သျှမ်းပြည်မြောက်ပိုင်း အတွင်း သျှမ်းပြည် တိုးတက်ရေး ပါတီ၊ သျှမ်းပြည် တပ်မတော် (SSPP/SSA) နှင့် မြန်မာ အစိုးရ တပ်တို့သည် မတ်လအတွင်း တိုက်ပွဲများဖြစ်ပွားကာ အရပ်သား တဦး သေဆုံးပြီး၊ ၂ ဦး ဒဏ်ရာရကြောင်း ဒေသခံ ရ၀၀ ကျော် စစ်ဘေးရှောင်နေရကြောင်း သျှမ်းလူ့အခွင့်အရေး မဏ္ဍိုင် SHRF က ထုတ်ပြန်ခဲ့သည်။
မတ်လ ၉ ရက်နေ့က မြန်မာအစိုးရ တပ်မှ ပန်ခါးတောင်ပေါ်တွင် ခြေစိုက်သည့် SSPP/SSA ထံ စာ ပို့ဆောင်ရန် အသက် ၆၇ နှစ်အရွယ် လုံးဆာ နှင့် အသက် ၅၀နှစ်အရွယ် လုံးမောင်ကို စေခိုင်းခဲ့ရာ လမ်းခရီးတွင် မြေမြုပ်မိုင်းနင်းမိကာ လုံးဆာ တယောက် ပွဲချင်းပြီး သေဆုံးခဲ့ကြောင်း လုံးမောင်သည် မိုင်းပေါက်ကွဲမှုကြောင့် ခြေထောက်နှင့် တင်ပါး ဒဏ်ရာရရှိခဲ့ကြောင်း မတ်လ ၂၀ ရက်နေ့တွင် ထုတ်ပြန်သောကြေငြာချက်တွင် ရေးသားထားသည်။
“အခုတော့ ဒဏ်ရာရတဲ့တယောက် ကျေးသီးဆေးရုံမှာဆေးကုသမှုခံယူနေတယ်။ အစိုးရစစ်တပ်က လူထုကို အဓမ္မခိုင်းစေပြီးတော့ စစ်လေယာဉ်နဲ့ ကျည်ကြီးတွေပစ်ချတယ်။ လူထုကိုထိခိုက်တော့လူထုသေကြေ ဒုက္ခ ရောက်ရတာပေါ့။ ဒါဟာ တပ်မတော်ထုတ်ပြန်ထားတဲ့ ၄ လကြာတဖက်သတ် အပစ်ရပ်ခြင်းကို ချိုးဖောက် တာဖြစ်တယ်။ တဖက်ကလည်း ဒီဖြစ်စဉ်ကိုကြည့်ခြင်းအားဖြင့်တပ်မတော်ဟာ လူထုနဲ့နိုင်ငံတော် အေးချမ်း တည်ငြိမ်ရေးကိုမလိုလားဘူးလို့မြင်ရပါလိမ့်မယ်” – ဟု SHRF ပြောရေးဆိုခွင့်ရှိသူ စိုင်းဟော်ရှဲန်က သျှမ်းသံတော်ဆင့်အားပြောသည်။
ထို့အပြင် မတ် ၁၀ ရက်တွင် မြန်မာ အစိုးရတပ်မှ ရဟတ်ယာဉ်ဖြင့် ပစ်လိုက်သည့် ကျည်သည် ပန်ခါးကျေးရွာ အတွင်း အိမ်တွင် ဟင်းချက်နေသည့် အသက် ၅၀ကျော် အမျိုးသမီး ကို ထိမှန်ခဲ့ကာ ရင်သားတွင် ဒဏ်ရာ ရရှိခဲ့ကြောင်း ထုတ်ပြန်တွင် ဖော်ပြထားသည်။
မြန်မာ့ အစိုးရ တပ် လေယာဉ်ဖြင့် ဝင်ရောက်ပစ်ခတ်သဖြင့် ဝမ်ပန်ခါးရွာ နှင့် အနီးကျေးရွာ ၉ ရွာ ဒေသခံ ရ၀၀ သည့် ကျေးသီမြို့ပေါ်သို့ ပြောင်းရွှေ့လာရကြောင်းသိရသည်။
SSPP/SSA အား လွယ်ပန်ခါးတွင် ထိုးစစ်ဆင်သောအစိုးရတပ်မှာ ခလရ ၂၃ သီပေါ၊ ခမရ ၁၇ မန်လီ၊ ခမရ ၃၂၅ မိုင်းရယ်နှင့် ခလရ ၆၇ ဟိုယ တို့ဖြစ်ကြောင်းသိရသည်။
ယုံကြည်မှု တည်ဆောက်ရန် နှင့် တိုက်ပွဲများ လျော့ချရေး အတွက် ဖေဖော်ဝါရီ ၂၅ ရက်နေ့တွင် SSPP/SSA နှင့် ဒုတိယ ဗိုလ်ချုပ်ကြီး ရာပြည့် ဦးဆောင်သည့် အစိုးရ စစ်တပ် ညှိနှိုင်းရေး အဖွဲ့ တို့သည် နေပြည်တော်တွင် တွေ့ဆုံပြီးနောက်ပိုင်း ဖြစ်ပွားခဲ့ခြင်းဖြစ်သည်။
Leave a Comments