ထိုင်းနယ်စပ်နေဒုက္ခသည်များရိက္ခာဖြတ်တောက်ခံရမှုကြောင့်အခက်အခဲကြုံတွေ့နေရမှုများနှင့်ပတ်သက်ပြီး သတင်းစာရှင်းလင်းပွဲပြုလုပ်

0

ထိုင်းနိုင်ငံရောက် သျှမ်းရွှေ့ပြောင်းအလုပ်သမားများစုပေါင်းထားသည့်လူမှုရေးလှုပ်ရှားသည့်အဖွဲ့က ထိုင်းနယ်စပ်နေ သျှမ်းဒုက္ခသည်များစခန်း ရိက္ခာဖြတ်တောက်ခံရမှုကြောင့် အခက်အခဲကြံုတွေ့ နေရမှုများနှင့်ပတ်သက်ပြီး သတင်းစာရှင်းလင်းပွဲတရပ် ပြုလုပ်ခဲ့သည်။

ဂျန္နဝါရီလ ၂၇ ရက်နေ့က သျှမ်းအမျိုးသားများလူမှုအခြေပြုအဖွဲ့နှင့် ဒုက္ခသည်များ ကူညီစောင့်ရှောက် ရေးထိုင်းအဖွဲ့တို့ပူးပေါင်းကာ ထိုင်းနိုင်ငံ ဘန်ကောက်မြို့တော် ခရိယာန်ကျောင်းသား များရုံး တွင်သတင်းစာရှင်းလင်းပွဲပြုလုပ်ခဲ့ခြင်းဖြစ်သည်။

ရည်ရွယ်ချက်ကတော့ ဒီ ထိုင်းနယ်စပ်ရောက်နေတဲ့ စစ်ဘေးရှောင်ဒုက္ခသည်စခန်းတွေက ဒုက္ခသည် တွေကြံုတွေ့နေရတဲ့အခက်အခဲတွေကို ပြည်ပနိုင်ငံကအဖွဲ့အစည်းတွေ သိအောင်၊ ကူညီထောက်ပ့ံပေးဖို့ဆန္ဒရှိ တဲ့အလှူရှင်တွေသိရှိအောင်၊ နောက်ပြီးတော့ တိုင်းရင်းသားပြည်သူလူထုကို ပြောဆိုခွင့်၊လုပ်ပိုင်ခွင့် ရရှိဖို့ အနောက်နိုင်ငံကနေ မြန်မာအစိုးရကို အကြံပြုနိုင်အောင် ဖြစ်ပါတယ်။- ဟု သတင်းစာရှင်းလင်းပွဲဖြစ်မြောက်ရေး အတွက် ဦးဆောင်စီစဉ်သူ စိုင်းနွံဟတ်တိုင်း ကပြောသည်။

လက်ရှိထိုင်းနှင့်သျှမ်းနယ်စပ်တလျှောက်တွင် သျှမ်းဒုက္ခသည်စခန်း ၆ ခုရှိနေရာ ပြီးခဲ့သည့်နှစ် အောက်တို ဘာလကစပြီး ကူညီထောက်ပ့ံမှုများပေးနေသည့် ပြည်ပနိုင်ငံအဖွဲ့အစည်းများက ကူညီထောက်ပ့ံမှု ရပ်ဆိုင်းလိုက်သဖြင့် သျှမ်းပြည်တွင်း စစ်ရေးမတည်ငြိမ်မှုများကြောင့် နေရပ်မပြန်နိုင်သေးသည့် ဒုက္ခသည် ၆၀၀၀ ကျော်မှာ နေထိုင်စားသောက်ရေးအခက်အခဲကြံုတွေ့နေရသည်။

ကျနော်တို့ သျှမ်းရွှေ့ပြောင်းအလုပ်သမားတွေ ရပ်ဝေးကိုရောက်ရှိအလုပ်လုပ်ကိုင်စားသောက်နေ ရပေမယ့် လည်းဘဲ ကိုယ့်လူမျိုးအရေးအတွက် တဒေါင့်တနေရာကနေ တတ်အားသရွေ့ လုပ်ပေးနေပါတယ်ဆိုတာကို သျှမ်းပြည်တွင်းကလူထုသိစေချင်ပါတယ်။ သျှမ်းပြည်တွင်းလူထုလည်း စည်းလုံးညီညွတ်ကြပါ။ချစ်ခင်ကြပါ လို့ ပြောချင်ပါတယ်- ဟု စိုင်းနွံဟတ်တိုင်းက ပြောသည်။

တဖက်ကလည်း ဂျန္နဝါရီလ ၂၈ ရက်နေ့ ကုလသမဂ္ဂ၏ လူ့အခွင့်အရေးဆိုင်ရာ မြန်မာနိုင်ငံ ကိုယ်စားလှယ် မစ္စယန်ဟီးလီး ထိုင်းနိုင်ငံ ခရီးစဉ်တွင် သျှမ်းလူ့အခွင့်အရေးအတွက်လှုပ်ရှားနေသည့်အဖွဲ့အစည်းများနှင့် နယ်စပ်နေဒုက္ခသည်များ၏ကိုယ်စားလှယ်များက တွေ့ဆုံကာ ကူညီထောက်ပ့ံမှုများရရှိရေးအတွက် ဆွေးနွေးတောင်းဆိုခဲ့ကြကြောင်းသိရသည်။

၁၉၉၇-၉၈ ခုနှစ်က အစိုးရတပ်မတော်၏ နေရပ်အဓမ္မပြောင်းရွှေ့ခိုင်းမှုကြောင့် သျှမ်းပြည်အလယ်ပိုင်းကဒေသခံလူထု ၃ သိန်းကျော်မှာ နေရပ်ကစွန့်ခွာကာ ထိုင်းနိုင်ငံအတွင်းသို့ ၀င်ရောက်အလုပ်လုပ်ကိုင်ခဲ့ကြသကဲ့သို့ နယ်စပ်တွင် ဒုက္ခသည်များအဖြစ် ခိုလှုံကာ နေရပ်ပြန်နိုင်မည့်ရက်စောင့်ဆိုင်းနေကြသူများလည်းရှိပါသည်။ သို့သော်၄င်းတို့အားထိုင်းအစိုးရက ဒုက္ခသည်များအဖြစ် တရားဝင် မသတ်မှတ်ပေးပေ။

Leave a Comments

SHARE

LEAVE A REPLY

Please enter your comment!
Please enter your name here