Saturday, December 3, 2022

တိုက်ပွဲကြောင့် လက်နက်ကြီးရွာထဲကျ တပတ်ကျော်အကြာ သိမ်းနိုင်မှ စစ်ရှောင်များနေရပ်ပြန်ရဲ

Must read

သျှမ်းပြည်မြောက်ပိုင်း ကျောက်မဲမြို့နယ်အတွင်း ဖြစ်ပွါးသောတိုက်ပွဲမှ ရွာတွင်းကျသည့် မပေါက်ကွဲသည့် လက်နက်ကြီး တလုံးအား တပတ်ကျော်အကြာတွင် သိမ်းယူနိုင်မှသာ စစ်ရှောင်ရွာသားများ ရွာပြန်ရဲကြကြောင်း သိရသည်။


ဖေဖော်ဝါရီလ ၁၅ ရက်နေ့ကတည်းက ကျောက်မဲမြို့နယ်အတွင်း ဖြစ်ပွါးသော RCSS နှင့် SSPP ကြားဖြစ်ပွါး သော တိုက်ပွဲကြောင့် နမ့်ပျဉ်ကျေးရွာနှင့် ပန်လော့ကျေးရွာသား ရ၀၀ ခန့်မှာ ပန်လော့အုပ်စု ဘုန်းကြီးကျောင်း သို့ ထွက်ပြေး ခိုလှုံခဲ့ကြရာ နမ့်ပျဉ်ရွာအတွင်း စေတီဘုရားတွင်ကျသော လက်နက်ကြီး မပေါက်ကွဲသည့်အပြင် မည်သည့်အဖွဲ့မှလည်း သိမ်းပေးခြင်းမရှိသဖြင့့် ရွာသားများ ရွာမပြန်ရဲကြခြင်းဖြစ်ကြောင်း စစ်ဘေးရှောင်ရွာ သားတဦးက ပြောသည်။

“လက်နက်ကြီးကျည်က ဘာအမျိုးအစားလဲ ကျနော်တို့မခေါ်တတ်ဘူး။ နမ့်ပျဉ်ရွာက စေတီနားမှာ ကျပြီးစိုက်ထား တယ်။ အဲ့နားတဝိုက်မှာလည်း ကျည်ခွံတွေကျထားတာ အများကြီး။ အဲတာ တပတ်လောက်ကြာ လည်းမကွဲ၊ ဘယ်သူမှလည်းလာမသိမ်း တော့ ကျနော်တို့ရွာသားတွေက အစိုးရတပ်က စစ်သား ၃၀ လောက် အကူအညီနဲ့ သွားသိမ်းတာ။ လက်နက်ကြီးက မကွဲတော့ အဲ့စေတီနဲ့ ၁၀ လံကျော်အကွာမှာ ကျင်းတူးပြီး မြှုပ်ထားလိုက်တယ် ။” – ဟု နမ့်ပျဉ်ရွာသား လုံးစိုင်းခမ်း က သျှမ်းသံတော်ဆင့် အားပြောသည်။

ဖေဖော်ဝါရီလ ၁၉ ရက်က လက်နက်ကြီးအား စေတီဘုရားမှသိမ်းယူကာသွားရောက် မြှုပ်နှံထားသော နေရာ တွင် မြေအိတ် အလုံး ၂၀ ခန့်ဖြင့်လည်း ကာထားကြောင်း ရွာသားများကပြောသည်။

စေတီဘုရားများအား လက်နက်ထိမှန်ခြင်းသည် နိမိတ်မကောင်းကြောင်းထို့အတွက် တိုက်ပွဲများအမြန်ရပ်ဆိုင်း စေလိုကြောင်း နမ့်ပျဉ်ဒေသခံများကပြောသည်။

“ခုတော့အခြေအနေက ငြိမ်သက်သွားပြီဖြစ်လို့ ကျနော်တို့ မနေ့က ရွာပြန်ခဲ့ကြပါပြီ။ ဆိုပေမယ့်လည်း ဘယ်ချိန် သေနတ်သံထပ်ထွက်မလဲဆိုတဲ့ စိုးရိမ်စိတ်တော့အမြဲရှိနေသေးတယ် ” – ဟု ရွာသား တဦးကလည်း ပြောသည်။

ကျောက်မဲမြို့တွင် ဖေဖော်ဝါရီလ ၂ ရက်နေ့ကတည်းက RCSS နှင့် SSPP တို့ ပစ်ခတ်မှုပြန်လည်ဖြစ်ပွါးလာပြီး လက်ရှိတွင် တိုက်ပွဲမှာ သျှမ်းတောင်နှင့် သျှမ်းမြောက်အစပ်တို့တွင်ဖြစ်ပွါးနေကြောင်းသိရပါသည်။

နမ္မတူ ၊ ကျောက်မဲ၊ သီပေါ မြို့နယ်များအတွင်းဖြစ်ပွါးသော တိုက်ပွဲကြောင့် နေရပ်မှစွန့်ခွါခဲ့ရသော စစ်ဘေး ရှောင်ဒေသခံထောင်နှင့်ချီရှိနေပါသည်။

Leave a Comments

- Advertisement -spot_img

Latest article