သျှမ်းပြည်မြောက်ပိုင်း လားရှိုးမြို့တွင် တနင်္ဂနွေနေ့က တပ်မတော်ထောက်ခံပွဲ တရပ်ပြုလုပ်ခဲ့ရာ ပါ၀င်တက်ရောက်လာသူ ၁၀၀၀ ကျော်ရှိကြောင်းသိရသည်။

နို၀င်ဘာလ ၂၅ ရက် မနက်ပိုင်း ၉ နာရီက လားရှိုး၊ မိုင်းရယ်၊ သိန္နီ ၊ နောင်ချို၊ ကျောက်မဲ၊ သီပေါ၊ ကွတ်ခိုင် အပြင် မြို့နယ်တော်တော်များများက ဒေသခံ ၁၀၀၀ ကျော်မှာ တပ်မတော်ထောက်ခံပွဲ လမ်းလျှောက်ချီတက်ပွဲအတွက် လားရှိုးမြို့ စစ်မှုထမ်းဟောင်းအဖွဲ့နှင့် အားဖြည့်ပူးပေါင်းရန်  တဦးကျပ် ငါးထောင်အထိ ပါတီကြီးတခုက  ပေးသည်ဟု သိရသည်။

လမ်းလျှောက်ချီတက်ပွဲတွင်ပါ၀င်သောမိုင်းရယ်ဒေသခံတဦးက – “ကျမ မိုင်းရယ်ဒေသခံပါ။ ကြံ့ခိုင်ရေးပါတီက ဆင့်ခေါ်လိုက်တာပါ။ သူများအော်တာလိုက်အော်ရင်ရပြီဆိုပြီး လမ်းစရိတ်ကို ကြ့ံခိုင်ရေးပါတီက တယောက် ၅၀၀၀ ထွက်ပေးတယ်။” – ဟု သျှမ်းသံတော်ဆင့်အားပြောသည်။

အလားတူ သိန္နီမှလာသော ဒေသခံအမျိုးသမီးတဦးကလည်း-“ ဒို့အရေး အော်ဖို့ခေါ်လာတာ။ လမ်းစရိတ် ၂၀၀၀ ပေးတယ်။ ရွာမှာတုန်းက တယောက် ၅၀၀၀ ပေးတယ်။ ကြ့ံခိုင်ရေးပါတီက ခေါ်လာတာ”- ဟု ပြောသည်။

လားရှိုးမြို့တော်ခန်းမ မှလားရှိုးကြီးဘော်လုံးကွင်းအထိ တပ်မတော်ထောက်ခံခြင်း လမ်းလျှောက်ချီတက် ခဲ့ကြပြီး အများစုမှာ စစ်မှုထမ်းဟောင်းမိသားစုဝင်များနှင့် စစ်တပ်မိသားစုဝင်များ ဖြစ်ကြကြောင်းသိရသည်။

တပ်မတော်ထောက်ခံသူများမှာ တိုင်းရင်းသားစည်းလုံးညီညွတ်မှုမပြိုကွဲရေး ဒို့အရေး၊ မြန်မာနိုင်ငံစစ်မှု ထမ်း ဟောင်းအဖွဲ့၊ စစ်မှုထမ်းဟောင်းများ၏ တပ်မတော်ကိုထောက်ခံခြင်းနှင့် ပြင်ပ စွက်ဖက်လုပ်ဆောင်မှုများအား ဆန့်ကျင်သည့်ဆန္ဒဖော်ထုတ်ပွဲ – အစရှိ ဗီနိုင်းများ ကိုင်ဆောင်ကာ ဒို့တာဝန်အရေးသုံးပါးကို အော်ဟစ်ကြွေးကြော်ခဲ့ကြကြောင်းသိရသည်။

နို၀င်ဘာလဆန်းပိုင်းကစပြီး တပ်မတော်ထောက်ခံပွဲများကို သျှမ်းပြည်တွင်း မြို့တော်တောင်ကြီးအပါအဝင် ကျိုင်းတုံ၊ နမ့်စန် နှင့်တခြားမြို့တို့တွင်ပြုလုပ်ခဲ့ကြကြောင်းသိရသည်။