သျှမ်းပြည် မြောက်ပိုင်း မူဆယ်မြို့ စွမ်စော်ရပ်ကွက်တွင် ပေါက်ကွဲမှု ဖြစ်ပွားကာ ကလေးငယ်တဦး သေဆုံးပြီး၊ တဦး ဒဏ်ရာ ရရှိကြောင်း သတင်း ရရှိသည်။
တစ်ဦး ဒါဏ်ရာရ
ယနေ့ နိုဝင်ဘာ ၁၁ ရက် နေ့လည် ၁ နာရီ ကျော်တွင် မူဆယ်မြို့ စွမ်စော်ရပ်ကွက် ၃ လမ်း ပလပ်စတစ် ကောက်သည့် အရပ်သားများ နေအိမ်အပြင် တွင်ကလေးငယ် ၂ ဦးဆော့ကစားနေစဉ် မိုင်းပေါက်ကွဲမှုဖြစ်ပွားပြီး အသက် ၁၁ နှစ်အရွယ် ကလေး တဦးသေဆုံးကာ အသက် ၁၂ နှစ်အရွယ် ကလေး တဦးမှာ ဒဏ်ရာရရှိကြောင်း မူဆယ် ဂရုဏာလူမှုရေးအသင်းမှ ဦးသောင်းထွန်း က သျှမ်းသံတော်ဆင့်သို့ ပြောသည်။
“ ကလေးတွေ အိမ်ခြံအပြင်မှာ ဆော့နေချိန် ပေါက်ကွဲတာ။ အသက် ၁၁နှစ်အရွယ် ကလေးက ညာလက်ပြတ်၊ ညာခြေထိ မျက်နှာ ခေါင်းတခြမ်းထိ သေဆုံးတယ်။ အသက် ၁၂အရွယ် ကလေးကတော့ လည်ပင်း၊ ခြေထောက် ဝမ်းဗိုက် နံဘေးထိတယ်။ ခွဲခန်းဝင်နေတယ်။ ဒဏ်ရာ က မစိုးရိမ်ရဘူး ” ဟု ဦးသောင်းထွန်းက ပြောသည်။
ပေါက်ကွဲသည့် မိုင်း အမျိုးအစားကို သေချာ မသိရှိသေးကြောင်း၊ အဆိုပါ ပေါက်ကွဲသည့် မိုင်းစ ကို စစ်တပ်မှ စစ်ဆေးမှု ဟုလည်း ဦးသောင်းထွန်း က ထပ်လောင်းပြောသည်။
ယခုနှစ် စက်တင်ဘာ ၁၉ ရက် တွင်လည်း မူဆယ်မြို့နယ် နမ့်တောင်း ကျေးရွာ နှင့် ပန်ဆိုင်း မြို့ အကြားပြည်ထောင်စုလမ်း ပေါ်တွင် အမျိုးသမီး ၂ဦး မိုင်းနင်းမိကာ တဦးသေဆုံးပြီး တဦး ဒဏ်ရာရရှိခဲ့သည်။
တရုတ်နယ်စပ် မူဆယ် မြို့ သည် စီးပွားရေးမြို့တော် ဖြစ်သည့် အလျောက် ပြည်သူ့စစ်များ၊ အစိုးရ ရဲဌာန များ နှင့် အစိုးရ စစ်တပ်မတော် တပ်ရင်းများ ရှိသော်လည်း လုယက်မှု၊ ပေါက်ကွဲမှု၊ ပစ်ခတ်မှုများ မကြာခဏ ဖြစ်ပွားသည့် ဒေသဖြစ်သည်။
Leave a Comments