ဖမ်းဆီးခံထားရသည့် သျှမ်းနီလူငယ် သေဆုံးသွားကြောင်း သတင်းထွက်လာပြီးသည့်နောက် စစ်ကိုင်းတိုင်းဒေသကြီး ဗန်းမောက်မြို့နယ်မှ သျှမ်းနီဦးဇင်း တစ်ပါး ထပ်မံဖမ်းဆီးခံလိုက်ရကြောင်း သတင်းသိရသည်။

ပြီးခဲ့သည့် ဇူလိုင်လ ၃၀ ရက် ည ၇ နာရီ ဝန်းကျင်အချိန် ဇနီးဖြစ်သူ နှင့် ဖားကန့်မြို့နယ် ဟောင်ပါးကျေးရွာမှ နမ့်ပါဟုတ်ကျေးရွာ သို့ပြန်လာစဥ် လမ်းခုလတ်တွင် လက်နက်ကိုင်အဖွဲ့အစည်းတစ်ခု၏ သေနတ်ထောက် ဖမ်းဆီးခေါ်ဆောင်ခြင်း ခံလိုက်ရသည့် သျှမ်းနီလူငယ် စိုင်းရေကျော်သည် အသတ်ခံလိုက်ရပြီ ဖြစ်ကြောင်း သတင်းများထွက်ပေါ်နေခြင်း ဖြစ်သည်။

“အရာရှိ တစ်ဦးဆိုပြီးတော့ သူ့ဇနီးဆီကို ဖုန်းဆက်အကြောင်းကြား လာတာ သူ့ယောင်္ကျားကဆုံးပြီတဲ့၊ တချို့ကျ တော့လည်း မသေသေးဘူးလို့ ပြောကြတယ်၊ ဒါပေမဲ့ သူ့အမျိုးသမီးက သူ့အကြောင်း ခဏခဏအိပ်မက်မက်လို့ စိတ်ဓာတ်လည်း ကျနေတယ်၊ နေမကောင်းတော့ဘူးတဲ့” ဟု စိုင်းရေကျော် အမျိုးသမီးနှင့် နီးစပ်သူ အမျိုးသမီး တစ်ဦးက သျှမ်းသံတော်ဆင့်ကို ပြောသည်။

ကချင်လွတ်မြောက်ရေးတပ်မတော် (KIA) အဖွဲ့၏ ဖမ်းဆီးခြင်းခံခဲ့ရသည် စိုင်းရေကျော်သည် မည်သည့်လက်နက်ကိုင်တပ်ဖွဲ့ နှင့် ဆက်စပ် ပတ်သက်ခြင်းမရှိသည့် အပြင် ရှမ်းနီစာပေနှင့် ရိုးရာယဉ်ကျေးမှု ကော်မတီမှ အတီး အက ဆရာအဖြစ် တာဝန်ယူ နေသူ အရပ်သားပြည်သူသာဖြစ်ကြောင်း အထက်ပါ အမျိုးသမီးက ပြောသည်။

ဆရာစိုင်းရေကျော်သည် ရက် ၂၀ ခန့် ဖမ်းဆီးထိန်းသိမ်းခံရပြီးနောက် သေဆုံးသွားကြောင်း သတင်းထွက်ပေါ်ခဲ့ သည်။

သူသည် ဖားကန့်မြို့နယ် ဟောင်ပါးကျေးရွာအုပ်စု တာမခံကျေးရွာတွင် နေထိုင်သူဖြစ်ပြီး ရှမ်းနီ စာ/ယဥ် ကော်မတီ အပြင် ကြက်ခြေနီ အသင်းဝင်တစ်ဦးလည်း ဖြစ်သည်။

လက်ရှိတွင် ဇနီးသည်နှင့် အသက် (၃) နှစ် အရွယ် သမီးငယ်တစ်ဦး ကျန်ရစ်ခဲ့သည်။

ထို့အပြင် ယမန်နေ့ (သြဂုတ် ၂၁) ရက် ညပိုင်းတွင်လည်း စစ်ကိုင်းတိုင်းဒေသကြီး ဗန်းမောက်မြို့နယ် ကြောင်လည်ကျေးရွာ ဘုန်းတော်ကြီးကျောင်းမှာ သီတင်းသုံးနေသည့် ဦးဇင်း အရှင်သူရိယ နှင့် ဒေသခံရွာသား သုံးဦးကို KIA တပ်ဖွဲ့ လက်အောက်ခံ PDF များက ဖမ်းဆီးခေါ်ဆောင်သွားကြောင်း အမည်မဖော်လိုသူ ဒေသခံတစ်ဦးက သျှမ်းသံတော်ဆင့် ကိုပြောသည်။

“ဦးဇင်းကို သူတို့ခေါင်းဆောင်တွေက မေးစရာရှိတယ်ဆိုပြီး ခေါ်သွားတာ၊ ဦးဇင်းရဲ့ဖုန်းကိုရော သူတို့ သိမ်းယူလိုက်တယ်၊ နောက်ပြီးတော့ ပင်းခါးလမ်းဆုံကျေးရွာက အုပ်စုအုပ်ချုပ်ရေးမှူး ဦးဝင်းစိုး ၊ ကျောင်းဆရာ ဦးအောင်ပန်း နဲ့ ကိုလင်းဇော်တို့ လည်း PDF တွေ ဖမ်းဆီးသွားတယ်” ဟု ၎င်းက ဆိုသည်။

အဆိုပါ ဖမ်းဆီးခေါ်ဆောင်သွားခြင်းခံရသည့် ရှမ်းနီဦးဇင်းသည် သက်တော် ၅၆ နှစ် ဝါတော် ၂၀ ရှိနေပြီး သျှမ်းနီစာပေတိုးတက်ရေး ၊ သျှမ်းနီကဗျာ ၊ စာပေများကို ရေးသား သင်ကြားနေသူတစ်ဦးလည်းဖြစ်ကြောင်း သိရသည်။

လက်ရှိ သျှမ်းနီတိုင်းရင်းသားများ နေထိုင်ရာ ဖားကန်မြို့နယ်၊ မိုးညှင်း၊ မိုးကောင်းနှင့် ဟုမ္မလင်းဒေသတို့တွင် ဒေသခံသျှမ်းနီ လူမျိုးများ ဖမ်းဆီးခံရခြင်း၊ သတ်ဖြတ်ခံရခြင်းများရှိနေပြီး တော်လှန်ရေးကို အကြောင်းပြကာ လူမျိုးရေး သင်းသတ်မှုများပြုလုပ်သလို ခံစားရကြောင်း ဒေသခံများက ပြောဆိုသုံးသပ်နေကြသည်။