သျှမ်းပြည်အရှေ့ပိုင်း ကျိုင်းတုံမြို့နယ်အတွင်းတွင် အမှိုက်ခွန် ဈေးနှုန်း အဆမတန် တိုးမြှင့်လာသည့် အတွက် ဒေသခံပြည်သူများ အခက်တွေ့နေကြောင်း သတင်းသိရသည်။

ကျိုင်းတုံမြို့နယ် စည်ပင်သာယာရေး ကော်မတီမှ လုပ်ပိုင်ခွင့်ပေးထားသည့် စိန်ရေကန် အမှိုက်သိမ်း ကုမ္ပဏီသည် ပြည်သူများထံ အမှိုက်ခွန်စျေးနှုန်းများကို ယခု အောက်တိုဘာလ အတွင်းမှ စတင်ကာ တစ်အိမ်လျှင် ကျပ် ၅,၀၀၀ အထိ ကောက်ခံနေကြောင်း ဒေသခံများက ပြောသည်။

“လွန်ခဲ့တဲ့ ၂ နှစ် ၃ နှစ်ကတည်းက ကျမတို့က ၂,၀၀၀ ကျပ်ပဲ ပေးဆောင်ခဲ့ရတာ၊ အခုက ဆို ၅,၀၀၀ ကျပ်တဲ့ အိမ်ကြီး အိမ်ကောင်းနဲ့ အိမ်ဆိုင်နဲ့ ဆို ၁၀,၀၀၀ ကျပ်အထိ တောင်းတာလည်း ရှိတယ်၊ ဒီလိုမျိုး ဈေးနှုန်း တွေ မတရား တက်သွားတော့ ကျမတို့က မဆောင်နိုင်ဘူးလေ” ဟု ကျိုင်းတုံမြို့မ ဈေးထဲမှ အမျိုးသမီး တစ်ဦးက သျှမ်းသံတော်ဆင့်ကို ပြောသည်။

စိန်ရေကန် အမှိုက်သိမ်း ကုမ္ပဏီသည် ကျိုင်းတုံမြို့ စည်ပင်သာယာရေး ကော်မတီ ခွင့်ပြုချက်အရ အမှိုက်များကို ပြီးခဲ့သည့် NLD အစိုးရလက်ထက် ကတည်းက တာဝန်ယူ သိမ်းဆည်းခဲ့ပြီး လက်ရှိ စစ်အာဏာသိမ်းချိန်မှ အမှိုက်ခွန်ဈေးနှုန်းကို တိုးမြှင့် ကောက်ခံခြင်း ဖြစ်ကြောင်း ဒေသခံများက ပြောသည်။

ထို့အပြင် အမှိုက်ကောက်သည့် ဝန်ဆောင်မှု တိုးမြှင့်ကောက်ခံသော်လည်း သိမ်းဆည်းသည့် အမှိုက်များသည် မီးဖိုချောင်သုံး အမှိုက်များသာ လက်ခံကြောင်း ဒေသခံများက ဆက်ပြောသည်။

“ဈေးနှုန်းက မြှင့်လာပေမယ့် သူတို့က မီးဖိုချောင်သုံးအမှိုက်ပဲ လက်ခံတာ။ သစ်ကိုင်း၊ သစ်ရွက်တွေ၊ ဆောက်လုပ်ရေးသုံးအမှိုက်တွေဆို သူတို့က လက်မခံတော့ ကိုယ့်အစီအစဉ်နဲ့ကိုယ် ပစ်နေရတယ်” ဟုလည်း အထက်ပါ ပုဂ္ဂိုလ် က ဆက်ပြောသည်။

ယင်းကဲ့သို့ အမှိုက်ကောက် ဈေးနှုန်းများ မြှင့်တက်လာမှုကြောင့် တချို့သော ပြည်သူများသည် မပေးဆောင်နိုင်သဖြင့် ကိုယ့်အစီအစဥ်နှင့် ကို အမှိုက်များကို သိမ်းဆည်းရကြောင်း သိရသည်။