သျှမ်းပြည် မြောက်ပိုင်း သီပေါမြို့နယ် နှင့် နမ္မတူမြို့နယ် ကြား မန်လီကျေးရွာ အနီးတွင်တိုက်ပွဲများဖြစ်ပွားသဖြင့် ဒေသခံ စစ်ရှောင် ၃၀၀ ကျော် ထွက်ပြေး တိမ်းရှောင်နေရသည်။
RCSS နှင့် မြောက်ပိုင်းမဟာမိတ်တပ်ဖွဲ့တို့ကြားတိုက်ပွဲဖြစ်ပြီး ဖေဖော်ဝါရီ ၂၆ (ယမန်နေ့) ညနေပိုင်းကတည်းက စတင်ကားဖြစ်ပွားခဲ့ပြီး ယနေ့မနက်ပိုင်း ဖေဖော်ဝါရီလ ၂၇ ရက်မနက်ပိုင်း စစ်ရှောင်များ အကူအညီတောင်းရာ သွားရောက်ကူညီသယ်ထုတ်လာသည်ဟု သီပေါမြို့ နယ်စည်းမခြား ပရဟိတ အဖွဲ့ မှ ကိုမျိုး က သျှမ်းသံတော်ဆင့်သို့ ပြောသည်။
“ ဒီနေ့ မနက် မှာ မန်လီကျေးရွာ က ဒေသခံတွေက သေနတ်သံကြားလို့ အကူအညီလှမ်းတောင်းကြတယ်။ အဲ့ဒါနဲ့ ကျနော်တို့ပရဟိတ အဖွဲ့တွေ အားလုံးသွားပြီး ခေါ်ခဲ့တာပါ။ ရွာက ထော်လဂျီရော ကားနဲ့ရောထုတ်လာတယ်” ဟု ကိုမျိုး ကဆိုသည်။
လက်ရှိ စစ်ဘေးရှောင်များကို သီပေါမြို့နယ် ကွန်စံလိတ် ကျေးရွာ ဘုန်းကြီးကျောင်းတွင် ခိုလှုံနေကြောင်း၊ စစ်ဘေးရှောင်များတွင် အသက်ကြီးသူ၊ လူငယ်များလည်း ပါဝင်ကြောင်း ကိုမျိုး က ပြောပြသည်။
“ အခုလောဆယ် နေရာချပေးတဲ့အဆင့်ပဲ ရှိသေးတယ်။ ကျနော်တို့ စစ်ရှောင်တွေ စားဖို့အတွက် နောက်မှ သွားပို့ပါမယ်” ဟု လည်း ကိုမျိုးက ဆိုသည်။
သျှမ်းပြည်နယ် အတွင်း မကြာခဏ တိုက်ပွဲများ ဖြစ်ပွားမှုကြောင့် ဒေသခံများ စားဝတ်နေရေး အတွက် ကောင်းမွန်စွာမလုပ်နိုင်ကြောင်း၊ တိုက်ပွဲများ အမြန်ဆုံး ချုပ်ငြိမ်းကာ ငြိမ်းချမ်းစေချင်သည်ဟုလည်း သျှမ်းပြည် ပြည်သူများက ပြောဆိုကြသည်။
Leave a Comments