ထိုင်းနိုင်ငံ ချင်းမိုင်မြို့ရောက် သျှမ်းပြည်မြောက်ပိုင်း ကျောက်မဲ တရွာတည်းသား နှစ်ဦး ပိုက်ဆံ ၂ ထောင် ချေးယူကာ ဆိုင်ကယ်ဝယ်စီးရာမှ အချင်းချင်း အခြေအတင်စကားများပြီး ခိုက်ရန်ဖြစ်ပွါးရာကာ ဓါးထိုးသတ်မှု ဖြစ်ပွါးခဲ့သည်။

ဒီဇင်ဘာလ ၁၆ ရက်နေ့ ည ၈ နာရီခန့်က ထိုင်းနိုင်ငံ ချင်းမိုင်မြို့ခရိုင် ဆန်ဆိုင်းမြို့နယ် နောင်ယိုင် ရပ်ကွက်တွင်အလုပ်လုပ်သော သျှမ်းပြည်မြောက်ပိုင်း ကျောက်မဲမြို့နယ် မိုင်းတန်အုပ်စု နေ ရွှေ့ပြောင်း အလုပ်သမား စိုင်းမြအောင် (ခ) စိုင်းငဲအား တရွာတည်းသား စိုင်းတောင်မှ ဓါးထိုးသတ်ဖြတ်ခြင်း ဖြစ်ကြောင်းသိရသည်။

သေဆုံးသူ စိုင်းမြအောင်၏ဇနီး နန်းပွင့်က – ပြီးခဲ့တဲ့နှစ်ကတည်းက စိုင်းတောင်က ကျမယောက်ျားဆီက ပိုက်ဆံ ၂ ထောင်ဘတ်ချေးပြီး ဆိုင်ကယ်ဝယ်တယ်။ သူဆိုင်ကယ်သော့ ၂ ချောင်းရှိတာကိုကျမယောက်ျားက ၁ ချောင်းယူထားတယ်။ ပိုက်ဆံ ၂ ထောင်ပြန်ဆပ်မှ ဆိုင်ကယ်သော့ပြန်ပေးမယ်လို့ သဘောတူထားပြီး ပေးထားတာ။ အခုက ပိုက်ဆံလည်းပြန်မပေးတဲ့အပြင် သော့ပါထပ်လာလာတောင်းရာကနေ စကားများကြတာ။ ကျမယောကျားကသော့မပေးလို့ စိုင်းတောင်က ကျမယောကျားကိုဓါးထိုးပြီး ထွက်ပြေးတယ်။ ဓါးဒဏ်ရာနဲ့ စိုင်းတောင်နောက်ပြေးလိုက်ပြီး လမ်းထိပ်မှာ မှောက်ကျသေဆုံးသွားတာ – ဟု သျှမ်းသံတော်ဆင့်အား ပြောပြသည်။

လက်ရှိတွင် ဓါးထိုးသတ်သည့်တရားခံစိုင်းတောင်မှာ ထွက်ပြေးလွတ်မြောက်နေပြီး အရေးယူပေးပါရန် သေဆုံးသူ၏ဇနီးနန်းပွင့် က ချင်းမိုင်မြို့ ရဲစခန်းသို့တိုင်ကြားထားကြောင်းသိရသည်။

သေဆုံးသူ၏အလောင်းကိုမူ ချင်းမိုင်မြို့ ၀ပ်ပါပေါက် ဘုန်းကြီးကျောင်းတွင် ထားရှိပြီး လာမည့် ဗုဒ္ဓဟူးနေ့ ဒီဇင်ဘာလ ၂၀ ရက်နေ့တွင် သဂြိုဟ်မည်ဖြစ်ကြောင်း ချင်းမိုင်မြို့ သာရေးနာရေးကူညီမှုသျှမ်းအသင်းမှ စိုင်းလိန်ခမ်းကပြောသည်။

တကယ်တော့ ကျနော်တို့ ရွှေ့ပြောင်းအလုပ်သားအချင်းချင်းဘဲလေနော်။ ကောင်းကောင်းမွန်မွန် ပြောဆို ဆွေးနွေးပြီးတော့ ဖြေရှင်းသင့်တာပေါ့။ အခုလိုမိဝေးဖဝေး နေရသာမက သေဆုံးသူကလည်း လူမမယ် ကလေးလေး ၂ ယောက်ရှိနေတော့ ကျန်ရစ်သူက ဒီကိစ္စအတွက်အခက်အခဲတွေတအားဖြစ်ရတယ်။ – ဟု စိုင်းလိန်ခမ်းကပြောသည်။

သေဆုံးသူ စိုင်းမြအောင် အသက် ၄၆ နှစ်သည် သျှမ်းပြည်မြောက်ပိုင်းကျောက်မဲမြို့နယ် မိုင်းတန်အုပ်စု လွယ်အွယ့်ရွာနေ ဦးလုံးလှ ပါဆွေမြင့်တို့၏သားဖြစ်ပြီး ဇနီးနန်းပွင့်နှင့်အတူ သား ၂ ဦးရှိပါသည်။ ဓါးထိုးသတ်သူ စိုင်းတောင်မှာလည်း အလားတူ မုံးတန်အုပ်စုသား နားမွန်းရွာသားတဦးဖြစ်ကြောင်း သိရသည်။