သျှမ်းပြည်မြောက်ပိုင်း သီပေါမြို့နယ် နားမခေါ်အုပ်စုအတွင်း တိုက်ပွဲထပ်မံဖြစ်ပွါးရာ စစ်ဘေးရှောင် ၃၀၀ ကျော် နားမခေါ်ဘုန်းကြီးကျောင်းသို့ရောက်ရှိနေကြောင်းသိရသည်။

ဒီဇင်ဘာလ ၁၀ ရက် ယနေ့မနက် ၈ နာရီ ၄၅ မိနစ်က နားမခေါ်အုပ်စု ဟိုနားရွာအရှေ့ဘက် ၂ မိုင်ခန့်အကွာတွင် အစိုးရတပ်မတော် နှင့်လက်နက်ကိုင်အဖွဲ့တဖွဲ့တို့တိုက်ပွဲဖြစ်ပွါးခြင်းဖြစ်ကြောင်းသိရသည်။

နားမခေါ်ဘုန်းကြီးကျောင်းရောက် ဟိုနားရွာသားတဦးက – ဒီတခါတော့ သျှမ်းတပ်အချင်းချင်း မဟုတ်တော့ဘူး ။ အစိုးရတပ်နဲ့ လက်နက်ကိုင်တပ်ဖွဲ့တဖွဲဲ့။ SSPP/SSA နဲ့လား RCSS/SSA နဲ့လား သေချာမသိရဘူး။ ဒီဘက်မှာ က ၂ ဖွဲ့လုံးသွားလာနေတာကိုး။ အခုတော့ နားမခေါ်ကိုရောက်နေတာ စာရင်းအရ ၃၃၇ ယောက်ရှိပြီ ။ လမ်းမှာတဖွဲဖွဲလာနေတုန်း – ဟု သျှမ်းသံတော်ဆင့်အားပြောပြသည်။

အဆိုပါ သျှမ်းတပ် ၂ ဖွဲ့လှုပ်ရှားနေသော နားမခေါ်အုပ်စုဘက်သို့ အစိုးရတပ် စစ်ကြောင်း ၃ ကြောင်းဖြင့် အင်အားတိုးချဲ့လှုပ်ရှားနေသည်မှာ ဒီဇင်ဘာလဆန်းပိုင်းကတည်းကဖြစ်ကြောင်း ရွာသားများကပြောသည်။

အစိုးရတပ်က မိုင်းရယ်ဘက်ကလာတာ။ နားမခေါ်ဘက်ရောက်လာတာကြာပြီ၊ ဟိုနားရွာဘက်မှာတကြောင်း၊ တာ့လုံရွာဘက်မှာတကြောင်းနဲ့ ၀မ့်ဟုမ့်ရွာဘက်မှာတကြောင်းလှုပ်ရှားနေတယ်။ ဒီတိုက်ပွဲက ဟိုနားရွာက စစ်ကြောင်းက အင်အားဖြည့်ပြီးထပ်တက်လာလို့ လက်နက်ကိုင်အဖွဲ့တဖွဲ့ကနေ ခြုံခိုပစ်ခတ်တာလို့ ကြားရပါတယ်။ ဒါမယ့်ဘယ်အဖွဲ့ဆိုတာ သေသေချာချာ အတည်ပြုချက်မရသေးဘူး- ဟု ဟိုနားရွာသားက ဆက်လက်ပြောပြသည်။

အဆိုပါအစိုးရစစ်ကြောင်းသည် ဟိုနားရွာသား၏ ထော်လာဂျီ ၃ စင်းကို ချောဆွဲကာ စစ်အင်အားများ တင် ဆောင်ပြီး ဟိုနားရွာအရှေ့ဘက်သို့တက်သွားစဉ်ချောင်းမြောင်းပစ်ခတ်ခံရခြင်းဖြစ်ကြောင်း လက်ရှိတွင် ထော်လာဂျီယာဉ်မောင်းမှာ ရှာမတွေ့သေးကြောင်း၊ ထွက်ပြေးနေသည်ဟုယူဆရကြောင်း သိရသည်။ တိုက်ပွဲအတွင်းအစိုးရတပ်ဘက်မှ တပ်သား ၂ ဦးသေဆုံးကြောင်းသိရသည်။

ယနေ့အစိုးရတပ်နှင့်တိုက်ပွဲဖြစ်ပွါးသောတပ်ဖွဲ့မှာ SSPP/SSA ဖြစ်ကြောင်း RCSS/SSA ပိုင် Taifreedom ၀က်ပ်ဆိုက်တွင်သတင်းထုတ်ပြန်ထားသော်လည်း SSPP/SSA နှင့်ဆက်သွယ်၍ မရသဖြင့်အတည်ပြုချက်မရခဲ့ပေ။
ပြီးခဲ့သည့် နို၀င်ဘာလ နှောင်းပိုင်းကစပြီး နားမခေါ်အုပ်စုအတွင်း မြောက်ပိုင်းမဟာမိတ်တပ်ဖွဲ့နှင့် RCSS/SSA တို့တိုက်ပွဲများ ဖြစ်ပွါးကာ စစ်ရေးတင်းမာသဖြင့် မန်စန်းနှင့် နားမခေါ်ဘုန်းကြီးကျောင်းသို့ စစ်ဘေးရှောင် ၈၀၀ ကျော်ခိုလှုံခဲ့ကြသည်။ အဆိုပါစစ်ဘေးရှောင်းများသည် ယမန်နေ့ကပင်နေရပ်သို့အသီးသီးပြန်သွားကြခြင်းဖြစ်သည်။

နားမခေါ်ရွာ သည် သီပေါမြို့နယ်၏ တောင်ဘက်တွင်တည်ရှိပြီး အဆိုပါရွာတဝိုက်တွင် အစိုးရတပ်၊ RCSS နဲ့ SSPP တို့လှုပ်ရှားသွားလာပါသည်။