သျှမ်းပြည် အရှေ့ပိုင်း တာချီလိတ်မြို့ အာခါစျေး မီးပွိုင့်တွင် အသက် ၅၀ ကျော် အမျိုးသားတဦး သေနတ်ပစ်ခတ်ခံရပြီး သေဆုံးခဲ့ကြောင်း သတင်းရရှိသည်။
သေနတ်ပစ်ခံရ သူသည် လက်နက်ချ ခွန်ဆာ၏အဖွဲ့ဝင်တဦးဖြစ်ပြီး လက်ရှိ နာမည်ကျော် သူဌေး ဦးအားဖာ (တပင်ရွှေထီးစက်သုံးဆီပန့်ပိုင်ရှင်)ဖြစ်ကြောင်းသိရသည်။
ဇန်နဝါရီလ ၂၉ ရက် ယနေ့ နေ့လည် ၁ နာရီခွဲကျော်က ဦးအားဖာသည် အားခါစျေး မီးပွိုင့် တွင် မီးနီမိနေစဉ် အမည်မသိ လက်နက်ကိုင် ဆိုင်ကယ်သမား ၂ ဦးက အနီးကပ် ဦးခေါင်းတွင် သေနတ် ၅ ချက်ပစ်ခတ်ခဲခြင်းဖြစ်ကြောင်း အားခါစျေး အနီး နေထိုင်သည့် မျက်မြင်သက်သေ တဦးဖြစ်သည့် စိုင်းဆိန်း က ပြောသည်။
“ ဦးအားဖာ(တပင်ရွှေထီး) မီးပွိုင့်မိလို့ ကားရပ်နေချိန်၊ လူ ၂ယောက် ဆိုင်ကယ်မောင်းလာပြီး ဦးအားဖာ ကို သေနတ်ပစ်သွားတာ။ ဦးခေါင်းကို ၅ချက် ထိသွားတယ်။ ပွဲချင်းပြီး သေဆုံးသွားတယ်” ဟု ၄င်းက ဆိုသည်။
သေနတ်ပစ်ခံရသည့် တရားခံ၂ဦး သည် ဦးအားဖာ ကို သေနတ်ပစ်ပြီး မြို့တွင်းဘက်သို့ ဆိုင်ကယ်မောင်းပြေးသွားကြောင်း၊ လက်ရှိအချိန်ထိ တရားခံကို ဖမ်းဆီးရခြင်းမရှိသေးကြောင်း သိရသည်။
ဆက်လက်ပြီး တာချီလိတ် ဒေသခံတဦး က “ အခုက လူများတဲ့နေရာ လူရှိတဲ့နေရာတောင် သေနတ်နဲ့ ပစ်တာကတော့ ကြောက်ဖို့ကောင်းတယ်။ တာချီလိတ်မှာက ဒီလို ဖြစ်ရပ်တွေ မကြာခဏဖြစ်တယ်။ နေ့ခင်းကြောင်တောင် လူများတဲ့နေရာမှာဖြစ်တော့ လုံခြုံရေး က စိုးရိမ်ရတယ်” ဟု ဆိုသည်။
တာချီလိတ်သည် ထိုင်းနိုင်ငံနယ်စပ် မြို့ ဖြစ်သည့်အလျောက် မကြာခဏ သေနတ်ပစ်ခတ်မှုများ၊ လုယက်မှုများ၊ ဖြစ်ပွားသလို မူးယစ်ဆေးဝါး ရောင်းဝယ်ဖောက်ကားသည့် နေရာတခုလည်း ဖြစ်သည်။
နာမည်ကျော် သူဌေး ကြီး ဦးအားဖာ မည်သည့်ကိစ္စကြောင့် အမည်မသိ လက်နက်ကိုင် ၂ဦး က သေနတ်ပစ်ခတ်သည် ကို စုံစမ်းနေဆဲ ဖြစ်ကြောင်းသိရသည်။
အဆိုပါ ကိစ္စ နှင့် ပတ်သတ်ပြီး တာချီလိတ် မြို့ မရဲစခန်းကို ဆက်သွယ်မေးမြန်းသည့်အခါ ပြန်လည်ဖြေကြားခြငး်မရှိပေ။