ဗဟိုရုံးချုပ်မှအကြံပေးလမ်းညွှန်မှုဖြင့် ကျားခေါင်းပါတီ SNLD လွှတ်တော်ကိုယ်စားလှယ်များနှင့် မြို့နယ် တိုင်းမှ ပါတီအလုပ်အမှုဆောင်များက မိမိဒေသအတွင်း ဒေသခံလူထုနှင့်တွေ့ဆုံကာ မြေလွှတ်၊မြေလပ်နှင့် မြေရိုင်းများနှင့်ပတ်သက်သည်များ ဆွေးနွေးရှင်းလင်းဖလှယ်မှုပြုခဲ့ကြကြောင်းသိရသည်။
လားရှိုးမြို့နယ် SNLD အမျိုးသားလွှတ်တော်ကိုယ်စားလှယ် စိုင်းဝမ်းလျန်းခမ်းက – “တကယ်လို့ မြေလွှတ် မြေရိုင်းတွေကို တရားဝင် လျှောက်လွှာတင် တောင်းမယ်ဆိုရင်လူထုအနေနဲ့ ဘာအခွင့်အရေးတွေရမလဲ။ တကယ်လို့ မတင်ဘူးဆိုပြန်တော့လည်း ပေးထားတဲ့အချိန် ၆ လ နောက်ပိုင်းကျရင် မြေပိုင်ရှင်ဟာ ဖမ်းဆီးခံရမယ် ။ ငွေဒဏ် ထောင်ဒဏ်ချခံရမယ်။ ဆိုတော့ဒီဥပဒေဟာ မြေပိုင်ရှင်တွေအတွက်ဘာအကျိုးမှမရှိခဲ့ဘူး။ ဒါကြောင့် ကျနော်တို့ဘယ်လို၀ုိင်းဝန်းဖြေရှင်းကြမလဲဆိုပြီး လူထုနဲ့ကွင်းဆင်းတွေ့ဆုံတယ်။ တကယ်လို့ကြုံတွေ့လာခဲ့ရင် ကနဦးဘယ်လိုဖြေရှင်းရမလဲဆိုတာ တောင်သူလယ်သမားတွေသိသင့်တယ်။ ဒီမြေယာ ပြသနာတင်မက အခုဆိုရင် မြောက်ပိုင်းမှာ ရထားလမ်းပြသနာတခု ထပ်တိုးလာနေတယ်။ ဒါတွေကိုရှင်းလင်းပြောပြတာဖြစ်တယ်” – ဟု သျှမ်းသံတော်ဆင့်အားပြောပြသည်။
သျှမ်းပြည်တောင်ပိုင်း လင်းခေးမြို့တွင်လည်း အလားတူ ကျားခေါင်းပါတီ SNLD ၏ လွှတ်တော်ကိုယ်စားလှယ်များက ကျေးလက်တွင်း လယ်ယာမြေပိုင်ရှင်များနှင့် တွေ့ဆုံခဲ့ကြောင်း ၊ မြေစာရင်းဌာနမှ လယ်ယာမြေလုပ်ပိုင်ခွင့် လက်မှတ် ပုံစံရလာရောက်လုပ်ပေးဖို့ တောင်းဆိုခဲ့ကြောင်း၊ မြေစာရင်းဌာနကလည်း မြေပြင်ကွင်းဆင်း တိုင်းတာပြီးဆောင်ရွက်ပေးမည်ဟု ဖြေကြားခဲ့ကြောင်း သိရသည်။
