိုက်ပွဲတွေ ဖြစ် ပြည်သူတွေပဲ ခံစားရတာပါ။ တိုက်ပွဲတွေ ရပ်စေချင်ပြီ” ဟု မန်စံ သို့စစ်ဘေး ရှောင်လာသည့် အမျိုးသားတဦးက ပြောသည်။

နယ်မြေစိုးမိုးရေး ပြသာနာ ကြောင့် သျှမ်းလက်နက်ကိုင် ၂ ဖွဲ့သည် ၂၀၁၈ နှစ်နှောင်းပိုင်း မှ စတင်ကာ လက်ရှိ အချိန်ထိ သျှမ်းပြည် မြောက်ပိုင်းတွင် ဆက်တိုက်တိုက်ပွဲဖြစ်ပွားနေသည်။