ဇန်နဝါရီလ နောက်ဆုံးအပတ်မှာ သျှမ်းပြည်တောင်ပိုင်းလင်းခေးမြို့မှာကျင်းပမယ့် သျှမ်းအမျိုးသားအဆင့် နိုင်ငံရေးဆွေးနွေးပွဲအကြို လူထုတွေ့ဆုံပွဲကို သျှမ်းပြည်ပြန်လည်ထူထောင်ရေးကောင်စီ သျှမ်းပြည်တပ်မတော် RCSS/SSA က ဦးစီးပြီး ဒီဇင်ဘာလ ၁၇ ရက်နေ့ကနေ ၂၄ ရက်နေ့အထိ သျှမ်းလူထုနဲ့ ကွင်းဆင်း တွေ့ဆုံ နေပါတယ်။ လက်ရှိတွေ့ဆုံမှု တွေထဲက ပင်လုံမြို့မှာပြုလုပ်တဲ့ တွေ့ဆုံပွဲကို အရှေ့အလယ်ပိုင်းတိုင်း စစ်ဌာန ချုပ်(ရလခ) စစ်တိုင်းမှူး ရဲ့ညွှန်ကြားချက်နဲ့ တပ်မတော်အင်အားသုံး တားမြစ်ပိတ်ပင်ခြင်း ခံနေရတာ တွေ လည်း ရှိနေပါတယ်။ ဒီအတွက် အသေးစိပ်သိရအောင်လို့ RCSS/SSA ရဲ့ ပြောခွင့်ပုဂ္ဂိုလ် ဗိုလ်မှူးကြီးစိုင်းဦး ကို သျှမ်းသံတော်ဆင့် ကနေ ဆက်သွယ်မေးမြန်းထားပါတယ်။
မေး။ ။ အခုလူထုတွေ့ဆုံပွဲအခြေအနေက ဘယ်အတိုင်းအတာအထိ ပြီးပြီလဲ။
ဖြေ။ ။ ကျနော်တို့မြောက်ပိုင်းအဖွဲ့ကတော့ ၅ နေရာသွားဖို့ရှိတယ်။ အခုက မူစယ်နဲ့သိန္နီမှာဘဲ။ ကျန်တာ ၃ နေရာရှိသေးတယ်။ ကျန်တဲ့ ၄ ဖွဲ့ကလည်း တနေရာစီဘဲ ပြီးသေးတယ်။ ၃၀ ရာခိုင်နှုန်းဘဲပြီးသေးတယ်။ မြောက်ပိုင်းက လားရှိုး ၊ မိုင်းရယ် ၊ ကျောက်မဲ ၃ နေရာကျန်တယ်။
မေး။ ။ သျှမ်းအမျိုးသားအဆင့်နိုင်ငံရေးဆွေးနွေးပွဲအကြို လူထုတွေ့ဆုံပွဲပင်လုံမှာ တပ်မတော်က ၀င်ရောက်တားဆီးတယ်။ တောင်ကြီးမှာလဲထပ်မလုပ်ဖို့ပြောတယ်။ ဒီအပေါ် ဘယ်လိုပြောချင်သလဲ။
ဖြေ။ ။ ကျနော်တို့ ဒီလူထုတွေ့ဆုံပွဲမလုပ်ခင် သျှမ်းပြည်နယ်ဝန်ကြီးချုပ်ဆီကိုလည်း အကြိုဆွေးနွေးပွဲတွေ လုပ်မယ့် အကြောင်း ၁၀ ရက်နေ့ရက်စွဲနဲ့စာတင်တယ်။ ပင်လုံမှာ တပ်ကလာပြီးတားမြစ် တာကတော့ အစိုးရပိုင်းက ဒီတပ်ဘက်ပိုင်းကိုပြန်ပြီးတော့ အကြောင်းကြားတာတွေသတင်းပို့တာတွေ မလုပ်လို့ဖြစ်တယ် လို့ဘဲထင်ပါတယ်။ ရလခတိုင်းက တိုင်းမှူးက သူကိုယ်တိုင်ကလည်း JMCS က ဥက္ကဌလည်းဖြစ်ပါတယ်။ နောက်ပြီး ဒီလိုလုပ်မယ့်ကိစ္စအတွက် JMC-U က စာပို့ထားတာညွှန်ကြားထားတာမှရှိဘူးလို့ကြားရတယ် ။
