သျှမ်းပြည် မြောက်ပိုင်း ကျောက်မဲမြို့နယ် နမ့်ပျဉ်း ကျေးရွာ နှင့် ပန်လော့ ကျေးရွာ တွင် တိုင်းရင်းသား လက်နက်ကိုင် အချင်းချင်းတိုက်ပွဲဖြစ်ပွားမှုကြောင့် စေတီပုထိုးများ လက်နက်ကြီး ထိမှန်ခဲ့ကြောင်းသတင်းရရှိသည်။
ကျောက်မဲမြို့နယ်တွင် မြောက်ပိုင်းမဟာမိတ်တပ်ဖွဲ့ဝင် SSPP နှင့် RCSS တို့ကြား ဖေဖော်ဝါရီ ၂ ရက်နေ့မှ စတင်ကာ တိုက်ပွဲများ ဖြစ်ပွားခဲ့သည်။
“ သျှမ်းလက်နက်ကိုင် ၂ ဖွဲ့ တိုက်ပွဲ ဖြစ်တာ တပတ်လောက်ရှိပြီ။ တိုက်ပွဲက ရွာနဲ့ နီးတယ်။ အသံတွေကြားရတယ်။ မနေ့က ကျနော် ရွာခဏပြန်ချိန် လက်နက်ကြီးတွေ စေတီပုထိုးတွေ ထိမှန်တာ တွေ့ရလို့ ဓာတ်ပုံရိုက်လာတာပါ” ဟု စစ်ဘေးရှောင် နမ့်ပျဉ်းကျးရွာ ဒေသခံ စိုင်းသျှမ်းက ပြောသည်။
တိုက်ပွဲကြောင့် စေတီပုထိုးများ ပျက်စီးခြင်းသည် မကောင်းကြောင်း၊ သျှမ်းလက်နက်ကိုင် အချင်းချင်းဖြစ်ပွားသည် တိုက်ပွဲများလည်း ရပ်ဆိုင်းစေခြင်းကြောင်း လည်း စိုင်းသျှမ်းက ပြောသည်။
“ တိုက်ပွဲတွေက ရွာနဲ့ဝေးရင် သိပ်ပြသနာမဖြစ်ဘူး။ ရွာနားနဲ့နီးရင် ပြည်သူတွေ ဒုက္ခရောက်တယ်။ နောက် လက်နက်ကြီးတွေ ကျည်တွေ လူထိ မမှန်ဖို့ ဆုတောင်းပြီး ထွက်ပြေးလာရတယ်” ဟု ၎င်းက ထပ်လောင်းပြောသည်။
အဆိုပါ တိုက်ပွဲကြောင့် နမ့်ပျဉ်းကျေးရွာနှင့် တာလော့ကျေးရွာ ဒေသခံ ရ၀၀ သည် ကျောက်မဲမြို့ ပေါ်ရှိ အောင်ဆုပန်ဘုန်းကြီးကျောင်းနှင့် ဓမ္မမေဒနီရွှေကျင် ဘုန်းကြီးကျောင်းတွင် ခိုလှုံနေရသည်။
ထို့အပြင် သျှမ်းပြည် မြောက်ပိုင်းတွင် ဖေဖော်ဝါရီ ၁၂ရက် (ပြည်ထောင်စုနေ့)တွင် နမ္မတူမြို့နယ် အတွင်း (RCSS/SSA) နှင့် မြောက်ပိုင်းမဟာမိတ် တပ်ဖွဲ့ဝင်များနှင့် တိုက်ပွဲ ဖြစ်ပွားခဲ့ကြောင်း သိရသည်။
Leave a Comments