သျှမ်းပြည်တောင်ပိုင်းလင်းခေးမြို့နယ်၏ သျှမ်းစာပေနှင့်ယဉ်ကျေးမှုအဖွဲ့ ရုံးအဆောက်အဦးဆောက် လုပ်ရန်အဆင်မပြေနိုင်သေးသဖြင့် လက်ရှိတွင် အသင်းဝင်လူငယ်များတွေ့ဆုံဆွေးနွေးမှု များပြုလုပ်နိုင်ရန် တဲတဆောင်ဆောက်လုပ်နေကြောင်းသိရသည်။
ပြီးခဲ့သည့်အပတ်သောကြာနေ့ ဂျန္နဝါရီလ ၁၂ ရက်နေ့က အသင်းဝင်များနှင့်ရွာသားများ တဲစတင် ဆောက်လုပ်နေခြင်းဖြစ်ပြီး တတ်အားသရွေ့ ကိုယ့်အားကိုယ်ကိုး ၀ုိင်းဝန်းစုပေါင်းကာ ဆောက်လုပ် နေကြခြင်းဖြစ်ကြောင်း လင်းခေးမြို့နယ် သျှမ်းစာပေနှင့်ယဉ်ကျေးမှုအဖွဲ့ တွဲဖက်အတွင်းရေးမှူး နန်းခမ်းချစ် ကပြောသည်။
“မြေကွက်ကို မနှစ်က ၀ယ်ပါတယ်။ အသင်းရံပုံငွေက မတောင့်တင်းတော့ အသင်းရုံးမဆောက် နိုင်သေးဘူး။ အသင်းသားတွေတွေ့ဆုံဆွေးနွေးဖို့ လှုပ်ရှားမှုတွေဘာတွေလုပ်ဖို့အတွက် ဆိုပြီး အသင်းဝင်တွေ ၊ စေတနာရှင် ရပ်ရွာဒေသခံတွေကနေ တဲလေးတဆောင် လာဆောက်ပေးနေပါတယ်။ သောကြာနေ့က ကျမတို့စဆောက် ပါတယ်။ ရံပုံငွေတောင့်တင်းလာမှ ရုံးဆောက်ပါမယ်။ ခုလောလောဆယ်တော့ တဲလေးနဲ့ဘဲ အရင်အလုပ်စ ရတာပေါ့”- ဟု သျှမ်းသံတော်ဆင့်အား ပြောပြသည်။
လက်ရှိတွင်လင်းခေးမြို့ခံလူငယ်များက ပြည်တွင်းပြည်ပ ရောက် လင်းခေးမြို့သူမြို့သားများ၊ စေတနာရှင်များမှ အဆိုပါမြေကွက်အတွက်ပါ၀င်လှူဒါန်းနိုင်ရန် တိုက်တွန်းနိုးဆော်နေကြောင်း သိရသည်။
“တကယ်လို့ စေတနာရှင်အလှူရှင်တွေ ပြည်တွင်းပြည်ပရောက်လင်းခေးမြို့သူ မြို့သား ညီအကိုမောင်နှမတွေ ပါ၀င်လှူဒါန်းချင်ရင် ကျမ နန်းခမ်းချစ်ကို 09261123032 ကနေ ဆက်သွယ်နိုင်ပါတယ်။ ဆရာမ နန်းဆီနွန်း 09962510777 ကိုလည်း ဆက်သွယ်လှူဒါန်း နိုင်ပါတယ်။ ကိုယ့်မြို့နယ် ရပ်ရွာအတွက်လည်းဖြစ် ကိုယ့်စာပေယဉ်ကျေးမှုမပပျောက်အောင် ထိန်းသိမ်းတဲ့နေရာအတွက်လည်းဖြစ်တဲ့ ဒီမြေနေရာနဲ့အဆောက်အဦးအတွက် အုပ်တချပ် သဲတပွင့်ပါ၀င်လှူဒါန်းနိုင်ပါတယ်ရှင့် ” ဟုပြောဆိုသည်။
လင်းခေးမြို့ သျှမ်းစာပေယဉ်ကျေးမှုအဖွဲ့ ရုံးမြေနေရာသည် မြို့ဦးရပ်ကွက် တွင်တည်ရှိပြီး အလျား ၁၃၁ နှင့် ၁၄၁ ပေရှိပြီး အနံမှာ ၆၃ နှင့် ၆၆ ပေရှိကြောင်း သိရသည်။
Photo by Ying Hark
