Thursday, December 1, 2022

တရုတ်နယ်စပ် မူစယ်တွင် တလလျှင် ပိုင်ရှင်မဲ့ မူးယစ်ဆေးသုံးပြီး သေဆုံးသူ ၅ ဦးရှိ

Must read

သျှမ်းပြည် မူစယ်မြို့ နယ်တွင် ပိုင်ရှင်မဲ့ မူးယစ်ဆေးဝါး သုံးစွဲပြီး သေဆုံးသူ တလ လျှင် ၅ ဦး ခန့်ရှိသည် သတင်းရရှိသည်။

Photo by မူဆယ်ဒေသခံ ၊မူဆယ်တွင်မူးယစ်ဆေးစွဲသူများအား လမ်းဘေးတွင်တွေ့ရစဉ်

“ မူစယ်မြို့မှာ မူးယစ်ဆေးဝါးသုံးစွဲပြီး သေဆုံးသူတလ ၅ ဦး ရှိသလို ဆေးရုံမှာလည်း ပိုင်ရှင်ရှိ မူးယစ်ဆေးဝါးကြောင့် သေဆုံးသူတလ ရ ဦး အနည်းဆုံးရှိတယ်” ဟု မူစယ်မြို့ ဂရုဏာ လူမှုကူညီရေး အသင်းမှ ဦးသောင်းထွန်း ကပြောပြသည်။

မူစယ်မြို့တွင် မူးယစ်ဆေးဝါးသုံးစွဲသူများ တနေ့ထက် တနေ့ များပြားလာကြောင်း၊ သက်ဆိုင်ရာ မှ မူးယစ်ဆေးဝါး နှင့် ပတ်သတ်ပြီး သေချာ ကိုင်တွယ်သင့်ကြောင်း လည်း ဦးသောင်းထွန်း က ဆိုသည်။

ယခုနောက်ပိုင်း မူးယစ်ဆေးဝါးသုံးစွဲမှုသည် များပြားလာပြီး၊ သုံးစွဲသည့်သူများတွင် ဆယ်ကျော်သက် ကျောင်းသား များ ပါဝင်နေကြောင်း၊သုံးစွဲပြီးသည့် ဆေးထိုးအပ်များကိုလည်း အများပြည်သူသွားလာသည့်နေရာများတွင် လွှင့်ပစ်ထားခဲ့ကြောင်း လည်း မူဆယ်မြို့ ဒေသခံများက ပြောဆိုကြသည်။

မူစယ်မြို့ ရွှေသမင် ဘုန်းကြီးကျောင်း အနီးရှိ ပွဲကျင်းပသည့်နေရာတွင် မူးယစ်ဆေးဝါးသုံးစွဲပြီးသည့် ဆေးထိုးအပ် များစွာ လွှင့်ပစ်သဖြင့် လမ်းသွားလမ်းလာပြည်သူများအတွက် အန္တရာယ်ဖြစ်နိုင်ကြောင်းလည်း မူစယ် တောင်ရပ်ကွက် (ပေါက်စန်း) ဒေသခံ အမျိုးသားတဦးက ပြောသည်။

“ ဆေးထိုးအပ်တွေ နောက် မူးယစ်ဆေးဝါး ရှူတဲ့နေရာမှာ အသုံးပြုတဲ့ ခဲပြားတွေ လူမြင်မကောင်းဘူး။ မူးယစ်ဆေးဝါး သုံးစွဲတဲ့သူတွေကလည်း အဲ့နေရာမှာ အိပ်နေကြတယ်။ သက်ဆိုင်ရာကလည်း လာရောက်ပြီး ရှင်းလင်းတာ မရှိဘူး” ဟု အဆိုပါ အမျိုးသား က ပြောသည်။

Photo by မူဆယ်ဒေသခံ ၊မူဆယ်တွင်မူးယစ်ဆေးစွဲသူများအား လမ်းဘေးတွင်တွေ့ရစဉ်

မူစယ် မြို့သည် တရုတ်နယ်စပ် တခုဖြစ်ပြီး မူးယစ်ဆေးဝါး ရောင်းဝယ်မှု မှာ တားဆီးဖို့ ခက်ခဲသည့် နေရာတခုဖြစ်သလို မူးယစ်ဆေးဝါး ရောင်းဝယ်သည့် သူများကို လည်း သက်ဆိုင်ရာမှ နှိမ်နင်းမှု အားနည်းနေသည် ဟု မူစယ်ဒေသခံများက ပြောဆိုကြသည်။

ဆက်လက်ပြီး ဒေသခံ စိုင်းခမ်း က “ တနှစ်ထက် တနှစ် သုံးစွဲသူတွေ များလာတယ်။ ကျောင်းသားတွေ လည်း တွေ့လာတယ်။ နောက် မူးယစ်ဆေး နောက်ဆက်တွဲ ခိုး၊ လုယက်မှုတွေ လည်း ပေါလာတယ်။ ဒီတိုင်းဆက်သွားရင်တော့ ကလေးတွေရဲ့ အနာဂတ်တော့ မတွေးဝံ့ဘူး” ဟု ပြောသည်။

မူးယစ်ဆေးဝါး ရောင်းဝယ်ဖောက်ကားသူများသည် လက်နက်များရှိနေသည့်အတွက် မည်သည့် ပုဂ္ဂိုလ် သည် မူးယစ်ဆေးဝါးရောင်းနေသည်ကို သိရှိသော်လည်း သက်ဆိုင်ရာသို့မတိုင်ကြားဝံ့ကြောင်း သျှမ်းပြည်နယ် ပြည်သူများက ပြောကြားသည်။

လက်ရှိမှာ မူးယစ်ဆေးဝါး ရောင်းဝယ်ဖောက်ကားသည့် ပုဂ္ဂိုလ်များကို ဖမ်းဆီးမိခြင်းမရှိဘဲ မူးယစ်ဆေး ကို သယ်ဆောင်လာသူများနှင့် သုံးစွဲသူများသာ ဖမ်းဆီးနေခြင်းသည် မူးယစ်ဆေးဝါး ပပျောက်ဖို့ အဖြေမဟုတ်ကြောင်းလည်း ပြည်သူများက ပြောဆိုနေကြသည်။

Leave a Comments

- Advertisement -spot_img

Latest article