ယခုကာလသည် တောတောင် လယ်ယာများအား မီးရှို့သည့်ကာလဖြစ်သည့်အလျောက် မြန်မာ ထိုင်းနယ်စပ် တာချီလိတ် နှင့် ထိုင်းမြောက်ပိုင်း ချင်းမိုင်ခရိုင်အတွင်း မီးခိုးဝေ လေထုညစ်ညမ်းမှုမြင့်နေသည်ဟု သဘာဝပတ်ဝန်းကျင်ထိန်းသိမ်း ရေး အဖွဲ့များ က ပြောသည်။
သျှမ်းပြည်နယ် အရှေ့ပိုင်း တာချီလိတ် တွင် မတ် ၁၄ ရက် မနက်ပိုင်းကမီးခိုးများထူထပ် ဆိုးရွားစွာဝေနေသဖြင့် လေထု ညစ်ညမ်းမှု ကျန်းမာရေး အသိပေး ကြေညာချက်ထုတ်ပြန်ခဲ့သည်။
မီးခိုးထူထပ်မှုကြောင့် မီးသတ်မှ ရေမှုန်များဖျန်းပက်ပေးခြင်း ပြုလုပ်နေသည် ဟုလည်း တာချီလိတ်တွင် နေထိုင်သည့် နန်းချယ်ရီ က ပြောပြသည်။
“ မီးသတ်ကတော့ ရေတွေဖျန်းပေးတာတွေလုပ်ပေးတယ်။ မနက်ပိုင်းက လေထုက တော်တော်ဆိုးတယ်။ လေယာဉ်ဆင်းလို့ မရတော့ဘူးထင်ခဲ့တာ။ ဒီလိုတပေါင်းလ ဆိုရင်တော့ နှစ်တိုင်းဖြစ်နေကျပါဘဲ။” ဟု နန်းချယ်ရီ က ဆိုသည်။
လေထု ညစ်ညမ်းမှုကြောင့် တိုင်းတာချက်ကို ထိုင်းနိုင်ငံ မှ ငှားရမ်းပြီး တာချီလိတ်မြို့တွင်း (၁၀) နေရာတွင် တပ်ဆင်သွားမည်ဖြစ်ကြောင်း၊ လက်ရှိမှာ လေထု ညစ်ညမ်းမှု အဆင့် ၁၆၀ ထိဖြစ်နေကြောင်းလည်း သိရသည်။
လေထုညစ်ညမ်းမှုကြောင့် အသက်ရှူလမ်းကြောင်း ဆိုင်ရာထိခိုက်မှုဖြစ်နိုင်သည့်အတွက် အပြင်ထွက်ပါက Mask နှာခေါင်းစည်းများ တပ်ဆင်ကြရန်နှင့် ကျန်းမာရေး ချို့တဲ့သူများ အပြင်မထွက်ရန်လည်း သက်ဆိုင်ရာ မှ ထုတ်ပြန်ထားသည်။
တောင်ယာမီးရှို့မှုကြောင့် ဖြစ်ပေါ်လာသော မီးခို်းများနှင့် လေထုညစ်ညမ်းမှုသည် တိရစ္ဆာန်များ အပါအဝင် လူ၏ ကျန်းမာရေးကို ထိခိုက်စေကြောင်း၊ အထူးသဖြင့် ကလေးငယ်များနှင့် သက်ကြီးရွယ်အိုများကို ပိုမိုထိခိုက်မှုရှိကြောင်းလည်း သိရသည်။
ထိုနည်းတူ ထိုင်းနိုင်ငံ ချင်းမိုင်မြို့ တွင် လေထုညစ်ညမ်းမှု နေ့လည်ပိုင်းတွင် အဆိုးဆုံး ဟု သတ်မှတ်ထားသည့် ခရမ်းရောင် အဆင့် (၂၈၀) ထိ မြင့်တက်သဖြင့် ကမ္ဘာ နံပတ်(၁) အဆင့်ထိ ရောက်နေကြောင်း Chiang Mai သတင်းဌာန များ၏ ရေးသားချက်အရ သိရသည်။
ထိုင်းနိုင်ငံ မြောက်ပိုင်း ချင်းမိုင်မြို့ လေထုညစ်ညမ်းမှုသည် အမြင့်ဆုံးရောက်ရှိနေသဖြင့် ကျောင်းများ ယာယီပိတ်ထားရန်နှင့် ချင်းမိုင်တက္ကသိုလ်အားလည်း မတ်လ ၁၄ နှင့် ၁၅ ရက် ၂ ရက်တာ ပိတ်ထားမည်ဖြစ်ကြောင်း မတ် ၁၃ ရကက ချင်းမိုင် တက္ကသိုလ်မှ ကြေညာချက်ထုတ်ခဲ့သည်။
“ကျနော်က ပစ္စည်းပို့တဲ့အလုပ်လုပ်တယ်ဆိုတော့ ဆိုင်ကယ်နဲ့တနေ့လုံး လမ်းပေါ် မှာချည်းသွားလာနေရတာ ။ ဒီလထဲမှာအရမ်းဆိုးရွားတယ်။ မျက်စိတွေစပ်တယ်။ လည်ချောင်းတွေစပ်တယ်။ အသက်ရှူလိုက်ရင် စပ်ဖျဉ်းဖျဉ်းကြီး။ အသက်ရှူရ အရမ်းခက်ပါတယ်။ နှာခေါင်းပိတ်ပါရင်နဲနဲသက်သာတယ်။ အဲ့ကြောင့် Mask လေးတွေ တပ်ထားသင့်ပါတယ် အပြင်ထွက်ရင်။ ” – ဟု ချင်းမိုင်ရောက် သျှမ်းရွှေ့ပြောင်း အလုပ်သမား စိုင်းခေး ကပြောသည်။
ချင်းမိုင်တွင် မီးခိုးများပိတ်ဖုံးနေမှုကြောင့် မတ်လအတွင်း နေရောင်ပင် မတောက်ပ နိုင်ကြောင်း သိရသည်။
အဆိုပါ လေထုညစ်ညမ်းမှုသည် ဧပြီလကုန်ထိ ရင်ဆိုင်ရမည် ဖြစ်ပြီး၊ မိုးရွာသွန်းပါက လေထုညစ်ညမ်းမှု ပြေပျောက်သွားမည် ဟု သိရသည်။
