နေပြည်တော်တွင်ကျင်းပမည့် ၇၂ နှစ်မြောက် ပြည်ထောင်စုနေ့အခမ်းအနားသို့ RCSS/SSA မှ ကိုယ်စားလှယ် တက်ရောက်မည်ဖြစ်ကြောင်းသိရသည်။

RCSS/SSA အတွင်းရေးမှူး ၂ ဗိုလ်မှူးကြီးစိုင်းငင်း က – ” အစိုးရကနေ အပစ်ရပ် EAO  ၁၀ ဖွဲ့ ကို ဖိတ်လာတယ်။ အရင်နှစ်တွေအတိုင်းဘဲ။ တဖွဲ့ချင်းစီဆီကိုဖိတ်တာပါ။ PPST ကိုမဟုတ်ပါဘူး။ အပစ်ရပ်အဖွဲ့ရော မရပ်သေးတဲ့အဖွဲ့တွေကိုရော အကုန်ဖိတ်ပါတယ်။ ထူးခြားတာတော့မရှိပါဘူး။ RCSS/SSA အနေတော့ အရာရှိကိုယ်စားလှယ်တဦး ကနေ ပြည်ထောင်စုနေ့ညစာစားပွဲကို တာဝန်ယူတက်ရောက်ပါမယ် “ – ဟု သျှမ်းသံတော်ဆင့်အားပြောသည်။

၇၂ နှစ်မြောက်ပြည်ထောင်စုနေ့အခမ်းအနားသို့ တိုင်းရင်းသားလက်နက်ကိုင်တပ်ဖွဲ့များ ၊ နိုင်ငံရေးပါတီများ ၊ သံရုံး၊ စစ်တပ်နှင့်အစိုးရဌာနဆိုင်ရာ များအား အစိုးရအဖွဲ့က ဖိတ်ကြားကြောင်းသိရသည်။

သို့သော် အပစ်ရပ် EAO  ၁၀ ဖွဲ့တွင် ချင်းအမျိုးသားတပ်ဦး CNF မှာ လုပ်ငန်းတိုက်ဆိုင်မှုကြောင့် တက်ရောက်နိုင်မည်မဟုတ်ကြောင်း ပြောပါသည်။

ပြည်ထောင်စုနေ့အပြီး ဖေဖော်ဝါရီလ ၁၃ ရက်နေ့တွင်မူ EAO  ကိုယ်စားလှယ်များနှင့် အစိုးရတို့တွေ့ဆုံမည်ဖြစ်ကြောင်း ငြိမ်းချမ်းရေးလုပ်ငန်းစဉ်နှင့်ပတ်သက်ပြီး ဆွေးနွေးသွားမည်ဖြစ်ကြောင်းလည်း သိရပါသည်။