သျှမ်းပြည်မြောက်ပိုင်း တန့်ယန်းမြို့နယ်တွင်ကျင်းပသော ဘုရားပွဲ၌ လောင်းကစားဝိုင်းများ ချနေသည့်အပေါ် စီစစ်ပေးရန်နှင့် ရုပ်သိမ်းပေးရန် မြို့နယ်အာဏာပိုင်များအား ဒေသခံလူထုကတောင်းဆိုလိုက်သည်။
တန့်ယန်းမြို့နယ်အနောက်ဘက် ၃ မိုင်ခန့်အကွာရှိ ကျောက်ဂူဘုရားတွင် လွန်ခဲ့သည့်နှစ်များကတည်းက လူထုတောင်းဆိုလာသည့် လျှပ်စစ်မီး ရရှိသဖြင့် ပျော်ပွဲရွှင်ပွဲကျင်းပရာ လောင်းကစားဝိုင်းပါ ချသဖြင့် လူထုအခက်ကြုံနေရကြောင်း တိုင်တန်းမှုကြောင့် ပြည်သူ့လွှတ်တော်ကိုယ်စားလှယ်က မြို့နယ်အာဏာပိုင်များထံ ဒုတိယအကြိမ် အကြောင်းကြားလိုက်ခြင်းဖြစ်သည်ဟု ဆိုပါသည်။
“လောင်းကစားဝိုင်းက ၆ ရက်နေ့ကစတင်တယ်။ကစားဝိုင်းစတင်တဲ့နေ့မှာဘဲ လူထုက ကျနော်တို့ဆီကိုစာရေးအကြောင်းကြားလာတယ်။ ဒီကစားဝိုင်းဟာ တရားဝင် လုပ်ခွင့်ရထားတာမဟုတ်ဘူး။ လောင်းကစားဝိုင်းတွေကြောင့်လူထုအကျင့်ပျက်တယ်။ ကျနော်တို့လည်း တာဝန်ရှိပုဂ္ဂိုလ်တွေဆီကို ချက်ခြင်းဖုန်းဆက်အကြောင်းကြားတယ်။ တားမြစ်ပိတ်ပင်ပေးဖို့။ ဒါပေမယ့် ရ ရက်နေ့ ၈ ရက်နေ့အထိလည်းလောင်းကစားဝိုင်းတွေက ဆက်ရှိနေတော့ ကျနော် ဌာနဆိုင်ရာကို ဒုတိယအကြိမ်အသိပေးစာရေးအကြောင်းကြားရတာဖြစ်ပါတယ်”- ဟု တန့်ယန်းမြို့နယ် ပြည်သူ့လွှတ်တော်ကိုယ်စားလှယ် စိုင်းအောင်ပွင့်က သျှမ်းသံတော်ဆင့်အားပြောပြသည်။
ပြည်သူ့လွှတ်တော်ကိုယ်စားလှယ်၏ ပေးစာသည် တန့်ယန်းမြို့နယ် အထွေထွေအုပ်ချုပ်ရေးမှူးအား လိပ်မူပြီး မြို့နယ်အုပ်ချုပ်ရေးမှူး၊ မြို့နယ်ရဲတို့ထံပါ လိပ်မူထားကြောင်းသိရသည်။
“ကျမတို့ဘက်မှာ ယခင်ကာလတွေတုန်းကလောင်းကစားဝိုင်းတွေကြောင့် လူထုရင်ဆိုင်ရတဲ့ပြသနာတွေကို သင်္ခန်းစာလုပ်ပြီးတော့ အခုရော အနာဂတ်မှာရော လောင်းကစားဝိုင်းတွေမရှိစေချင်ဘူး။ ဘာပြသနာတွေလည်းဆိုတော့ လောင်းကစားဝိုင်းကြောင့်လူငယ်တွေအကျင့်ပျက်တယ်။ လောင်းရှုံးရင် အိမ်ထောင်သည်တွေဆိုရင် အိမ်ထောင်ပျက်တဲ့အထိပြသနာတွေဖြစ်တယ်။ ခိုးဆိုးလုယက်မှုဖြစ်တယ်။ခိုက်ရန်ဖြစ်ပွါးတယ်။ သတ်ဖြတ်မှုတွေဖြစ်ပွါးတယ် ဒါတွေကအသေးအမွှားလေးတွေ။ အဲ့ထက်ပိုတဲ့ပြသနာတွေလည်းရှိတယ်။ အဲဒါကြောင့် လောင်းကစားဝိုင်းမရှိစေချင်တာ။”- ဟု တန့်ယန်းသူ နန်းခင်ကလည်းပြောသည်။
ကျောက်ဂူဘုရားပွဲတွင် ပွဲစျေးအပြင် လေးကောင်ဂျင်၊ ဂုံးကင်း၊ ဖဲဝိုင်းတို့ပါရှိကြောင်း၊ ပွဲစျေးတန်းသို့ ဒေသတွင်းလူထု ညစဉ်ညတိုင်း သွားရောက်လောင်းကစားမှုပြုကြကြောင်းသိရပါသည်။
Leave a Comments