သျှမ်းပြည် အရှေ့ ပိုင်း ကျိုင်းတုံမြို့ ကတ်တောင်ကျေးရွာ အုပ်စု ပါစမ်ရွာ တွင် ဖခင်ဖြစ်သူ က သားဖြစ်သူအား ဓားဖြင့် ထိုး မိကာ သားဖြစ်သူသေဆုံးခဲ့ကြောင်း သိရသည်။
ဖေဖော်ဝါရီလ ၂၄ ရက် ည ၈နာရီက စိုင်းအွန်ကျောက် အသက် (၆၃)နှစ် နှင့် ဒေါ်နန်းဟောင်(၆၁)နှစ် တို့လင်မယားသည် အရက်အမူးလွန်သည့် ကိစ္စဖြင့် စကားများရန်ဖြစ်ကြရာ ကြားဝင် ဖြန်ဖြေပေးသည့် သားဖြစ်သူ စိုင်းခမ်းဆိုင် (အသက် ၃၀ နှစ်) အား ဖခင်ဖြစ်သူက ဓားဖြင့် ထိုးမိကြောင်း ကျိုင်းတုံ ဒေသခံ စိုင်းခမ်းဆိုင် ၏ သူငယ်ချင်း တဦးက သျှမ်းသံတော်ဆင့်အားပြောသည်။
“ သူ့အဖေ ( ဦးအွန်ကျောက် ) အရက် အမူးလွန်တော့ သူ့အမေ( ဒေါ် နန်းဟောင်) နဲ့ ရန်ဖြစ်စကားများကြတယ်။ အစကတော့ သမီးနဲ့ သမက် က ကြားဝင်ဖြန်ဖြေသေးတယ်။ မနိုင်လို့ စိုင်းခမ်းဆိုင်ကို ဖုန်းဆက် ခေါ်လိုက်တာ” ဟု ၎င်း သူငယ်ချင်းက ဆိုသည်။
မိဘ ၂ ပါးကို ရန်မဖြစ်ရန် စိုင်းခမ်းဆိုင်မှ တားမြစ်ခဲ့သော်လည်း အရက်မူးသည့် ဖခင် က ၎င်း ကိုင်ထားသည့် အရိုးအသွား ၈ လက်မ အရှည်ရှိ ဓားဖြင့် စိုင်းခမ်းဆိုင် ဝမ်းဗိုက်တွင် ၂ ချက် ထိုးသွင်းခဲ့ကြောင်း သိရသည်။
“ ဓားဒဏ်ရာ ၂ ချက် ရတယ်။ ကျိုင်းတုံ ဆေးရုံကို ပို့တဲ့လမ်းမှာပဲ ဆုံးသွားတယ်” ဟု စိုင်းခမ်းဆိုင် ၏ သူငယ်ချင်း က ဆိုပြန်သည်။
လက်ရှိမှာတော့ သားဖြစ်သူ (စိုင်းခမ်းဆိုင်) သေဆုံးသည့် ကိစ္စနှင့်ပတ်သက်ပြီး မိခင်ဖြစ်သူ ဒေါ်နန်းဟောင် က ကျိုင်းတုံမြို့မ ရဲစခန်းတွင် ရာဇာသတ်ကြီး ဥပဒေ ပုဒ်မ ၃၀၂ ဖြင့် ဦးအွန်ကျောက် ကို အမှုဖွင့်အရေးယူထားသည်ဟုသိရပါသည်။
