သျှမ်းပြည်တောင်ပိုင်း မိုးနဲမြို့နယ် ဥယျာဉ်ရပ်ကွက် (ဟော်နန်းဟောင်းဝင်း) အတွင်းရှိ သမိုင်းဝင် မြို့ရှင်နတ်နန်းအားပြုပြင်မွမ်းမံအလှဆင်ရန်အတွက် နတ်နန်းဝင်းအတွင်းမိုးနဲမြို့ခံများစုပေါင်းကာ သန့်ရှင်းမှုပြုကြကြောင်းသိရသည်။
ဇန်နဝါရီလ ၁၅ ရက်ယနေ့မနက်ပိုင်းကတည်းကစပြီး ညနေပိုင်းအထိ မြို့ခံအင်အား ၁၀၀ ထက်မနဲ မြို့ရှင်နတ်နန်းဝင်းအားရှင်းလင်းမှုပြုကြခြင်းဖြစ်ကြောင်းသိရသည်။
“ဟော်စဝ်ပူစဝ်နိုင်း (စဝ်ဝမ် စဝ်မိန်း) မြို့ရှင်နတ်နန်းဝင်းကို ပြန်လည်မွမ်းမံဖို့။ အဲဒီဝင်းမှာ ပန်းခြံလေး အလှအပလေးလုပ်ထားဖို့ စုပေါင်းရှင်းလင်းကြတာဖြစ်တယ်။ ပန်းခြံလုပ်ဖို့အတွက် အလှူရှင်ကတော့ မိုးနဲမြို့ရဲ့စော်ဘွားကြီး စဝ်ပြည့်ရဲ့သမီးတော် စဝ်နော်လိတ် ခေါ် စဝ်ယိင်းစံဟွမ် ဖြစ်ပါတယ်။ ” – ဟု ဥယျာဉ်ရပ်ကွက်သူ ရပ်ကွက်သားများ များနှင့်အတူ မြို့ှရှင်နတ်နန်းဝင်းရှင်းလင်းရေးပြုလုပ်သည့် (ယခင်)ပြည်နယ်လွှတ်တော်ကိုယ်စားလှယ် စိုင်းမောင်ကြီး ကသျှမ်းသံတော်ဆင့်အားပြောသည်။
အဆိုပါမြို့ရှင်နတ်နန်းကို မိုးနဲမြို့အား ၁၆၃၂ မှ ၁၆၇၅ ခုနှစ်အထိ အုပ်ချုပ်မင်းလုပ်ခဲ့သော (မိုးမိတ်စော်ဘွားကြီး၏သားတော်) စဝ်လားခမ်းမှ တည်ထားကိုးကွယ်ခဲ့သည်ဖြစ်ရာ နှစ်ပေါင်း ၃၀၀ ကျော်သက်တမ်းရှိပြီဖြစ်သည်။
ထို့အတွက် မိုးနဲမြို့ခံများက အဆိုပါမြို့ရှင်နတ်နန်းအား အလေးအမြတ်ထားကာ လမ်းပန်းခရီးထွက်လေတိုင်း ၀င်ရောက်ပူဇော်ပါက ဘေးရန်ကင်းပြီးလုပ်ငန်းဆောင်တာများအောင်မြင်အဆင်ပြေကြောင်း ယုံကြည်ခဲ့ကြကြောင်း၊ သီတင်းကျွတ် တန်ဆောင်မုန်းလများတွင် မြို့ရှင်နတ်အား မြို့ခံများသွားရောက်ကန်တော့ကာ ဆီမီးထွန်းညှိပူဇော်ကြကြောင်း သိရသည်။
“စဝ်လားခမ်း (မိုးမိတ်စော်ဘွားရဲ့သားတော်) မိုးနဲကိုမအုပ်ချုပ်ခင်က ဘုရင့်နောင်ရဲ့ မှူးမတ်ဗိုလ်ပါက လာပြီးအုပ်ချုပ်တယ်။ အဲဒီနောက် မြို့မိမြို့ဖတွေနေ မိုးမိတ်ကစော်ဘွားမျိုးနွယ်ကိုသွားပင့်လာတာ မိုးနဲကိုအုပ်ချုပ်ဖို့ ။ အဲ့ချိန်ကတည်းကဒီမြို့ရှင်နတ်နန်း တည်ဆောက်ပြီးကိုးကွယ်လာခဲ့တာဖြစ်တယ်။ မိုးနဲမြို့ဟာ သမိုင်းဝင်အမွေအနှစ်တွေရှိတဲ့နယ်မြေတခုဖြစ်အောင် ဒီဘုရားပုထိုးတွေကိုရှေးလက်ရာမပျက်အောင် ကျနော်တို့ တတ်နိုင်သလောက် ကြိုးစားပြီး ထိန်းသိမ်းသွားမှာဖြစ်တယ်။ ကျန်တဲ့ဘုရားစေတီတွေမှာလည်း ရွာသားတွေနဲ့အတူ စုပေါင်းပြီး ပိတ်ပေါင်းခြုံနွယ်တွေရှင်းလင်းသွားမှာဖြစ်တယ်။” – ဟု စိုင်းမောင်ကြီးက သျှမ်းသံတော်ဆင့်အားပြောသည်။
မိုးနဲမြို့ခံ ၂၀၀ ခန့်စုပေါင်းကာ ဇန်နဝါရီလ ၁၃ ရက် ကလည်း သက်တမ်း ၂၀၀ ကျော်ရှိ ဗိုလ်မှူးမင်းသားမောင်စံစေတီနှင့် သက်တမ်း ၁၀၀ ကျော်ရှိသိမ်တော်ကြီးပုရဝုဏ်အား ပေါင်းမြက်သန့်ရှင်းမှုပြုခဲ့ကြကြောင်းသိရသည်။
အလားတူ မိုးနဲမြို့အတွင်းရှိတခြားသော သက်တမ်းကြာရှည်စေတီတော်များကိုပါ မူလလက်ရာမပျက်စီးစေဘဲ စေတီပုရဝုဏ်အတွင်း ခြုံနွယ်ပေါင်းမြက်များရှင်းလင်သွားကြမည်ဖြစ်ကြောင်းသိရပါသည်။