မေး။ ။ အခုလို တားမြစ်တဲ့အပေါ် ဘယ်လို် ဂယက်ရိုက်မှုတွေ ဖြစ်လာနိုင်ပါသလဲ။
ဖြေ။ ။ ကျနော်တို့ဒီလူထုတွေ့ဆုံပွဲက ၂၁ ရာစုပင်လုံညီလာခံမှာတင်ပြဖို့အတွက် အချက်အလက်တွေ ကိုစုဆောင်းခြင်းဖြစ်တယ်။ ပြည်သူလူထုအကြံဉာဏ်ကိုယူနေတာပါ ။တိုင်းပြည်အတွက် ငြိမ်းချမ်းရေးဖြစ်စဉ် အတွက် အထောက်အကူ ဖြစ်စေပါတယ်။ အဲလိုဟန့်တားခံရခြင်းအားဖြင့် ကျနော်တို့ သျှမ်းလူမျိုးတင်သာမက တိုင်းရင်းသားတွေအားလုံးက တပ်မတော်အပေါ်ယုံကြည်မှုကိုလျော့ပါးလာစေတယ်။ အမှန်ဆိုရင်ကျနော်တို့က ဒီနိုင်ငံရေးတွေ့ဆုံဆွေးနွေးပွဲ လုပ်နေတာက ကျနော်တို့ကဒီနိုင်ငံတည်ဆောက်ဖို့ ငြိမ်းချမ်းရေးတည်ဆောက် ဖို့ အတွက်လုပ်နေတာပါ။
မေး။ ။ ဒီလုပ်နေတဲ့ လုပ်ငန်းစဉ်အပေါ် ဘာများထပ်ပြောလိုပါသေးလဲ။
ဖြေ။ ။ ကျနော်တို့တွေ့မြင်သလောက်တော့ ဒီဆွေးနွေးပွဲလာတဲ့လူထုဟာ တင်ပြတယ် ။ ဆွေးနွေးတယ် အကြံပြုချက်တွေပေးတယ်။ အကြံပြုချက်တွေဟာလည်း ကျနော်တို့ သျှမ်းအမျိုးသားတွေအတွက် တော်တော် လေးကောင်းမွန်တဲ့အကြံပြုချက်တွေပေးတာတွေ့ရတယ်။ လာတက်တဲ့လူတွေကလည်း စိတ်ပါ၀င်စားစွာ နဲ့ဆွေးနွေး တာတွေ တွေ့ရပါတယ်။
ဟုတ်ကဲ့ကျေးဇူးတင်ပါတယ်။
လူထုထံ ကွင်းဆင်းတွေ့နေတဲ့ အဖွဲ့တွေဟာ လာမယ့် ဒီဇင်ဘာ ၂၅ ရက်နေ့ တောင်ကြီးမှာ ပြန်လည်တွေ့ဆုံဖို့ ချိန်းဆိုထားကြပေမယ့် RCSS အနေနဲ့ သတ်မှတ်ထားတဲ့နေရာမှ အပ နိုင်ငံရေးဆွေးနွေးပွဲ မလုပ်ဖို့ တောင်ကြီးအခြေစိုက် အရှေ့ပိုင်းတိုင်းစစ်ဌာနချုပ် တိုင်းမှူးက စာရေးအကြောင်းကြားထားတဲ့ အတွက် လုပ်ဖြစ်မယ်မလုပ်ဖြစ်မယ်။ မသေခြာတော့ပါဘူး။ တောင်ကြီးမှာ တွေ့ဆုံမှု မပြုနိုင်ရင် လင်းခေးမြို့မှာ ပြုလုပ်မယ့် သျှမ်းအမျိုးသားအဆင့်နိုင်ငံရေးဆွေးနွေးပွဲအတွက် အခက်အခဲ ဖြစ်နိုင်တယ်လို့ သုံးသပ်သူများ ကပြောဆိုနေကြပါတယ် ။
RCSS/SSA ဟာ ဦးသိန်းစိန်အစိုးရလက်ထက်ကတည်းက ဥပဒေပြင်ပအဖွဲ့အစည်းများစာရင်းကနေ ပယ်ဖျက်ထားတဲ့အဖွဲ့အစည်းဖြစ်တဲ့အပြင် တနိုင်ငံလုံးပစ်ခတ်တိုက်ခိုက်မှုရပ်စဲရေး သဘောတူ စာချုပ်လက်မှတ်ရေးထိုးထားတဲ့အဖွဲ့ဖြစ်ပါတယ်။
