အချင်းချင်းချစ်ကြည် ညီညွတ်ကြရန်နှင့် ခိုက်ရန်ဖြစ်ပွါးမှုမဖြစ်ပွါးကြရန် ထိုင်းနိုင်ငံ ချင်းမိုင်မြို့ မယ့်ရင်းမြို့နယ်ရှိ ထိုင်းစစ်သင်တန်းကျောင်းတွင် တရားဒေသနာဟောကြားစဉ် မိုင်းဖုန်းဆရာတော် က မိန့်တော်မူသည်။
ဇန်နဝါရီလ ၁၆ ရက် မနက်ပိုင်းက ထိုင်းနိုင်ငံ မြောက်ပိုင်းချင်းမိုင်ခရိုင် မယ့်ရင်းမြို့နယ် ဒွန်းကျောက်အုပ်စု အမှတ် ရ စစ်သင်တန်းကျောင်းတွင် မိုင်းဖုန်းဆရာတော်ဦးဉာဏသံဝရ (ခေါ်) ခူးဝါးဝန်းစုမ့် က တရားဟောကြားရာတွင် ထိုင်း၊ ယွန်း၊ သျှမ်း တရားနာပရိသတ် ၁ သောင်းထက်မနည်း ရှိကြောင်းသိရသည်။
“တရားနာပရိသတ်တွေအရမ်းများတယ်။ ဆရာတော်ကထိုင်းလိုရော သျှမ်းလိုရော တရားဟောတာ။ ဆရာတော်ဟောသွားတာကတော့- လူဖြစ်ဖို့ကမလွယ်ဘူး။ လူရယ်လို့ဖြစ်လာရင် မိမိကိုယ်ကိုတန်ဖိုးထားရမယ်။ မိမိကိုယ်ကိုအတွက် ကောင်းမှုတွေလုပ်ရမယ်။ အမျိုးအတွက် ကောင်းမှုလုပ်ရမယ်။ အမျိုးအချင်းချင်း ချစ်ရမယ်။ ကူညီရမယ်။ စည်းလုံးညီညွတ်ရမယ်။ ကိုယ့်လူမျိုးအေးချမ်းစွာနေထိုင်လုပ်ကိုင်စားသောက်နိုင်ဖို့နဲ့ ဖွံ့ဖြိုးတိုးတက်ဖို့အတွက် ကူညီရိုင်းပင်းရမယ်။ ကိုယ့်လူမျိုးအချင်းချင်း ခိုက်ရန်ဖြစ်ပွါးတာ သတ်ဖြတ်တာမကောင်းဘူးမဖြစ်သင့်ဘူး။ နေရပ်ကနေစွန့်ခွါပြီး ထိုင်းမှာလာပြီးအလုပ်လုပ်ကိုင်စားသောက်နေတဲ့သျှမ်းပြည်သားတွေ မိမိနေရပ်ကို မမေ့ပါနဲ့။ နေရပ်ပြန်ပြီး ဒေသဖွံ့ဖြိုးတိုးတက်အောင်လုပ်ပါ- လို့ ဆရာတော်ကဟောပါတယ်။ “- ဟု မိုင်းဖုန်းဆရာတော်အား သွားရောက်ဖူးမျှော်ကာ တရားနာခဲ့သည့် ချင်းမိုင်မြို့ရောက်သျှမ်းရွှေ့ပြောင်းအလုပ်သမား နန်းဟွမ်က သျှမ်းသံတော်ဆင့်အားပြောသည်။
မိုင်းဖုန်းဆရာတော် တရားပွဲသို့ တရားနာပရိသတ် ၁ သောင်းထက်မနည်း လာရောက်တရားနာယူ
မိုင်းဖုန်းဆရာတော်သည် ဇန်နဝါရီလ ၁၇ ရက်နေ့တွင် ထိုင်းနိုင်ငံဘန်ကောက်မြို့တွင် ကြွရောက်တရားဟောမည်ဖြစ်ပြီး ဘူတန်နိုင်ငံသို့ဆက်လက်ကြွချီမည်ဖြစ်ကြောင်း၊ သင်္ကြန်ပြီးနောက်မှ သျှမ်းပြည်သို့ပြန်ကြွမည်ဖြစ်ကြောင်း၊ထိုနောက်ပိုင်းမိုင်းတုံမြို့နယ် မိုင်းကျက်အုပ်စုရှိ ဂူအတွင်း ၃ နှစ် ကြာ ဂူအောင်းတရားကျင့်ကြံအားထုတ်မည်ဖြစ်ကြောင်းသိရသည်။
Leave a Comments