သျှမ်းအမျိုးသားအဆင့်နိုင်ငံရေးဆွေးနွေးပွဲ အကြိုပြုလူထုတွေ့ဆုံပွဲအား သျှမ်းပြည်တောင်ပိုင်း ပင်လုံမြို့၊ သျှမ်းပြည်အရှေ့ပိုင်းတာချီလိတ်မြို့၊ သျှမ်းပြည်မြောက်ပိုင်းလားရှိုးမြို့ ဒေသခံ လူထု နှင့် တွေ့ဆုံစဉ် အစိုးရအုပ်ချုပ်ရေးပိုင်းများက ခွင့်ပြုသော်လည်း တပ်မတော်က အင်အားဖြင့်သော် လည်းကောင်း၊ ဖုန်းဖြင့်သော်လည်းကောင်း ဟန့်တားမှုများ ပြုလုပ်ခဲ့သည်။
ဒီဇင်ဘာ ၁၇ ရက်နေ့က ပထမအကြိမ်ပြုလုပ်စဉ် တပ်မတော်ဟန့်တားမှုကြောင့်တွေ့ဆုံပွဲ ပျက်ခဲ့ပြီး ဒီဇင်ဘာလ ၂၁ ရက်နေ့ ယနေ့မနက်က ပင်လုံ လူထု၏ သဘောထား ရယူရန် ထပ်မံတွေ့ ဆုံစဉ် မြန်မာ့တပ်မတော် အရှေ့အလယ်ပိုင်းတိုင်းစစ်ဌာနချုပ် (ရပခ) တိုင်းမှူး ညွှန်ကြားချက်အရ ဟုဆိုက လွိုင်လင်တပ်နယ်မှူး ဗိုလ်မှူးကြီးအောင်ဌေး ဦးဆောင်သည့် လက်နက်ကိုင်အဖွဲ့က ဒုတိယအကြိမ် ထပ်မံလာ ရောက် ဟန့်တားခဲ့သည်ဟု ပြည်နယ်လွှတ်တော် အမတ် စိုင်းဦးခမ်းက ဤကဲ့သို့ပြောပြသည်။
“မနက်ပိုင်းကတော့ အုပ်ချုပ်ရေးမှူး ရောက်လာခဲ့တယ် အုပ်ချုပ်ရေးမှူး ကိုယ်တိုင် ပြည်သူရှေ့မှာ ရှင်းပြတယ်၊ သျှမ်းပြည်နယ်အစိုးရဘက်က လုပ်ခွင့်ပေးတယ် ဆိုပြီး အုပ်ချုပ်ရေးမှူးက ရှင်းပြသွားတယ် ။ ဒါပေမယ့် တပ်မတော်ဘက်က တနေကုန်ထိုင်စောင့်တယ်။ သူတို့ရပ်ခိုင်းတယ် ကျနော်တို့ မရပ်ဘဲ ကိုယ်စားလှယ်တွေ့ကြုံရှင်းလင်းပွဲ ဆိုတဲ့ ခေါင်းစဉ် နဲ့ ဟောပြောလိုက်ရတယ်။ သျှမ်းအမျိုးသားအဆင့် နိုင်ငံရေးဆွေးနွေးပွဲဆိုတဲ့ခေါင်းစဉ်ကိုတော့ဖြုတ်ခိုင်းတယ်” ဟု စိုင်းဦးခမ်း ကပြောသည်။
လွှတ်တော်ကိုယ်စားလှယ် ၅ ဦး မှာ ကျားခေါင်းပါတီအမတ်များဖြစ်ကြသည့် နန်းခမ်းအေး၊ စိုင်းဆိုင်မိန်း ၊ စိုင်းခမ်းမြတ်၊ စိုင်းဦးခမ်း နှင့် ကျားဖြူအမတ် စိုင်းနောင့် တို့က လွှတ်တော်တွင်းအတွေ့အကြုံများနှင့် ဗဟုသုတများဟောပြောအဖြစ် ခေါင်းစဉ်ပြောင်း သွားခဲ့ခြင်းဖြစ်သည်။
ပင်လုံမြို့တွင် တပ်မတော်မှ ၀င်ရောက်ဟန့်တားသကဲ့သို့ သျှမ်းပြည်မြောက်ပိုင်းလားရှိုး၊ သျှမ်းပြည်အရှေ့ပိုင်း တာချီလိတ်တို့တွင် ဟန့်တားမှုများပြုလု့ပခဲ့သည်။ တာချီလိတ်မြို့တွင် ခမရ ၃၅၉ က ၀င်ရောက်ကာ ဆွေးနွေးပွဲ ပြီးဆုံးတဲ့အထိ အင်အား ၃၀ ခန့် ဖြင့်ဝိုင်းရံစောင့်ဆိုင်းခဲ့သည်။
အလားတူ လားရှိုးတွင်လည်း လူထုတွေ့ဆုံရေးကော်မတီများအား အရှေ့မြောက်ပိုင်းတိုင်းစစ်ဌာနချုပ် ရမခ စစ်တိုင်းရုံး စစ်ဘက်လုံခြုံရေးအရာရှိက လုထုတွေ့ဆုံဆွေးနွေးပွဲရုပ်သိမ်းခြင်းမပြုက စစ်အင်အားဖြင့် ၀င်ရောက် လာမည်ဟု ခြိမ်းခြောက်သော်လည်း အစည်းဝေးပြီးသည်အထိ တစုံတရာ ၀င်ရောက်နှောင့်ယှက်ခြင်းမရှိဟု သျှမ်းပြည်မြောက်ပိုင်း လူထုတွေ့ဆုံရေးကော်မတီကပြောသည်။
လာမည့်နှစ်ဦးပိုင်းအတွင်း နေပြည်တော်တွင်ကျင်းပမည့် ၂၁ ရာစု ပင်လုံညီလာခံ တတိယအကြိမ် တွင် သျှမ်းအမျိုးသားများ၏ ဘုံသဘောထားရယူရန် လာမည့် ဇန္နဝါရီလ ၁၂ – ၁၄ ရက်နေ့ အထိ သျှမ်းအမျိုးသား အဆင့်နိုင်ငံရေးဆွေးနွေးပွဲတွင် လူထုသဘောထားရယူတင်ပြဆွေးနွေးပေးနိုင်ရန် ဆွေးပွဲဖြစ်မြောက်ရေး ကော်မတီမှ သျှမ်းပြည်နယ်အတွင်းအပြင် ကယား၊ ကချင်၊ မန္တလေး၊ ပဲခူး တိုင်းအတွင်းရှိ သျှမ်းလူထု အားကွင်းဆင်းတွေ့ဆုံနေခြင်းဖြစ်သည်။
