သျှမ်းပြည်မြောက်ပိုင်း လားရှိုးမြို့နယ် မန်ဆူဘုန်းကြီးကျောင်းတွင်ရောက်ရှိခိုလှုံနေသော လားရှိုးမြို့နှင့် နမ္မတူမြို့ ကျေးလက်များမှ စစ်ဘေးရှောင်များ နေရပ်ပြန်ကုန်ကြပြီဖြစ်ကြောင်းသိရသည်။
လားရှိုးမြို့နယ် မန်ဆူဘုန်းကြီးကျောင်းသို့ရောက်ရှိနေသော အီနိုင်းအုပ်စု ပန်ဟုန်းရွာ၊ ၀မ့်ပိန်းရွာ၊ ၀မ့်နားဟာရွာ၊ ၁၃ မိုင်ရွာ၊ ၁၅ မိုင်ရွာ တို့မှရွာသားများ၊ နမ္မတူမြို့နယ် နားဆိုင်းအုပ်စု မိုင်းတောင်ရွာမှ ရွာသားများ စုစုပေါင်း ၁၀၀၀ ကျော်မှာ နို၀င်ဘာလ ၂ ရက် နေ့က နေရပ်ရင်းသို့ပြန်သွားကြ ပြီဖြစ်သည်။
နေရပ်ပြန်မည့် မန့်ပိန်းရွာမှ ရွာသားတဦးက -“ ကျနော်တို့ရွာမှာကျန်ခဲ့တဲ့အကြီးအကဲတွေက တိုက်ပွဲသံငြိမ်သွားပြီ အခြေအနေကောင်းသွားပြီ ပြန်လာတော့ဆိုလို့ ကျနော်တို့လည်း ရွာပြန်တော့မှာဖြစ်တယ်။ ကျနော်တို့ခြံထဲက မဆွတ်ရသေးတဲ့အသီးအနှံတွေကိုစိတ်ပူတယ်။ ဟုတ်ကဲ့မန်ဆူကျောင်းရောက်နေတဲ့သူတွေ အကုန်လုံးပြန်ကုန်ပါပြီ ။ ကျနော်တို့ကိုအစစ အရာရာကူညီပေးတဲ့ တာဝန်ရှိသူအားလုံးအဖွဲ့အစည်းအားလုံး ကိုကျေးဇူးအထူးတင်ရှိပါတယ် ” – ဟု သျှမ်းသံတော်ဆင့်အားပြောသည်။
မြောက်ပိုင်းမဟာမိတ်တပ်ဖွဲ့နှင့် RCSS/SSA တို့ကြားစစ်ရေးတင်းမာမှုကြောင့် လားရှိုးမြို့အနောက်မြောက် ဘက် အီနိုင်းအုပ်စုမှဒေသခံ ၁၁၀၀ ကျော်မှာ အောက်တိုဘာလ ၂၉ ရက်နေ့က မန်ဆူဘုန်းကြီးကျောင်း သို့ရောက်ခိုလှုံနေကြခြင်းဖြစ်သည်။
မန်ဆူဘုန်းကြီးကျောင်းမှဒေသခံများ နေရပ်ရင်းသို့ပြန်သွားကြပြီဖြစ်သော်လည်း သီပေါမြို့နယ်အတွင်း နို၀င်ဘာလ ၁ ရက်နေ့မနက်ပိုင်းက မြောက်ပိုင်းမဟာမိတ်တပ်ဖွဲ့နှင့် RCSS/SSA တို့ကြားတိုက်ပွဲကြောင့် သီပေါမြို့နယ် ၀မ့်ဆန်းအုပ်စု ၀မ့်ကောင်းဝိန်း၊ ၀မ့်ခုမ်၊ ၀မ့်ပိန်းဆာနှင့် ၀မ့်မိုင်ရွာများမှ ရွာသား ၃၀၀ ကျော်မှာ သီပေါမြို့နယ်တာတေဘုန်းကြီးကျောင်းသို့ရောက်ရှိခိုလှုံနေခဲ့ကြသည်။
နို၀င်ဘာလ ၂ ရက်နေ့တွင်မူ သီပေါမြို့နယ် နားမခေါ်အုပ်စုဘက် တိုက်ပွဲများဖြစ်ပွါးသဖြင့် ၀မ့်နိုင်းလုံ၊ ၀မ့်ဟုမ့်ရွာ၊ ၀မ့်တာ့လုံရွာ၊ ၀မ့်ဟိုနားရွာတို့မှ ဒေသခံ ၆၀၀ ကျော်မှာ နားမခေါ်ဘုန်းကြီးကျောင်းသို့ ရောက်ရှိခိုလှုံ နေခဲ့ကြသည်။
