သျှမ်းပြည်မြောက်ပိုင်းတွင် RCSS နှင့် SSPP တို့အကြားပဋိပက္ခများအမြန်ရပ်တန့်နိုင်ရေးအတွက် ဖြစ်ပွါးနေ သော တိုက်ပွဲများ ရပ်တန့်ထားဟု သိရှိရသည်။

မတ်လ ၂၁ ရက်နေ့ ရက်စွဲဖြင့် သျှမ်းပြည်ပြန်လည်ထူထောင်ရေးကောင်စီ RCSS က ရောက်ရှိရာအရပ်တွင် တပ်များ ရပ်တန့်ထားပြီး ဖြစ်ပွားနေသည့် တိုက်ပွဲများ ရပ်တန့်ထားမည်ဖြစ်ကြောင်း အချက် ၅ ချက်ပါ ကြေငြာချက်တစောင်ထုတ်ပြန်ထားသည်။

သျှမ်းပြည်ပြန်လည်ထူထောင်ရေးကောင်စီ၏ ထုတ်ပြန်ကြေငြာချက်တွင် – မတ်လ ၂၀ ရက်နေ့ RCSS ၏ CEC အစည်းဝေး၌ လက်ရှိနိုင်ငံရေး၊ ငြိမ်းချမ်းရေး၊ သျှမ်းပြည်နယ်အရေး ကိစ္စများ အကျယ်တဝင့် ဆွေးနွေးကြ ကြောင်း၊ ထိုအစည်းအဝေးမှ အချက် ၆ ချက်ပါ ကြေငြာချက်တစောင် ထုတ်ပြန်ရာ SSPPနှင့် ဖြစ်ပွားနေသောတိုက်ပွဲများ မတ်လ ၂၀ ရက်နေ့ မှစ၍ ရပ်တန့်ထားမည် ဖြစ်ကြောင်းလည်း ပါရှိပါသည်။

”ကျနော်တို့တပ်တွေတော့အကုန်ရပ်ထားပြီ။ ၁၉ ရက်နေ့ ညနေ ၃ နာရီ ၄၅ မိနစ် အချိန် တိုက်ခိုက်မှု အားလုံး ရပ်ထားဖို့ အထက်က ညွှန်ကြားလာလို့ အဲ့ဒီ့အချိန်ကတည်းက ပဋိပက္ခဖြစ်ပွားတဲ့ ဒေသကနေ တပ်တွေခွာ ထား လိုက်တာ အခုထိဘဲ”- ဟု SSPP တပ်မှူးကြီးတဦးကလည်း သျှမ်းသံတော်ဆင့်သို့ ပြောသည်။

နယ်မြေစိုးမိုးရေးပြဿနာကြောင့် သျှမ်းလက်နက်ကိုင်တပ် နှစ်ခုသည် ၂၀၁၈ နှစ်နှောင်းပိုင်းမှ စ၍ ၂၀၁၉ မတ်လ ၁၉ ရက်အနေ့ တိုက်ပွဲများ ဆက်တိုက်ပွဲဖြစ်ပွားခဲ့သည်။ တိုက်ပွဲကြောင့်လည်း သီပေါ၊ ကျောက်မဲ၊ နမ္မတူ၊ ကျေးသီး၊ မိုင်းကိုင် စသည့်မြို့နယ်များမှ ဒေသခံ ထောင်ဂဏန်း စစ်ဘေးစစ်ဒဏ်သင့်သကဲ့သို့ သေဆုံးမှု ၊ သျှမ်းလူထုအသက်အိုးအိမ်ပျက်စီးဆုံးရှုံးမှု အကြိမ်ကြိမ်ဖြစ်ပွားခဲ့သည်။