သျှမ်းပြည်နယ် ကျောက်မဲမြို့ စခန်းသာ ကျေးရွာ အနီး ပြည်ထောင်စု လမ်းမပေါ် တွင် ယမန်နေ့ ည ၉ နာရီဝန်း ကျင်က နွားတင်ဆောင်လာသည့် ကားပစ်ခတ်မှုခံရသဖြင့် ယာဉ်မောင်းတဦးနှင့် ယာဉ်နောက်လိုက် ၂ ဦး ဒဏ်ရကြောင်း သိရ သည်။

ဖြစ်စဉ်မှာ ယမန်နေ့ တွင် တရုတ်နယ်စပ်သို့ ပို့ဆောင်မည့် နွားများတင်လာသည့် ကုန်ကား ၅ စီးသည် ကျောက် မဲမြို့နှင့် ၆ မိုင်ခန့် ဝေးကွာသည့် စခန်းသာကျေးရွာ အနီးတွင် ပစ်ခံရကြောင်း၊ နွားကားများ နောက်တွင် တပ်မ တော် လုံခြုံရေး ကားတစီးကပ်ပါလာသဖြင့် လက်နက်ကိုင်နှင့် တပ်မတော်တို့ ထိတွေ့မှု အနည်းငယ်ဖြစ်ပွား ခဲ့သေး ကြောင်း ကျောက်မဲမြို့ ဇီဝိတ လူမှုကူညီရေးအသင်း မှ ဦးတင်မောင်သိန်း က သျှမ်းသံတော်ဆင့်သို့ ပြောသည်။

“တိုင်းရင်းသားလက်နက်ကိုင်ကတော့ ဘယ်အဖွဲ့ဆိုတာ မသိဘူး။ ရှေ့ဆုံးနွားကားပဲ ပစ်ခံရတာ။ ကားသမား ကတော့ လက်မောင်းနဲ့ နားထင် သေနတ်မှန်တယ်။ ကျန် ယာဉ်နောက်လိုက် ၂ ဦးက ခြေထောက်ထိသွားတယ်” ဟု ဦးတင်မောင်သိန်း က ဆိုသည်။

သေနတ်ထိမှန်သည့် ယာဉ်မောင်းနှင့် ယာဉ်နောက်လိုက်တို့၏ ဒဏ်ရာမှာ စိုးရိမ်စရာ မရှိကြောင်းလည်း ဦးတင်မောင်သိန်း က ထပ်လောင်းပြောသည်။

ကျောက်မဲမြို့နယ် အတွင်း နွားတင်ကားပစ်ခံရမှုသည် ဇွန် ၁၂ ရက်နေ့တွင် တကြိမ်ဖြစ်ပွားကာ ယာဉ်မောင်းတဦး နှင့် ယာဉ်နောက်လိုက် တဦး ဒဏ်ရာရ၊ ဇွန် ၂၉ ရက်နေ့တွင် တကြိမ်၊ နိုဝင်ဘာ ၅ရက်တွင် နွားတင်လာသည့် သုံးဘီး ဆိုင်ကယ် တစီးပစ်ခံရပြီး ဆိုင်ကယ်သမား ပွဲချင်းပြီးသေဆုံးခဲ့ကြောင်းသိရသည်။