မိုးနဲမြို့ရှိ ရှေးဟောင်းစေတီတော်ရေရှည် တည်တံ့ ရေးအတွက် စုပေါင်းဝိုင်းဝန်းထိန်းသိမ်းရန် မိုးနဲဒေသခံလူထုစုပေါင်းပြီး ဘုရားစေတီအား ပိတ်ဖုံးနေသော ခြုံနွယ်ပေါင်းပင်များအား ရှင်းလင်းခဲ့ကြကြောင်းသိရသည်။
မိုးနဲမြို့ကျောင်းထိုင်ဆရာတော်သံဃာတော်များ၏ ထောက်ပံ့ကူညီမှု၊ မိုးနဲမြို့နယ် သျှမ်းစာပေနှင့်ယဉ်ကျေးမှုနာယက စိုင်းထွန်းအေး၊ (ယခင်) ပြည်နယ်လွှတ်တော်ကိုယ်စားလှယ် စိုင်းမောင်ကြီးတို့မှ ဦးစီးဦးဆောင်မှုဖြင့် ဒေသခံရွာသား ၂၀၀ ခန့်က ဇန်နဝါရီလ ၁၃ ရက်နေ့က သမိုင်းဝင် ဗိုလ်မှူးမင်းသားမောင်စံစေတီပုရဝုဏ်မှ ခြုံနွယ်ပိတ်ပေါင်းများရှင်းလင်းခဲ့ကြကြောင်းသိရသည်။
ဗိုလ်မှူးမင်းသားမောင်စံစေတီ ခြုံနွယ်ရှင်းလင်းမှုတွင် ဦးဆောင်သည့် စိုင်းမောင်ကြီးက – မိုးနဲမြို့ ဆင်တောင်ဘုရား အတက်လမ်းညာဖက်က ရှေးဟောင်းသိမ်ပုထိုး နဲ့ ဗိုလ်မှူးမင်းသားမောင်စံလှူဒါန်းထားတဲ့စေတီပုရဝုဏ်ကို ရွာသားတွေ စုပေါင်းပြီး ကာယကုသိုလ်ပြုလုပ်ခဲ့ကြပါတယ်။ ၀မ့်လွယ်လင်းနဲ့ ၀မ့်နမ့်မော်လေ ရွာ ၂ ရွာ ကရွာသား ၁၅၀ ကျော်နဲ့ တခြားရွာရယ် ကျနော်တို့ရယ်စုစုပေါင်း ၂၀၀ လောက်ရှိပါမယ်။ ဗိုလ်မှူးမောင်စံဘုရားနဲ့အနီးဝိုက်မှာရှိတဲ့ သိမ် ကြီးတွေမှာပိတ်နေတဲ့ ခြုံတွေ ပေါင်းတွေကိုရှင်းကြတာလေ။ သစ်ငုတ်ကြီးတွေ ကိုတော့ စက်ယန္တရားတွေနဲ့ရှင်းထုတ်ရပါလိမ့်မယ်။ – ဟုစိုင်းမောင်ကြီးကပြောသည်။
မိုးနဲမြို့တွင် သမိုင်းဝင် ရှေးဟောင်းစေတီပုထိုးပေါင်းများစွာရှိသဖြင့် သျှမ်းပြည်ပုဂံဟုလည်းတင်စားခေါ်ဝေါ်ခဲ့ကြသည်။
ထိုအတွက် ကမ္ဘာလှည့်ခရီးသွားများလှည့်လည်သုတေသနပြုသည့်နေရာအဖြစ်သတ်မှတ်ပေးရန်အတွင် လွှတ်တော်ကိုယ်စားလှယ်များက ကြိုးစားတောင်းဆိုနေကြသည်။
မိုးနဲမြို့ရှိ မြန်မာတပ်ရုံးကို အုပ်ချုပ်ရန် ဗိုလ်မှူးမောင်စံခေါ် ဘုရင်၏ ဆွေတော်မျိုးတော် မင်းသားကြီး နေပြည်တော်မှ မိုးနဲသို့အရောက် ၁၇၉၄ တွင် စေတီတဆူတည်ဆောက်လှူဒါန်းခဲ့ကြောင်းသိရသည်။ ယင်းစေတီကိုမင်းသားဘုရားဟုခေါ်တွင်ရာ ယနေ့တိုင် ဆင်တောင်ဘုန်းတော်ကြီးအရှေ့မြောက်ဘက်သုသာန်အသွားလမ်းအရှေ့ဘက်ကပ်လျက် တည်ရှိနေသည်ဟု ၄င်းနှင့်ပတ်သက်ပြီ မိုးနဲဘုရာသမိုင်းတွင်ဖော်ပြထားသည်။
