သျှမ်းပြည်မြောက်ပိုင်းသီပေါမြို့နယ် နောင်ကော့ရွာဘုန်းကြီးကျောင်းရောက်စစ်ဘေးရှောင်များ နေရပ်သို့ပြန်သွားကြပြီဖြစ်သော်လည်း စစ်ရေးတင်းမာနေဆဲဖြစ်သဖြင့် ထပ်မံထွက်ပြေးလာ သူများလည်းရှိကြောင်းသိရသည်။
နောင်ကော့ရွာဘုန်းကြီးကျောင်းရောက်စစ်ဘေးရှောင် ၄၀၀ ကျော်မှာ ခိုင်းဟျိုးရွာ၊ ကုန်းဆော့ရွာမှ ရွာသားများဖြစ်ကြပြီး ဒီဇင်ဘာလ ၅ ရက်နှင့် ၆ ရက်နေ့က နေရပ်သို့ ပြန်သွားကြခြင်းဖြစ်ကြောင်း သိရသည်။
“အခြေအနေက ငြိမ်ပြီလားဆိုတော့လည်း ကောင်းကောင်းတော့မငြိမ်သေးဘူးပေါ့နော်။ စစ်ရေးကတင်းမာနေသေးတယ်။ ၅ ရက်နေ့က ၃၀၀ ကျော်ပြန်သွားတယ်။ မနေ့ကကျတော့ ၀မ့်ဆော့ရွာသား ၃၂ ယောက်က စပါးတွေယူရမယ်ဆိုပြီးထပ်ပြန်သွားတယ်။ ခြံထွက်တွေယူရမယ်ဆိုတော့ စိတ်ပူလို့လေ ပြန်သွားကြတာ။ သူတို့ပြန်သွားကြပြီးမကြာခင်မှာဘဲ မန့်စန်းကျောင်းမှာ စစ်ဘေးရှောင်တွေထပ်ရောက်လာတယ်လို့ကြားမိတယ် ”- ဟု စစ်ဘေးရှောင်ကူညီမှုများပေးနေသည့် ဒေသခံလူငယ် တဦးကသျှမ်းသံတော်ဆင့်အားပြောသည်။
ဒီဇင်ဘာ ၆ ရက် မွန်းလွဲ ၂ နာရီခန့်တွင် မန်စန်းဘုန်းကြီးကျောင်းသို့ရောက်ရှိလာသောစစ်ဘေးရှောင်များမှာ ကောင်းဝိန်းရွာမှ ရွာသား ၃၉ ယောက်ဖြစ်ကြောင်းသိရသည်။
ဒီဇင်ဘာလ ၄ ရက်နေ့က ပစ်ခတ်တိုက်ခိုက်မှုများကြောင်း မန်စန်းဘုန်းကြီးကျောင်းသို့ဒေသခံရွာသား စုစုပေါင်းစစ်ဘေးရှောင် ၄၃၈ ဦးနှင့် မန်စန်းဘူတာဘုန်းကြီးကျောင်းသို့ ၅၀ ကျော် ရောက်ရှိခိုလှုံနေခဲ့ကြသည်။
၄င်းစစ်ဘေးရှောင်များမှာ ၀မ့်နား၊ ၀မ့်ခုမ်၊ ၀မ့်နိုင်းလုံ၊ ၀မ့်ကျောင်းနှင့် ၀မ့်ကောင်းဝိန်းရွာတို့မှစစ်ဘေးရှောင်များဖြစ်ပြီး ကြောင်းသိရသည်။
ထိုဒေသတွင်စစ်ရေးတင်းမာနေသော လက်နက်ကိုင်တပ်ဖွဲ့များမှာ မြောက်ပိုင်းမဟာမိတ်တပ်ဖွဲ့ဝင် SSPP/SSA နှင့် RCSS/SSA တို့ဖြစ်ကြောင်းသိရသည်။
