ကချင်ပြည်နယ်ကို “ သီးခြားလွတ်လပ်သော ကချင်နိုင်ငံတည်ထောင်ရန်” ကချင်၏ ထုတ်ပြန်ကြေငြာချက်အပေါ် သျှမ်းနီ ပြည်သူများက ကန့်ကွက်ကြောင်း သိရသည်။
ဇန်နဝါရီ ၁၈ ရက်က သျှမ်းနီနွယ်ဖွား လူငယ်များအဖွဲ့ချုပ်၊ သျှမ်းနီအမျိုးသားတပ်မတော် နှင့် သျှမ်းနီ(တိုင်းလိုင်) နှင့် မြောက်ပိုင်း သျှမ်းမျိုးနွယ်စုများ သွေးစည်းညီညွတ်ရေးပါတီတို့က တပြိုင်တည်းကြေငြာချက် ထုတ်ပြန် ခဲ့သည်။
ပြည်ပအခြေစိုက် ကချင်အမျိုးသား အစည်းအရုံး (KNO) မှ ဦးဆောင်ကျင်းပသည့် ကချင်အမျိုးသားညီလာခံကို ထိုင်းနိုင်ငံချင်းမိုင်မြို့တွင် ဇန်နဝါရီ ၁၂ ရက်မှ ၁၄ ရက်ထိ ကျင်းပခဲ့ပြီး “ သီးခြားလွတ်လပ်သော ကချင်နိုင်ငံတည်ထောင်ရန်” သဘောတူ ဆုံးဖြတ်ခဲ့ကြောင်း သိရသည်။
ကချင်ပြည်နယ် အတွင်းရှိ ဒေသခံဌာနေ တိုင်းရင်းသားဖြစ်သော သျှမ်းမျိုးနွယ်စု များနှင့် အခြားသော ကချင်မျိုးနွယ်စုများ၏ သဘောထားဆန္ဒများမပါဝင်ဘဲ ကချင်အဖွဲ့အစည်း တခု၏ (ကချင်နိုင်ငံတော်) တည်ထောင်ရေး သည် ကချင်ပြည်နယ် အတွက်၊ ပြည်ထောင်စု အတွက် အန္တရာယ်ကြီးမားသည်ဟုလည်း ထုတ်ပြန်ချက်များတွင် ရေးသားထားသည်။
ဖက်ဒရယ် ဒီမိုကရေစီနိုင်ငံတော် ဖြစ်ပေါ်လာရေး အတွက် အစိုးရနှင့် တိုင်းရင်းသားများ အားလုံး ဝိုင်းဝန်းပြီး နည်းလမ်း ရှာဖွေ ဆွေးနွေးနေကြသည့် အချိန်တွင် အဆိုပါ သဘောထားထုတ်ပြန်ချက်သည် ဖက်ဒရယ် ပြည်ထောင်စု နှင့် လုံးဝ ဆန့်ကျင်နေသည့်အပြင် မလိုလားအပ်သည့် တိုင်းရင်းသားလူမျိုး အချင်းချင်း သွေးကွဲခြင်း၊ ပဋိပက္ခ များဖြစ်ပေါ်စေခြင်း နှင့် မငြိမ်မသက်မှုများဖြစ်ပေါ်လာစေသည်ဟုလည်း SNSP ၏ ထုတ်ပြန်ချက်တွင် သုံးသပ်ထားသည်။
ကချင်ပြည်နယ်အား လွတ်လပ်သော ကချင်နိုင်ငံတော် တည်ထောင်ရန် ဆုံးဖြတ်ချက်အပေါ် သျှမ်းနီ အမျိုးသား များတပ်မတော် က လုံးဝ လက်မခံနိုင်ဘဲ ပြင်းထန်စွာ ကန့်ကွက်သည် ဟု ထုတ်ပြန်ချက်တွင် ရေးသားထားသည်။
မြန်မာ နိုင်ငံ လွတ်လပ်ရေး ရရှိရန် ၁၉၄၇ ခုနစ် အခြေခံ ဥပဒေရေးဆွဲပြီး ၁၉၄၈ ခုနစ်ဇန်နဝါရီ ၁၀ တွင် ကချင်ပြည် နယ်ဟု သတ်မှတ်ခေါ်ခဲ့သော်လည်း ကချင်လူမျိုးများမှာ ၂၃ ရာခိုင်နှုန်းရှိပြီး ယခုချိန်ထိ သျှမ်းမျိုးနွယ်ဝင် လူဦးရေ သည် ကချင်ထက်များကြောင်း ထိုထုတ်ပြန်ချက်များတွင် ဖော်ပြထားသည်။
Leave a Comments