သျှမ်းပြည်မြောက်ပိုင်း နမ္မတူမြို့နယ် မန်စံအုပ်စုဘက်တွင် မြောက်ပိုင်းမဟာမိတ်တပ်ဖွဲ့နှင့် RCSS/SSA တို့အကြား တိုက်ပွဲကြောင့် ဒေသခံ ၃ ဦး ထိခိုက်ဒဏ်ရာရှိသည့်အပြင် ဘုန်းတော်ကြီးကျောင်းလည်းထိမှန်သည်ဟု သတင်းရရှိသည်။

ဖေဖော်ဝါရီလ ၁၆ ရက် ယနေ့မနက်ပိုင်းက နမ္မတူမြို့နယ်အတွင်း RCSS/SSA နှင့် မြောက်ပိုင်းမဟာမိတ်တပ်ဖွဲ့ ၀င်များဖြစ်ကြသည့် TNLA တပ် နှင့် SSPP တို့တိုက်ပွဲ သုံးကြိမ်ဖြစ်ပွားကြောင်း၊ တိုက်ပွဲကြောင့် စိုင်းလေး၊ စိုင်းမြင့် နှင့် စိုင်းမူးအွန်တို့ ဒေသခံ ၃ ဦး အသီးသီးဒဏ်ရာရှိသည့်အပြင် ဘုန်းကြီးကျောင်း၊ ယောဂီကျောင်းဆောင်များ ကျဉ်ထိမှန်ကြောင်း၊ နှစ်ဘက်တပ်သားများလဲ ထိခိုက်ဒဏ်ရာ ရရှိမှုများကြောင်း ဒေသခံများပြောပြချက်အရသိရသည်။

“နားကျိုင်းရွာဘက်မှာ တပ်ပေါင်းစုက ရှိနေတယ်။ RCSS စစ်ကြောင်းဝင်လာတော့ ပစ်ကြတာပေါ့။ ဘယ်အဖွဲ့ က ပစ်လဲတော့မသိဘူး ရွာသားပီစိုင်းလေးဆိုသူ ခြေထောက်ထိမှန်တယ်။ အခု သူ့ကို မန္တလေးဆေးရုံပို့ထားတယ်၊ စိုင်းမူးအွန်ကတော့ သီပေါ ဆေးရုံကိုပို့ဆောင်ထားတယ် “- ဟု ဒဏ်ရာရရှိသူတဦး၏ မိသားစုဝင်တဦးကပြောသည်။အလားတူ မန်စံရွာတောင်ဘက်ရှိ နားကျိုင်းရွာဘက်တွင်တိုက်ပွဲဖြစ်ပွါးရာ ရွာသား စိုင်းမြင့်မှာလည်း ပါးတွင်လက်နက်ကြီးကျည်စ ထိမှန်ဒဏ်ရာရခဲ့ကြောင်းသိရသည်။

မန်ဟောင်ကျောင်းတွင်တိုက်ပွဲဖြစ်ပွားသောကြောင့် ဘုန်းတော်ကြီးများ၊ ကိုယ်ရင်ငယ်လေးများ၊ ဝေယျာဝစ္စများ ထိပ်လန့်ပြီး စစ်ဘေးစစ်ဒဏ်မှ တိမ်းရှောင်ရကြောင်း၊ စစ်ဘေးရှောင်သူများ ပြောပြချက်အရ သိရသည်။

“မန်စံရွာရဲ့မြောက်ဘက် မန်ဟောင်ကမ္မဌာန်းကျောင်းဘက်မှာလည်း သူတို့ပစ်ကြတယ်လေ။ ညနေပိုင်းမှာပစ်တာ။ ယောဂီကျောင်းဆောင်တွေထိတယ်။ တော်သေးတယ်မနက်ပိုင်းတုန်းကမှ တရားစခန်းပိတ်ရေစက်ချအလှူပြုနေကြတာ။ ခုမန်စံမှာ ရွာသားတော်တော်များများမနေရဲကြတော့ဘူး” – ဟု သျှမ်းသံတော်ဆင့်အားပြောသည်။

မြောက်ပိုင်းမဟာမိတ်တပ်ဖွဲ့နှင့် RCSS တို့သည် ပြီးခဲ့သည့်အပတ်ကတည်းကပင် မန်စံရွာ မြောက်ဘက်ဘက်တွင်တိုက်ပွဲကြောင်း၊ တိုက်ပွဲကြောင့် နားဟုတ်ရွာ၊ နာင်ငင်းရွာ ၊ မန်မိုင်၊ ဆာမ်ခါရွာ နှင့် နားငူးရွာ သူရွာသား ရာဂဏန်း စစ်ဘေးစစ်ဒဏ်သင့်ကာ နေရပ်မှ တိမ်းရှောင်နေရသည်ဟု စစ်ဘေးရှောင်ကူညီသူတဦးကပြောသည်။

၄င်းရွာသားများ အိမ်ထောင်စု ၂၀၀ ခန့်မှာ ပန်ဆပြေဘုန်းကြီးကျောင်း ၊ ပုဗ္ဗါရုံကျောင်း၊ မန်စံရွှေစကားဝါမြောက်ကျောင်း၊ မန်စံကုန်းဖလားကျောင်း၊ မန်စံ တီအားစီဘော်တာဆောင်၊ မိုင်းမုကျေးရွာဘုန်းကြီးကျောင်းတို့တွင် စစ်ဘေးရှောင်နေကြကြောင်း သိရသည်။

ကျောက်မဲမြို့နယ်ဘက်တွင်လည်း အဆိုပါတပ်များ တိုက်ပွဲဖြစ်ပွားသောကြောင့်ဒေသခံ ရ၀၀ ထက်မနည်း စစ်ဘေးရှောင်နေရသည်။