RCSS နှင့် SSPP ကြား နယ်မြေအငြင်းပွားမှု၊ စစ်ရေးပဋိပက္ခ ဖြစ်ပွားမှုတွေကြောင့် သျှမ်းပြည်မြောက်ပိုင်းသီပေါမြို့ တောင်ဘက် ရှိကျေးရွာတရွာမှ ကျေးရွာသူကြီးတဦး မိုင်းနင်းမိသေဆုံးပြီး နောက်လိုက်ရွာသား နှစ်ဦး ထိခိုက်ဒဏ်ရာရကာ လားရှိုးဆေးရုံသို့ ပို့ဆောင်ကုသရသည်ဟု သတင်းရရှိသည်။
ဖေဖော်ဝါရီလ ၁၆ ရက်နေ့ ညပိုင်းက သီပေါမြို့နယ် နောင်ကော်အုပ်စု နမ့်မော်လုံရွာနေ ရွာသူကြီး နှင့်အဖွဲ့ ၄င်းတို့ရွာနှင့် အရှေ့တောင်ဘက်အရပ်ရှိ နမ့်မော်ဆွန့် ရွာအသွားလမ်းတွင် မိုင်းနင်းမိ ပေါက်ကွဲရာ ရွာသူကြီး (ဦး) လုံးတိက အသက် ၅၀ နှစ် မှာပွဲချင်းပြီးသေဆုံးပြီး ၄င်း နှင့်အတူ လိုက်ပါသည့် ရွာသူကြီးအကူ (စာရေး) လုံးကေတ (အသက် ၄၀ နှစ်) နှင့် စိုင်းဝိဇေယျ (အသက် ၃၅ နှစ်) တို့ ၂ ဦးမှာလည်း ဒဏ်ရာရှိပြီး လားရှိုးဆေးရုံသို့ ပို့ဆောင်ကုသရကြောင်း သတင်းရရှိသည်။
“နမ့်မော်ဆူမ့်ရွာဘက်သွားမယ်ဆိုပြီး သူကြီးကခေါ်လို့ သူကြီးနဲ့လိုက်သွားတာ။ ၀ုန်းကနဲကြားလို့ ကျနော်ထင်တာ ကျနော်တော့သေပြီ ပေါ့။ ဒါမယ့်မသေဘဲ ဟို ၂ ယောက်ကိုသတိယလို့သွားကြည့်မယ်လို့တော့ ကျနော်ထလို့တောင်မရဘူး။ ခြေထောက်နာတယ်။ လက်တွေမှာလည်းသွေးတွေနဲ့။ သူကြီးမသေခင်လေးမှာ – ငါတို့ကိုလာသေခိုင်းတာ – လို့ တခွန်းပြောတာကြားရတယ်။ ”- ဟု လားရှိုးဆေးရုံရောက် လူနာ လုံးကေတ က သျှမ်းသံတော်ဆင့်အားပြောသည်။
အဆိုပါ ရွာသူကြီးသေဆုံးမှု ၊ ရွာသား ဒဏ်ရာရှိမှု တွင် RCSS က SSPP ၏ လက်ချက်ဟု ၄င်းတို့တပ်ဖွဲ့ပိုင် ၀ဲဆိုဒ်တွင် ထုတ်ပြန်ထားသကဲ့သို့ SSPP ပြောခွင့်ရ ပုဂ္ဂိုလ် ဗိုလ်မှူးဘုန်းဟန်ကလည်း RCSS ထောင်ထားသည့်မိုင်းအား ရွာသားများ နင်းမိရာမှ ပေါက်ကွဲသေဆုံးခြင်းဖြစ်ကြောင်း၊ ၄င်းတို့လက်ချက်မဟုတ်ကြောင်း သျှမ်းသံတော်ဆင့်သို့ပြောသည်။
“ည ၈ နာရီလောက်ကဖြစ်တာ။ သူကြီးအလောင်းကို ညတွင်းချင်း ရွာပြန်သယ်လာ။ မနက်ရောက်မှ သဂြိုဟ်ပေးတာ။ ဒဏ်ရာရတဲ့ ၂ ယောက်ကိုတော့အခု လားရှိုးဆေးရုံကို့ပို့ဆောင်ဆေးကုထားတယ် ။ ”- ဟု သေဆုံးသူ နှင့်အမျိုးတော်စပ်သူ နမ့်မော်လုံရွာသားတဦးက သျှမ်းသံတော်ဆင့်အားပြောသည်။
ဒဏ်ရာရရှိကာ လားရှိုးဆေးရုံတွင်ဆေးကုသမှုခံယူနေသော နမ့်မော်လုံရွာသား ၂ ဦးမှာ မိသားစုဝမ်းရေးအတွက် ဒိုင်ခံရှာဖွေကျွေးမွေးနေသောအိမ်ထောင်ဦးစီးများဖြစ်သဖြင့် လက်ရှိတွင် မိသားစု ရှေ့ရေးအတွက် အခက်အခဲဖြစ်မည်ကို စိုးရိမ်ပူပန်နေကြကြောင်း အူမကြီးအထိ ကျည်စထိမှန်ဒဏ်ရာရသော စိုင်းဝိ က သျှမ်းသံတော်ဆင့်အားပြောသည်။
RCSS/SSA ၏ ပြန်ကြားရေးဖြစ်သော taifreedom ၀က်ပ်ဆိုက်က – ရွာသူကြီးနှင့် အဖွဲ့သည် SSPP/SSA ဆင့်ခေါ်မှုကြောင့် သွားရာမှ SSPP/SSA ထောင်ထားသောမိုင်း ပြန်နင်းမိခြင်း ဖြစ်သည်ဟု ရေးသားဖော်ပြထားသည်။
SSPP/SSA ကမူ မိမိတို့ထောင်ထားသောမိုင်းမဟုတ်ကြောင်း၊ တွန့်ကျိုင်းရွာတိုက်ပွဲကတည်းက RCSS/SSA တို့ထောင်ထားသည့်မိုင်းဖြစ်ကြောင်း၊ ပြောင်းခြံများအတွင်းတွင်လည်း အဆိုပါမိုင်းများ တွေ့ရကြောင်း ပြောသည်။
ပြီးခဲ့သည့် ဒီဇင်ဘာလက သီပေါမြို့နယ် တွန့်ကျိုင်းရွာဘက်တွင် RCSS နှင့် SSPP တို့တိုက်ပွဲဖြစ်ပွါးခဲ့ပြီး ထိုစဉ်ကရွာသား ၃၀၀ ကျော် စစ်ဘေးရှောင်ခဲ့ရသည်။ အဆိုပါတိုက်ပွဲဖြစ်ပွါးပြီးသည့်နောက်ပိုင်း RCSS တပ်များ ဆုတ်ခွါကာအဆိုပါဒေသတွင် SSPP တပ်များအားတခါတလေတွေ့ရကြောင်း ရွာသားများ ပြောပြချက်အရ သိရသည်။
လက်ရှိကျောက်မဲမြို့နယ်အတွင်းတွင်လည်း RCSS နှင့် SSPP တပ်များ စစ်ရေးတင်းမာမှုကြောင့် စစ်ဘေးသင့်နေသည့်ဒေသခံရွာသား ၁၀၀၀ နီးပါးရှိနေပါသည်။
