သျှမ်းပြည်အရှေ့ပိုင်း ကျိုင်းတုံမြို့မှာ ၂၁၁၃ ခု သျှမ်းနှစ်သစ် တရက်နေ့တုန်းက သျှမ်းစာပါတဲ့ ကျိုင်းတုံမြို့အဝင်ဆိုင်းဘုတ်ဖွင့်ပွဲ ပြုလုပ်ခဲ့ပါတယ်။
ကျိုင်းတုံမြို့မှကြိုဆိုပါ၏ ဆိုတဲ့ တိုင်းလုံ စာ ၊ တိုင်းခင် စာတွေနဲ့ရေးသားထားတဲ့ ဆိုင်းဘုတ်ကို တာချီလိတ်ဘက်ကလာတဲ့ ကျိုင်းတုံမြို့အဝင်မှာ စိုက်ထူထားပြီး ဒီဇင်ဘာလ ၈ ရက်နေ့ သျှမ်းသက္ကရာဇ် ၂၁၁၃ ခု နှစ်ဆန်းတရက်နေ့တုန်းက ဖွင့်ပွဲလုပ်ခဲ့ကြတာဖြစ်ပါတယ်။
ဖွင့်ပွဲကို ဒေသခံလူထု၊ ကျိုင်းတုံမြို့တွင်းတိုင်းရင်းသားလူမျိုးများဖွံ့ဖြိုးတိုးတက်ရေးကော်မတီ၊ သျှမ်းစာပေနှင့်ယဉ်ကျေးမှုအဖွဲ့၊ တက္ကသိုလ်ကျောင်းသားလူငယ်များ၊ အမျိုးသားကျောင်းမှကျောင်းသား၊ ဆရာများအဖွဲ့နဲ့၊ နိုင်ငံရေးပါတီတွေစုပေါင်းတက်ရောက်ခဲ့ကြပါတယ်။
ကျိုင်းတုံမြို့တွင်းတိုင်းရင်းသားလူမျိုးများဖွံ့ဖြိုးတိုးတက်ရေးကော်မတီ လက်ထောက်အတွင်းရေးမှူး စိုင်းဆမ်တစ်ဆေ က-” မနက်ပိုင်းမှာကျနော်တို့ ဆိုင်းဘုတ်ဖွင့်ပြီးမှ မိန်းလီပိန်းစိုင် ဘုန်းကြီးကျောင်းပြန်သွားပြီး ကောက်သစ်လှူကြပါတယ်။ အဲ့နေ့ညနေပိုင်းမှာ ကောင်းမူးခမ်းကျောင်းတိုက်မှာ သျှမ်းသမိုင်းနဲ့ပတ်သက်တဲ့ စာပေဟောပြောပွဲကျင်းပပါတယ်။ ” – လို့ သျှမ်းသံတော်ဆင့်ကိုပြောပါတယ်။
ကျိုင်းတုံမြို့အဝင်အထွက်လမ်းမှာ အခုလို သျှမ်းစာပါတဲ့ ဆိုင်းဘုတ်တွေကို ကျိုင်းတုံ-တာချီလိတ်လမ်း၊ ကျိုင်းတုံ- တောင်ကြီးလမ်း၊ ကျိုင်းတုံ-မိုင်းခတ် လမ်း၊ ကျိုင်းတုံ- မိုင်းလား လမ်း၊ ကျိုင်းတုံ-လွယ်မွေ လမ်း တွေမှာ သွားရောက်စိုက်ထူထားဖို့ရှိတယ်လို့လည်း ဆိုပါတယ်။
အခုက ကျိုင်းတုံ-တာချီလိတ်လမ်း တနေရာဘဲ စိုက်ရသေးတယ်။ နောက်ထပ် ကျိုင်းတုံ-တောင်ကြီးအထွက်သွားလမ်းမှာသွားစိုက်ဖို့ စီစဉ်နေပါတယ်။ ဆိုင်းဘုတ်တခုကို ကျပ်သိန်း ၅၀ လောက်ကုန်မယ်လို့ ခန့်မှန်းထားတယ်။ အခုတောင်မှ ဒီတခုတည်းက ကျပ်သိန်း ရ၀ လောက်ကုန်နေပြီ- လို့ စိုင်းဆာမ်တစ်ဆေ ကပြောပါတယ်။
ဒီဆိုင်းဘုတ်ကို စက်တင်ဘာလကတည်းက စတင်လုပ်ဆောင်လာခဲ့တာဖြစ်ပါတယ်။
သျှမ်းပြည်နယ်အတွင်းရှိ မြို့ဝင်/ထွက် များရဲ့ ဆိုင်းဘုတ်တွေကို အများသုံး၊ ရုံးသုံးဖြစ်တဲ့ မြန်မာဘာသာ အပြင် သက်ဆိုင်ရာမြို့နယ်ရှိ ဒေသခံတိုင်းရင်းသားလူမျိုးတို့ရဲ့ ဘာသာစာပေတွေ ထည့်သွင်းရေးသား လိုက လွတ်လပ်စွာ ရေးသားနိုင်ကြောင်း သျှမ်းပြည်နယ်အစိုးရ စည်ပင်သာယာရေးဝန်ကြီးက ၂၀၁၆ ဂျွန်လက စာထုတ်ပြန်ထားဖူးပါတယ်။ အဲဒီအချိန်ကစပြီး တောင်ကြီးမြို့အပါအဝင် မြို့နယ်အများအပြားမှာ တိုင်းရင်းသားဘာသာစာပေတွေနဲ့ ရေးသားထားတဲ့ မြို့အဝင်အထွက် ဆိုင်းဘုတ်များ စိုက်ထူခဲ့ကြပါတယ်။
Leave a Comments