သျှမ်းပြည်အရှေ့ပိုင်း ကျိုင်းတုံမြို့တွင် ကျေးလက်ဒေသဖွံ့ဖြိုးတိုးတက်ရေးဦးစီး ဌာနမှ တပ်ဆင်ထားသည့် လျှပ်စစ်ပစ္စည်းများသည် ခိုးယူခြင်းခံရကြောင်း သတင်း သိရသည်။
ပြီးခဲ့သည့် နိုဝင်ဘာလ ၂၇ ရက် ယန်းလောကျေးရွာအုပ်စု၊ နမ့်ခင်ချောင်းအနီးရှိ ကျေးလက်ဒေသ ဖွံ့ဖြိုး တိုးတက်ရေး ဦးစီးဌာန (ကျိုင်းတုံ)မှ ဆိုလာရေတင် စနစ် ဆောင်ရွက်သည့် ပစ္စည်းများ ခိုးယူခြင်းခံရကြောင်း ဌာနမှ တာဝန်ရှိသူ တစ်ဦးက သျှမ်းသံတော်ဆင့်ကို ပြောသည်။
“ခိုးယူခံရတဲ့ ပစ္စည်းတွေရဲ့ ကာလတန်ဖိုးငွေက ၁၄ သိန်းကျော် ရှိတယ်၊ ဘယ်သူက ဘယ်အချိန်မှာ လာခိုးသွားမှန်း မသိဘူး၊ ပြည်နယ်အစိုးရ ရံပုံငွေ နဲ့ တပ်ဆင်ထားတဲ့ ပစ္စည်းတွေဆိုတော့ ရဲစခန်းမှာ အမှုဖွင့် ထားတယ်” ဟု တာဝန်ရှိသူက သျှမ်းသံတော်ဆင့်ကို ပြောသည်။
ခိုးယူခံရသော ပစ္စည်းများသည် ပြည်နယ်အစိုးရ ရံပုံငွေဖြင့် ဆောင်ရွက်ထားသည့် ရေတင်မော်တာ ၂ လုံး၊ 10 MM 2 DC ကေဘယ် အမျိုးအစားမီးကြိုး အရှည်ပေ (၆၀)၊ 6MM2DC ကေဘယ် အမျိုးအစား မီးကြိုးအရှည် ပေ (၄၀၀)၊ DC BREAKER နှင့် ဆိုလာအင်ဗာတာ ၁ လုံး၊ စုစုပေါင်းတန်ဖိုးငွေ ၁၄ သိန်းကျပ်ခန့် ရှိကြောင်း သိရသည်။
ယင်းကဲ့သို့ ပစ္စည်းခိုးယူခံရခြင်း နှင့် ပတ်သက်ပြီး တာဝန်ရှိသူများက ကျိုင်းတုံမြို့မရဲစခန်းတွင် (ပ) ၄၃၀/ ၂၀၂၂၊ ပြည်သူပိုင် ပစ္စည်း ကာကွယ်ရေး ဥပဒေပုဒ်မ ၆(၁)ဖြင့် အမှုဖွင့်ထားကြောင်း သတင်း ရရှိသည်။
အာဏာသိမ်းပြီး နောက်ပိုင်း ကျိုင်းတုံမြို့တွင် တရားဥပဒေ စိုးမိုးမှု ကင်းမဲ့လာပြီး ဒေသခံပြည်သူများ၏ နေ့စဥ်ဘဝသည် လုံခြုံမှု မရှိကြောင်း ဒေသခံများက ပြောဆိုကြသည်။
“နောင်တုံဘက် လူနေရပ်ကွက်ဘက်မှာဆိုလည်း ဆိုင်ကယ်တွေ ၊ ရေမြောင်းအဖုံးတွေ၊ လျှပ်စစ်မီးကြိုးတွေ ပျောက်ဆုံးတာတွေလည်း အများကြီးရှိနေတယ်၊ ဒါပေမဲ့ ပြည်သူတွေက သူတို့ဆိုင်ကယ်တွေ လိုင်စင် မရှိရင် လာမတိုင်ကြဘူး၊ တချို့လည်း အလုပ်မရှုပ်ချင်ကြလို့ထင်တယ်၊ သူခိုးတွေတော့ နေ့စဥ်နီးပါး သောင်းကျန်း နေတယ်” ဟု အထက်ပါ တာဝန်ရှိသူက သျှမ်းသံတော်ဆင့်ကို ဆက်ပြောသည်။
ယင်းကဲ့သို့ ပြည်သူများ၏ ဆိုင်ကယ်ပျောက်ဆုံးမှုကို ရဲစခန်းသို့ တိုင်ကြားသော်လည်း ပျောက်ဆုံးသည့် ဆိုင်ကယ်များကို ဖော်ထုတ်ပေးနိုင်ခြင်း မရှိသည့်အတွက် ကျိုင်းတုံမြို့မ ရဲစခန်းကို ဒေသခံများက ဝေဖန် ပြောဆို နေကြောင်း ကျိုင်းတုံဒေသခံက ပြောသည်။
