သျှမ်းအမျိုးသားအဆင့် နိုင်ငံရေးဆွေးနွေးပွဲ ကျင်းပနိုင်ရေးအတွက် ဆွေးနွေးပွဲဖြစ်မြောက်ရေး ကော်မတီ များ လူထုနှင့် ကွင်းဆင်းတွေ့ ဆုံစဉ် အစိုးရတပ်မတော် မှ နည်းအမျိုးမျိုးဖြင့် ဟန့်တား သဖြင့် ၂၀၁၈ ဂျန္နဝါရီ ၁၂ – ၁၄ ရက် အထိ လင်းခေးမြို့တွင်ကျင်းပရန် စီစဉ်ထားမှုအား အကန့်အသတ်မရှိ ရက်ရွှေ့ဆိုင်းလိုက်ကြောင်း သျှမ်းပြည်တပ်မတော် RCSS/ SSA မှ ထုတ်ပြန်ကြေငြာသည်။

သျှမ်းပြည်တောင်ပိုင်း လင်းခေးမြို့တွင် လူမျိုးအလိုက် အမျိုးသားအဆင့် နိုင်ငံရေးဆွေးနွေးပွဲ ကျင်းပ ရန် -၂၀၁၇ နိုဝင်ဘာလက နေပြည်တော်တွင် ကျင်းပသည့် ၆ ကြိမ်မြောက် တနိုင်ငံလုံး အပစ်အခတ် ရပ်စဲ ရေး စာချုပ် အကောင်အထည်ဖေါ်မှုဆိုင်ရာ ညှိနှိုင်းဆွေးနွေးပွဲ JICM အစည်းအဝေး မှ သဘော တူညီမှု ရရှိခဲ့ကြသည်။ သို့သော် ဆွေးနွေးပွဲ ဖြစ်မြောက်ရေးကော်မတီမှ သျှမ်းလူထုအား ကွင်းဆင်း တွေ့ဆုံစဉ် တပ်မတော်မှ လူသူစစ်လက်နက် အင်အားအပြည့်အစုံဖြင့် ဆွေးနွေးပွဲများအား တားမြစ် ပိတ်ပင်ခဲ့သောကြောင့် သတ်မှတ်ရက်အတွင်းဆွေးနွေးပွဲကျင်းပခြင်းအား ယာယီရွှေ့ဆိုင်း ထားကြောင်း ဂျန္နဝါရီလ ၈ ရက်နေ့က RCSS ကထုတ်ပြန်သောကြေငြာချက်တွင်ရေးသားဖော်ပြထားသည်။

“ ကျနော်တို့ လူထုနဲ့ ကွင်းဆင်းတွေ့ရာမှာလဲ တပ်မတော်က ဟန့်တားတယ်။ တောင်ကြီးမှာ အကြို လုပ်ဖို့ပြင်ရာမှာလဲ ပေးမလုပ်ဘူး။ ဒါ့ကြောင့် လင်းခေးမှာမလုပ်ဖြစ်တာပါ။ ဘယ်တော့ လုပ်မလဲ ဆိုတာတော့ နှစ်ဘက်ပြန်လည်ညှိနှိုင်းပြီးတော့မှဘဲပြောနိုင်မယ်” – ပြောခွင့်ရ ဗိုလ်မှူးကြီး စိုင်းဦးက ပြောသည်။

လူထုနှင့်ကွင်းဆင်းတွေ့ဆုံသည့်အဖွဲ့များ တောင်ကြီးမြို့၌ ဂျန္နဝါရီလ ၇ ရက်မှ ၉ ရက်နေ့ အထိ ပြန်လည်တွေ့ဆုံရန် ပြင်ဆင်ထားမှုအား တပ်မတော်မှ ဟန့်တား ခဲ့သည်မှာလည်း လင်းခေးမြို့တွင် သျှမ်းအမျိုးသားအဆင့်နိုင်ငံရေးဆွေးနွေးပွဲ ကျင်းပရေး ရက်ရွှေ့ဆိုင်းရခြင်း၏ အဓိက အကြောင်းအချက်တခုဖြစ်ကြောင်း ၊ ဆွေးနွေးပွဲလွတ်လပ်စွာကျင်းပခွင့်ပြုထားသည့် အစိုးရ၏ အုပ်ချုပ်ရေးပိုင်းကလည်းညွှန်ကြားထားမှုများ ပြန်လည်ရုပ်သိမ်းထားကြောင်း ၎င်းက ဆိုပါသည်။

သျှမ်းပြည်တပ်မတော် RCSS/SSA သည် တနိုင်ငံလုံးပစ်ခတ်တိုက်ခိုက်မှုရပ်စဲရေးစာချုပ် လက်မှတ်ရေးထိုး သည့်အဖွဲ့ဖြစ်ရာ နေပြည်တော် အစိုးရမှ မတရားအသင်းအဖြစ်မှ ပယ်ဖျက်ထားပါသည်။

ကျိုင်းတုံမြို့ ပြည်ထောင်စုအဆင့် ဆွေးနွေးပွဲ သဘောတူညီချက် (ဒုတိယ) ၁၁ ချက်မြောက်တွင် – “RCSS/SSA တပ်ဖွဲ့အနေဖြင့် နိုင်ငံရေးပါတီများနှင့်ဖြစ်စေ၊ မည့်သည့်အဖွဲ့အစည်းနှင့်ဖြစ်စေ၊ ဒေသခံပြည်သူလူထုနှင့်ဖြစ်စေ၊ လွတ်လပ်စွာတွေ့ဆုံဆွေးနွေးနိုင်ရန်သဘောတူညီသည်” – ဟု ပါရှိသည်။

သို့သော် လက်ရှိတွင် RCSS/SSA အနေဖြင့် လူထုနှင့်လွတ်လပ်စွာတွေ့ဆုံခွင့်မရသည့်အပြင် လွန်ခဲ့သည့် ရက်ပိုင်း က သျှမ်းပြည်တောင်ပိုင်း လွိုင်လင်မြို့နယ်တွင်လည်းကောင်း၊ သျှမ်းပြည် အရှေ့ပိုင်း မိုင်းပြင်းမြို့နယ်တွင်လည်းကောင်း အစိုးရတပ်မတော် ၏ အင်အားသုံးတိုက်ခိုက်ခြင်း ခံခဲ့ရသည်။ RCSS/SSA ကဲ့သို့ တနိုင်ငံလုံးအပစ်အခတ်ရပ်စဲရေးစာချုပ် လက်မှတ် ရေးထားသည့် ကရင်အမျိုးသားအစည်းအရုံး KNU ကလည်း NCA လမ်းကြောင်းက အလုပ်မဖြစ်တော့ကြောင်း ယခင်အပတ်က ထောက်ပြခဲ့သည်။