သျှမ်းပြည်မြောက်ပိုင်း ကျောက်မဲမြို့နယ်အတွင်း ပစ်ခတ်တိုက်ခိုက်မှုများကြောင့် နွေရာသီသျှမ်းစာသင်တန်း ကျောင်းဖွင့်လှစ်ထားသည့် ဘုန်းကြီးကျောင်းအထိ ကျည်ဆံများရောက်ရှိကြောင်းသိရသည်။
သျှမ်းပြည်မြောက်ပိုင်း ကျောက်မဲမြို့နယ် ကွဲကုန်းအုပ်စု နောင်ပိန်အွန် ရွာအနီးမြောက်ပိုင်းမဟာမိတ်တပ်ဖွဲ့နှင့် RCSS တိုက်ကြားတိုက်ပွဲကြောင့် နွေရာသီသျှမ်းစာသင်တန်းကျောင်းစတင်ဖွင့်လှစ်သည့် မတ်လ ၁ ရက် ယနေ့တွင်ပင် ၄င်းတို့၏ ကျည်ဆံများ နောင်ပိန်အွန်ရွာ ဇေယျသုခဘုန်းကြီးကျောင်းအထိ ကျရောက်လာကြောင်း ဒေသခံရွာသား တဦး ကပြောသည်။
“တော်သေးတယ် ကလေးတွေကိုမထိပေလို့ပေါ့။ ဒီနေ့မှ သင်တန်းစဖွင့်တာ။ သေနတ်သံထွက်တာမကြာဘူး ကျည်ဆံတွေကျလာတာ။ ကလေးတွေကိုမထိလို့တော်သေးတယ်။ ဘုန်းဘုန်းတွေရောရွာသားတွေရော စိတ် မကောင်းဖြစ်ရတာပေါ့။ မနက် ၁၁ နာရီက ဖြစ်တာလေ။ ခုတော့ရွာမှာ လူတွေမရှိတော့ဘူး။ မြို့ကိုပြေးကုန်ပြီ” – ဟု ဒေသခံ ရွာသားတဦးက သျှမ်းသံတော်ဆင့်အားပြောသည်။
သို့သော် ဘယ်ကျောင်းများတွင် ခိုလှုံနေကြသည်ကိုမူ မသိရသေးဟု ၄င်းကပြောသည်။
ယနေ့မနက်က စတင်ဖွင့်လှစ်သော နွေရာသီ သျှမ်းစာသင်တန်းကျောင်းသို့ ကျောင်းသားလူငယ် ၁၀၀ ခန့် တက်ရောက်ကြောင်းသိရပါသည်။
ကျွဲကုန်းအုပ်စုသည် မန္တလေးမှ ကျောက်မဲအဝင် ညာဘက်ချိုးဝင်ရသော ကျောက်မဲမြို့အရှေ့ဘက် ၂ မိုင်အကွာခန့်တွင် တည်ရှိပါသည်။
Leave a Comments