“ဝမ်တိန်းကျေးရွာအုပ်စု၊ ၀မ့်ဟတ်ကျေးရွာအုပ်စုဘက် သွားပါတယ်။ မြေလွှတ် မြေရိုင်းတွေနဲ့ ပတ်သက်တဲ့ကိစ္စတွေအပြင် လူထုတောင်းဆိုခဲ့တဲ့ လမ်းတံတားခင်းရေးကိစ္စ၊ စိုက်ပျိုးရေးမှာရေရရှိရေးကိစ္စ တွေဆောင်ရွက်ပေးခဲ့ကြောင်းတွေရှင်းပြပါတယ်။ ၀မ့်ဟတ်မှာဆိုရင် အထကကျောင်း ၂ ထပ်ကျောင်းဆောင်လိုချင်တယ်၊ ကျောက်ချောလမ်းတွေလိုချင်တယ် စတာတွေတောင်းဆိုမှုတွေလည်း ရှိခဲ့ပါတယ်။ ဆက်လက်တင်ပြပေးဖို့အတွက်ကျနော်တို့မှတ်တမ်းရယူခဲ့ပါတယ် ။ ကျနော်တို့ လွှတ်တော်ကိုယ်စားလှယ်တွေနဲ့အတူ ကျားခေါင်းပါတီရဲ့မြို့နယ်အလုပ်အမှုဆောင်အဖွဲ့တွေ ၊ ရေအရင်းအမြစ်ဌာန ၊ လယ်ယာမြေစီမံခန့်ခွဲရေးနှင့် စာရင်းအင်းဦးစီးဌာန၊ ကျေးလက်ဒေသဖွံ့ဖြိုးရေးဦစီးဌာန ၁၇ ရက်နေ့က ကွင်းဆင်းခဲ့ပါတယ်။ “– ဟုလင်းခေးမြို့နယ် ပြည်နယ် ၁ လွှတ်တော်ကိုယ်စားလှယ် စိုင်းအောင်မျိုးကျော် ကပြောသည်။
မြေလွှတ် မြေလပ်နှင့်မြေရိုင်းများစီမံခန့်ခွဲရေး ပြင်ဆင်ထားသည့် ဥပဒေသစ်ကို ၂၀၁၈ စက်တင်ဘာလ ၁၁ ရက်နေ့တွင် ပြည်ထောင်စုအစိုးရက အတည်ပြုခဲ့ပြီး ၂၀၁၈ အောက်တိုဘာလ ၃၀ ရက်နေ့တွင် အစိုးရက တရားဝင်ကြေငြာခဲ့သည်။ ၆ လအတွင်း မြေလွှတ် မြေလပ်နှင့်မြေရိုင်းများအား မလျှောက်ထားပါက မြေယာပိုင်ရှင်သည် ထောင်ဒဏ် ၂ နှစ် သို့မဟုတ် ငွေကျပ် ၅ သိန်း သို့မဟုတ် ဒဏ် ၂ ရပ်လုံး ကျခံရမည်ဟုလည်း ပါရှိပါသည်။
“ကျနော်တို့အခုလို မြေလွှတ်မြေရိုင်းနဲ့ပတ်သက်ပြီး လူထုနဲ့ကွင်းဆင်းတွေ့ဆုံတာက ဒီအပေါ်လူထုဘယ်လိုမြင်သလဲ။ ဘယ်လောက်က ဆန့်ကျင်ကန့်ကွက်သလဲ စတာကို မှတ်တမ်းကောက်ယူပါတယ်။ ပြီးတော့ ဗဟိုကိုတင်ပြမယ်။ ဒီဥပဒေကို ပြန်လည်စီစစ်ပြီးပြင်ဆင်ပေးဖို့အတွက် နည်းလမ်းရှာပြီး အစိုးရကို ပြန်တင်ပြပေးဖို့ဖြစ်ပါတယ် “– ဟု လည်း စိုင်းဝမ်းလျန်းခမ်းက သျှမ်းသံတော်ဆင့်အားပြောသည်။
ပုံစံ ရ သည် မြေယာပေါ်တွင်လုပ်ကိုင်စားသောက်ခွင့်လက်မှတ်သာဖြစ်ကြောင်းသိရသည်။
ပုံစံ ရ နှင့်ပတ်သက်ပြီး ဖတ်ရှုရန် ….. https://burmese.shannews.org/archives/8623