၂၀၁၈ ဇန္နဝါရီ ၁၂ ရက်မှ ၁၄ ရက်နေ့ထိ သျှမ်းအမျိုးသားအဆင့်နိုင်ငံရေးဆွေးနွေးပွဲ ကျင်းပဖို့ရန် စီစဉ်ထားသော်လည်း လက်တွေ့မှာ ကျင်းပနိုင်ဖို့ မသေချာသေးကြောင်း သျှမ်းခေါင်းဆောင်များ အသိုင်းအဝိုင်းက ပြောသည်။
“တောင်ကြီးမှာ အကြိုကျင်းပဖို့ ကျနော်တို့ ဒီလ ၇-၉ ရက်နေ့ အထိ လျာထားတယ်။ တောင်ကြီးမှာ အကြိုမကျင်းပနိုင်ရင် လင်းခေးမှာလဲ ကျနော်တို့ ကျင်းပနိုင်မှာမဟုတ်ဘူး။ လင်းခေးမှာ ND မလုပ် ဖြစ်ရင်နေပြည်တော်မှာလုပ်မယ့် UPC တတိယ အကြိမ်လဲ သွားတက်နိုင်မှာမဟုတ်ဘူး။ တက်ရင်လဲ တင်ပြစရာရှိမှာမဟုတ်ဘူး” – ဟု သျှမ်းလက်နက်ကိုင်တပ်များ၊ သျှမ်းနိုင်ငံရေးပါတီများ၊ လူမှုအသင်း အဖွဲ့များပါဝင်ဖွဲ့စည်းများ ပါဝင် ဖွဲ့စည်းထားသည့် သျှမ်းပြည်ညီညွတ်ရေးကော်မတီ CSSU အလှည့်ကျ ဥက္ကဌ သျှမ်းပြည်တပ်မတော် RCSS/SSA ခေါင်းဆောင် ဗိုလ်ချုပ်ကြီးယွက်စစ်က ပြောသည်။
အဆိုပါ ကိစ္စနှင့်ပတ်သက်၍ ယမန်နေ့က သျှမ်းပြည်တပ်မတော် RCSS/SSA ထိပ်ပိုင်း ခေါင်းဆောင် များ အစည်းအဝေးထိုင်ကြကြောင်း၊ တောင်ကြီးမှာ သျှမ်းအမျိုးသားအဆင့်နိုင်ငံရေးဆွေးနွေးပွဲ အကြို ကျင်းပရန် ဆုံးဖြတ်ချက်မချနိုင်သေးကြောင်း၊ အစိုးရ အပါအဝင် တပ်မတော် က ဟန့်တားထားသည့် အတွက် တောင်ကြီးမြို့တွင် အကြိုကျင်းပရန်မဖြစ်နိုင်ပါက လင်းခေးမြို့တွင် ညီလာခံကြီးကျင်းပ ရန်လည်း မဖြစ်နိုင်တော့ဟုပြောဆိုကြောင်း နီးစပ်သည့်အသိုင်းအဝိုင်းကပြောသည်။
သို့သော် သျှမ်းပြည်တပ်မတော် RCSS/SSA ပြောခွင့်ရ ပုဂ္ဂိုလ်အား ဆက်သွယ်သော်လည်း ဖုန်းလက်ခံ ဖြေဆိုခြင်းမရှိပေ။
သို့သော် သျှမ်းပြည်ညီညွတ်ရေးကော်မတီ CSSU အတွင်းရေးမှူးများအဖွဲ့က ဇန္နဝါရီ လ ၄ ရက် ယနေ့တွင်ပင် သဘောတူချက်အရ ဇန္နဝါရီ လ ၇ ရက်မှ ၉ ရက်နေ့အထိ တောင်ကြီးမြို့တွင် ကျင်းပရန် စီစဉ်ထားသည့် အကြိုဆွေးနွေးပွဲ ပြုလုပ်မည်မဟုတ်တော့ကြောင်း အဖွဲ့ဝင်တဦးက သျှမ်းသံတော်ဆင့်သို့ပြောကြားသည်။
“သျှမ်းပြည်နယ်အစိုးရ ထောက်ပံ့တဲ့ ဘတ်ဂျတ် နဲ့ ခရိုင်မှူးက သျှမ်းအစည်းအဝေး ပြုလုပ်ဖို့ ကနေ့ထိ ပြင်ပေးနေတယ်။ နွယ်၀တီခန်းမ တိုးချဲ့တာတွေ၊ ရေအိမ်အခန်းတိုးချဲ့ပေးတာတွေ၊ ဟိုတယ်မရှိတဲ့ အ တွက် တက်ရောက်မည့်သူတွေ တည်းခိုဖို့ မြို့ခံအိမ်တွေမှာ တအိမ်လူဘယ်နှစ်ယောက်နှုန်း ခွဲတန်းချ တာတွေလုပ် ပြင်ဆင်ထားတယ်။ ဒီနေ့လည်း ကမ္မဌာန်းကျောင်း ၄ ထပ်ဆောင်မှာဧည့်သည်တွေ တည်းခိုဖို့ ခရိုင်မှူးကိုယ်တိုင်ပါဝင်တဲ့ မြို့ခံလူထုတွေ သွားပြီးသန့်ရှင်းရေးလုပ်၊ နေရာထိုင်ခင်း စီစဉ်နေတယ်” – ဟု ဝိုင်းဝန်းကူညီနေသည့် ရပ်မိရပ်ဖ ဦးစိုင်းနော် က ပြောသည်။
သျှမ်းပြည်တောင်ပိုင်း လင်းခေးမြို့ တွင် သျှမ်းအမျိုးသားအဆင့်နိုင်ငံရေးဆွေးနွေးပွဲ ကျင်းပနိုင်ရေး အတွက် ဒီဇင်ဘာ ၁၇ ရက်နေ့မှ ၂၄ ရက်နေအထိ လူထုသဘောထားရယူရေးအတွက် ဖြစ်မြောက်ရေးကော်မတီများ အဖွဲ့ခွဲကွင်းဆင်းတွေ့ ဆုံရာတွင်လည်း တပ်မတော် မှ အင်အားသုံးကာ နည်းမျိုးစုံဖြင့် ဟန့်တားခဲ့သည်။
အစိုးရ တပ်မတော် က သျှမ်းအမျိုးသားအဆင့် နိုင်ငံရေးဆွေးနွေးပွဲ နှင့် စပ်ဆိုင်သည့် အစည်း အဝေးများ၊ လူထုတွေ့ဆုံပွဲများ တောင်ကြီးမြို့ နှင့် ပင်လုံမြို့အပါ အဝင် မည်သည့်နေရာမျှ ကျင်းပခွင့် မပြုဘဲ လင်းခေးမြို့တွင်သာ ပြုလုပ်ရန် ထုတ်ပြန်ထားသည်။
