သျှမ်းပြည်မြောက်ပိုင်း သံလွင်အရှေ့ခြမ်း ဟိုပန်ခရိုင် မိုင်းမောမြို့ UWSA ၀ တပ်ဖွဲ့ထိန်းချုပ်နယ်မြေတွင် ပေါက် ကွဲမှုတခုဖြစ်ပွါးရာ သေကြေဒဏ်ရာရသူများရှိခဲ့ကြောင်းသိရသည်။
မတ်လ ၂၃ ရက်နေ့ ညနေ ၄ နာရီခွဲကျော်ခန့်က မိုင်းမောမြို့ရှိ စက်ရုံတရုံပေါက်ကွဲခြင်းဖြစ်ပြီး အနီး တဝိုက်ရှိ လူနေအိမ်များ ထိခိုက်ပျက်စီးမှုများပြားကြောင်း မိုင်းမောဒေသခံများပြောပြချက်အရသိရသည်။
“မီးခိုးတွေအူတက်လာတယ်။ ပြီးတော့ မီးလုံးကြီးတွေနဲ့ ပေါက်ကွဲရော ရပ်ကွက်တဝက်လောက် ထိသွားတယ်။ ပေါက်ကွဲမှုက တအားပြင်းတာ။ ၀ တပ်ပိုင် စက်ရုံပဲလေ။ စစ်သားတွေအမြဲစောင့်တော့ သာမန်ပြည်သူဝင်မရဘူးလေ” – မိုင်းမောမြို့နယ် ဦးဆိုင်ပေါင်း ကပြောသည်။
“ကျောက်မိုင်းခွဲရာမှာ အသုံးပြုတဲ့ ကတ်ယမ်း ပေါက်ကွဲတာဖြစ်ကြောင်း၊ မည်သည့်အကြောင်း ကြောင့်ပေါက်ကွဲသည်ကို မသိရသေးကြောင်း ၊ လူသူထိခိုက်ဒဏ်ရာရမှုရှိခဲ့ကြောင်း သို့သော် စစ်ဆေးမှုပြုနေဆဲဖြစ်ကြောင်း ”- ၀ အထူးဒေသ ၂ ၏ ပြင်ပဆက်ဆံရေးတာဝန်ခံ ဦးညီရန်းကပြောကြောင်း ရွှေတြိဂံသတင်းဌာနတွင်ဖော်ပြထားသည်။
လာမည့် ဧပြီလတွင် ၀ ပြည်သွေးစည်းညီညွတ်ရေးတပ်မတော်၏ ငြိမ်းချမ်းရေး နှစ် ၃၀ ပြည့်ပွဲတော်ကြီးကို ပန်ဆန်းတွင်ကျင်းပရန်အတွက်ပြင်ဆင်နေဆဲအချိန်ဖြစ်ရာ ၀ တပ်ဖွဲ့မှ လုံခြုံရေးတင်းကျပ်ထားသော်လည်း ယခုကဲ့သို့ ပေါက်ကွဲမှုဖြစ်ပွါးခဲ့မှုကြောင့် ဒေသခံလူထုများ လုံခြုံရေးအတွက် အထူးစိုးရိမ်နေကြောင်းလည်း ပန်ဆန်းဒေသခံကပြောသည်။ မိုင်းမောမြို့သည် လားရှိုးမြို့အရှေ့ဘက်တည့်တည့် သံလွင်အရှေ့ခြမ်း တွင်ရှိပြီး ပန်ဆန်းမြို့၏ မြောက်ဘက် ကီလိုမီတာ ၂၀၀ ခန့် အကွာတွင်တည်ရှိကြောင်းသိရပါသည်။
Leave a Comments