သျှမ်းပြည်မြောက်ပိုင်း သီပေါမြို့နယ်အတွင်း စစ်ရေးတင်းမာမှု၊ တိုက်ပွဲများကြောင့် စစ်ရှောင်နေရသော ကျောင်းနေအရွယ်ကလေးများမှာ စာမေးပွဲဖြေဆိုနိုင်ရန် အခက်ကြုံနေရကြောင်းသိရသည်။

“ စာမေးပွဲဖြေဖို့ စစ်ရှောင်ကလေး က ၁၃၀ လောက်ရှိတယ်။ ပညာရေးဌာန ကတော့ သူတို့ စာမေးပွဲ ဖြေဆိုခွင့်ရအောင် ဘုန်းကြီးကျောင်းမှာပြင်ဆင်ပေးမယ်တဲ့။ ဒါပေမယ့် မိဘက လယ်၊ ယာပြန်ကြည့်ရင် သူတို့ လိုက်ပြန်၊ ပြန်လာရင်လိုက်လာ၊ သွားသွားလာလာ လုပ်နေတော့ ကျောင်းစာသေခြာ မသင်ရဘူးလေ။ သူတို့ စာမေးပွဲဖြေနိုင်ဖို့ အခက်တွေ့နိုင်တယ်” – စစ်ရှောင်များအားကူညီရေးကော်မတီဝင်တဦးကပြောသည်။

ဘုန်းကြီးကျောင်းရောက် စစ်ရှောင်ကလေးများမှာသီပေါမြို့နယ် တောင်ဘက်ခြမ်းရှိ ၀မ့်ဟုမ်ရွာ၊ ဟိုနားရွာ၊ တွန်ကျိုင်းရွာ၊ နိုင်းလုံရွာနှင့် တာလုံ ၅ ရွာမှ ရွာသားများဖြစ်ကြပြီး မူလတန်းအဆင့်ကလေးများ သာဖြစ်ကြောင်းသိရသည်။

“နားမခေါ်ရွာစာသင်ကျောင်းမှာက ကလေး ၂၀၀ ကျော်ရှိပြီ ။ နေရာအဆင်မပြေတော့ ဒီစစ်ရှောင်ကလေးတွေက ဘုန်းကြီးကျောင်းမှာဘဲ ဖြေရမှာ။ သူငယ်တန်းကနေ ၄ တန်းအထိ ရှိကြပါတယ်။ ဖေဖေါ်ဝါရီ လလယ်ပိုင်းလောက် ဖြေ ရမယ်” – ဟု စစ်ရှောင်များအားကူညီရေးကော်မတီဝင်တဦးကပြောသည်။

အဆိုပါစစ်ရှောင်ကလေးများအတွက် စေတနာရှင်များက လာရောက်ကူညီထောက်ပ့ံမှုပေးနေကြောင်းနှင့် အခက်အခဲတော့သိပ်မရှိလှကြောင်း စစ်ရှောင်ကူညီရေးကော်မတီက ပြောသည်။

လက်ရှိ အဆိုပါဒေသတွင် စစ်ရေးတင်းမာမှုများ လျော့သွားပြီဟုဆိုသော်လည်း နားမခေါ်ဘုန်းကြီးကျောင်းတွင် စစ်ရှောင်များ နေရပ်အကုန်မပြန်ရဲကြသေးကြောင်း ၊ သို့သော် နေရပ်ပြန် လယ်ယာသီးနှံများ ကြည့်ရှုနေသူများ ရှိနေ ကြောင်း ၊ထို့အတွက်စစ်ရှောင်ဦးရေမှာလည်း ၅၀၀ ပတ်ဝန်းကျင်တွင် ရှိနေကြောင်း သိရပါသည်။