သျှမ်းပြည်တောင်ပိုင်း မိုင်းပန်မြို့နယ် နောင်မွန်အုပ်စုအတွင်း လက်နက်ကိုင်တပ်ဖွဲ့များ စစ်ရေးတင်းမာမှုကြောင့် နေရပ်မှ အသီးသီး စွန့်ခွါ စစ်ရှောင်နေသည့်ရွာသားများအား နေရပ်ရင်းပြန်ကြရန် ရလခတိုင်းမှ ဆင့်ဆို ညွန်ကြားခဲ့ပြီး စစ်ကား ရ စီးဖြင့် စစ်ရှောင်များအား ပို့ဆောင်ခဲ့ကြောင်းသိရသည်။

လင်းခေးမြို့သို့ စစ်ရှောင်အဖြစ်သွားရောက်ခိုလှုံနေသော မိုင်းပန်မြို့နယ် နောင်မွန်အုပ်စု လုံချိုရွာသား ရ၀ ကျော်အား ဇန်နဝါရီလ ၁၄ ရက် မွန်းတည့်ချိန်က စစ်ကားကြီး ရ စီးဖြင့်တင်ဆောင်ကာ နေရပ်ရင်းပြန်ပို့ ခဲ့ ကြောင်း မိုင်းပန်မြို့ တပ်တွင်းနှင့်နီးစပ်သူ ၀န်ထမ်းတဦးကပြောသည်။

“စစ်ကား ရ စီးနဲ့တင်လာတယ်။ တပ်ထဲမှာ နေ့လည်စာလာကျွေးတယ် ။ ညနေ ၃ နာရီလောက်မှာ နောင်မွန် အုပ်စုက သူတို့ရွာကိုပြန်ပို့ပေးတယ်။ ရလခ တိုင်းမှူးအမိန့်နဲ့လို့ ကြားရတယ် ”- ဟု ၄င်းက သျှမ်းသံတော်ဆင့် အားပြောပြသည်။

လင်းခေးသို့လည်းကောင်း ၊ သံလွင်အရှေ့ခြမ်း ၀ ထိန်းချုပ်နယ်မြေ ဟွေ့အော့ ဘက်သို့လည်းကောင်းသွားရောက်ခိုလှုံနေကြသည့်ရွာသားများအားနေရပ်ရင်းပြန်ရန် ပြီးခဲ့သည့်သောကြာနေ့ကတည်းက ရလခတိုင်းက ဆင့်ခေါ်ခဲ့ခြင်းဖြစ်ကြောင်း မိုင်းပန်ဒေသခံတဦးကလည်းပြောသည်။

“သံလွင်အရှေ့ခြမ်း ဟွေ့အော့၊နားကောင်းမူးဘက်ကို တိမ်းရှောင်သွားတဲ့ မိုက်ပုတ်၊ ပန်ပိရွာက ရွာသား ၃၀၀ ကျော်တော့ ပြန်မရောက်လာသေးဘူး။ နောက် ၁ ရက် ၂ ရက်လောက်မှ ပြန်လာမယ်လို့ ကြားရတယ်။ တာ့ဆန်းလမ်းကနေ ပြန်လာမယ်လို့ကြားရတယ် ။” – ဟု လည်းမိုင်းပန်ဒေသခံ က ဆက်လက်ပြောပြသည်။

နားမွန်အုပ်စုမှ ရွာသားများသည် ပြီးခဲ့သည့်ဒီဇင်ဘာလကတည်းက ဒေသအတွင်းလှုပ်ရှားသည့် PNLO ၊ RCSS/SSA နှင့်အစိုးရတပ်မတော် တို့ကြား စစ်ရေးတင်းမာမှု၊ လူအင်အား၊ ရိက္ခာအင်အားတောင်းဆိုမှုများကြောင့် ရွာတွင်မနေရဲကြတော့ဘဲ သံလွင်အရှေ့ခြမ်းသို့ ၃၀၀ ကျော်၊ လင်းခေးသို့ ရ၀ ကျော်နှင့် မိုင်းပန်မြို့တွင်းမှတဆင့် တခြားဒေသ (အများစုမှာ ထိုင်းနိုင်ငံ) သို့ အသီးသီးတိမ်းရှောင်ခဲ့ကြသည်။

လင်းခေးရောက် စစ်ရှောင်တဦးကမူ – “ရှင်းရှင်းပြောရင် ကျနော်တို့မပြန်ချင်သေးဘူး။ စစ်မှုထမ်းရမှာစိုးလို့။ ပြည်သူ့စစ်လုပ်ရမှာစိုးလို့။ ၀မ်းစာရှာစားလို့ခက်တဲ့အထဲ အခုလိုအခြေအနေကြောင့် ကလေးပညာရေးလည်းထိခိုက်တာကြောင့် ဖြစ်နိုင်ရင် အခြေအနေတကယ်ငြိမ်သက်ပြီးမှဘဲ ပြန်ချင်တယ် ” – ဟုပြောသည်။

လက်နက်ကိုင်တပ်ဖွဲ့များကြား ပဋိပက္ခကြောင့် ဒေသခံများ လယ်ယာလုပ်ငန်းခွင် ပျက်ခဲ့ရသည့်အပြင် ဘုန်းကြီးကျောင်းများပါ မီးလောင်ကျွမ်းမှုဖြစ်ခဲ့ရသည်။