သျှမ်းပြည်မြောက်ပိုင်း သီပေါမြို့နယ်အတွင်း အစိုးရတပ်မတော်နှင့် သျှမ်းပြည်တိုးတက်ရေးပါတီ သျှမ်းပြည်တပ်မတော် SSPP/SSA တို့ပစ်ခတ်မှုဖြစ်ပွါးရာ ဒေသခံ ၅၀၀ ကျော်နေရပ်မှစွန့်ခွါကာ ဘုန်းကြီးကျောင်းသို့စစ်ဘေး ရှောင်ခိုလှုံ နေကြကြောင်းသိရသည်။
နို၀င်ဘာလ ၁၃ ရက်မွန်းတည့်ချိန်က သီပေါမြို့နယ် နားမခေါ်အုပ်စု နားမခေါ်ရွာနှင့် နားလော့ရွာကြား အစိုးရတပ်မတော် စကခ ၁ လက်အောက်ခံ ခမရ ၅၀၁ တပ်မှ တပ်ဖွဲ့တဖွဲ့နှင့် SSPP/SSA တို့ တိုက်ပွဲဖြစ်ပွါးရာ ဒေသခံရွာသား ၅၀၀ မှာ နေရပ်မှစွန့်ခွါကာစစ်ဘေးရှောင်ခိုလှုံနေရခြင်းဖြစ်သည်။
“တိုက်ပွဲက ၄၅ မိနစ်လောက်ကြာတယ် ။ ပြီးတော့ ၂ ဘက်တပ်တွေဆုတ်သွားတယ်။ SSPP/SSA တပ်တွေလှုပ်ရှားတဲ့ တောထဲကိုအစိုးရတပ်ဝင်သွားတော့ ပစ်ခတ်မိတော့တာပေါ့။ ရွာသားတွေကဘယ်နေရဲတော့မလဲ။ နမ့်လန်ဘက်လည်းသွားတယ်၊ မိန်းခေးဘက်လည်းတက်သွားတယ်။ နားအုံရွာဘက်လည်း ရောက်လာတယ်။ နားအုံဘုန်းကြီးကျောင်းမှာရောက်နေတယ်။ “– ဟု နားအုံရွာ ဘုန်းတော်ကြီးကျောင်းရောက်စစ်ဘေးရှောင်များအား ကူညီမှုပေးနေသည့် ဒေသခံလူငယ်တဦးကပြောသည်။
ယခုမနက်ပိုင်းတွင်မူ စစ်ဘေးရှောင်တချို့နေရပ်ပြန်ပြီဖြစ်သော်လည်း နားအုံရွာရောက်စစ်ဘေးရှောင် ၂၀၀ ကျော်မှာနေရပ်မပြန်ရဲကြသေးကြောင်း၊ အခြေအနေငြိမ်သက်ကောင်းမွန်ပါက နေရပ်ပြန်လိုကြကြောင်းစစ်ဘေးရှောင်ရွာသားများကပြောသည်။
လက်ရှိတွင် သီပေါမြို့နယ် နားအုံရွာဘုန်းကြီးကျောင်းသို့ရောက်ရှိနေသော စစ်ဘေးရှောင်များမှာ ၀မ့်နားရွာနှင့် နားလော့ရွာ ၂ ရွာမှ ရွာသား ၂၆၀ ကျော် ဖြစ်ကြောင်း သိရသည်။
နားအုံရွာသည် စယ်ခန်အုပ်စုအတွင်းပါ၀င်ပါသည်။
အဆိုပါဒေသတို့တွင် အစိုးရတပ်အပြင် သျှမ်းတပ်ဖွဲ့ ၂ ဖွဲ့တို့ပါလှုပ်ရှားသည့်ဒေသဖြစ်သည်။ ပြီးခဲ့သည့်အပတ်ကလည်း မြောက်ပိုင်းမဟာမိတ်တပ်ဖွဲ့နှင့် RCSS/SSA တို့အကြားတိုက်ပွဲများဖြစ်ပွါးခဲ့သဖြင့်ရွာသားများ နားမခေါ်ဘုန်းကြီးကျောင်းသို့ စစ်ဘေးရှောင်ခိုလှုံရာမှ မကြာသေးခင်ကပင်နေရပ်သို့အသီးသီးပြန်သွားကြသည်။
Leave a Comments