သျှမ်းအမျိုးသားအဆင့်နိုင်ငံရေးဆွေးနွေးပွဲအကြို ပင်လုံလူထုတွေ့ဆုံပွဲအား ယမန်နေ့က တပ်မတော်မှ တားမြစ်ခဲ့သော်လည်း ယနေ့ အခြားမြို့များတွင် အစီအစဉ်အတိုင်း ဆက်လက်တွေ့ဆုံ မှုပြုသွားကြောင်း သိရသည်။

ဒီဇင်ဘာလ ၁၈ ရက်နေ့တွင် လူထုတွေ့ဆုံမှု ကိုယ်စားလှယ်အဖွဲ့များက သျှမ်းပြည်တောင်ပိုင်း ၊မြောက်ပိုင်းတို့တွင် ဆက်လက်တွေ့ဆုံမှုပြုနေရာ လင်းခေးခရိုင် လင်းခေးမြို့နယ် နှင့် မူစယ်ခရိုင် မူစယ်မြို့နယ်တို့တွင် ဒေသခံလူထုနှင့်တွေ့ဆုံပြုသွားကြောင်း ဆိုပါသည်။

လင်းခေးမြို့နယ် ပင်ဝေါင်ရပ်ကွက် ဓမ္မရက္ခိတကျောင်းတိုက်တွင် ယနေ့ကျင်းပသည့် လူထုတွေ့ဆုံပွဲသို့ ဒေသခံလူထု ၂၀၀ ခန့် တက်ရောက်ဆွေးနွေးသွားကြောင်း၊ထိုဆွေးနွေးပွဲသို့ ဒေသတွင်းရဲတပ်သားသုံးဦးက အရပ်ဝတ်ဖြင့်ဆွေးနွေးပွဲပြီးသည်အထိ ထိုင်စောင့်နားထောင်မှတ်ယူသွားကြောင်းသိရသည်။

နံနက်ပိုင်းတွင် ကိုယ်စားလှယ်အဖွဲ့က ဒေသခံလူထုအား နိုင်ငံရေး၊ လုံခြုံရေး၊ စီးပွားရေး၊ လူမှုရေး၊ မြေယာနှင့်သဘာဝ သယံဇာတ ခေါင်းစဉ် ၅ နှင့်ပတ်သက်၍ ရှင်းလင်းပြခဲ့ပြီး မွန်းလွဲပိုင်းတွင်မူ ဒေသခံလူထုနှင့်မေးမြန်းပြောဆိုမှုရှိခဲ့ကြောင်း လင်းခေးဒေသခံ ဦးလုံးနန္တာကပြောသည်။

လူထုရဲ့ အဓိကတောင်းဆိုချက်ကတော့- ဖေဖော်ဝါရီလ ရ ကိုတရားဝင်ရုံးပိတ်ရက်အဖြစ်သတ်မှတ်ရန်၊ သျှမ်းစာပေကို ကျောင်းချိန်အတွင်း ဘာသာရပ်တစ်ခုအဖြစ်တရားဝင်သင်ကြားခွင့်ရရန် စတာ တွေ ပေါ့။ နောက်တခုက အပစ်ရပ်ကြပြီဆိုပေမယ့် တိုက်ပွဲတွေဖြစ်နေတုန်းဘဲ။ လူထုအေးချမ်းမှုမရသေးဘူး။ အဲတာဘယ်လိုသဘောလဲ..စတာတွေကိုတင်ပြတယ် မေးမြန်းကြတယ်။ အေးအေးဆေးဆေးပါဘဲလင်းခေး တွေ့ဆုံပွဲက – ဟု ပြည်နယ်လွှတ်တော်အမတ် စိုင်းအောင်မျိုးကျော်ကပြောသည်။

အဆိုပါတွေ့ဆုံပွဲသို့ လင်းခေးမြို့နယ်၊ မိုင်းပန်မြို့နယ်၊ မောက်မယ်မြို့နယ် ၊ မိုးနဲမြို့နယ်၊ ဟိုမိန်း၊ ကျိုင်းတောင်း နှင့် ၀မ့်ဟတ်တိုက်နယ်တို့မှ ဒေသခံ ၂၀၀ ခန့် တက်ရောက် ကြကြောင်း သိရသည်။

လင်းခေးလူထုနှင့် တွေ့ဆုံပွဲတွင်မူ တပ်မတော်ဘက်မှ တားဆီးနှောင့်ယှက်မှုမရှိသော်လည်း ဆွေးနွေးပွဲသို့ အရပ်ဝတ်ဖြင့်ရဲ ထောက်လှမ်းရေး ၃ ဦးက အထက်အမိန့်အရဟုဆိုကာ လာရောက်နားထောင် သွားကြောင်း – ပါ၀င်ကူညီသူတဦးကပြောသည်။

အချက် ၅ ချက်စလုံး ပြည့်ပြည့်စုံစုံလေးတင်ပြသွားတာကတော့ မိုင်းပန်ကလာတဲ့ကိုယ်စားလှယ် တွေပေါ့။ ထိုင်းမှာသွားရောက်အလုပ်လုပ်ကိုင်ပြီးနေရပ်ပြန်မယ့် သျှမ်းပြည်သားတွေအတွက် နေထိုင် စားသောက်မှုမှာ ကူညီမှုပေးဖို့စတာတွေလည်းပါတယ်။ ပင်လုံမှာဖြစ်တဲ့သတင်းတွေကြားကြ ပါတယ်။ လူထုနဲ့လာတွေ့တဲ့ ကိုယ်စားလှယ်တွေကလည်းပြောပြပါတယ်။ ဒါပေမယ့် လာမယ့်လမှာလည်း လင်းခေးမှာ ညီလာခံကြီး ကျင်းပဖို့လည်း စီစဉ်ထားတာတွေလည်းရှိနေတယ်ဆိုတော့ ဒီမှာတော့ စိုးရိမ်လောက်တဲ့အနေအထား မဟုတ်ဘူးလေနော်။ ဒီမှာက တရားဝင်ကျင်းပခွင့်လဲရထားတယ်ဆိုတော့ – ဟု ဆွေးနွေးပွဲတက်ရောက်သည့် နန်းကြာက ပြောသည်။

ဒီဇင်ဘာလ ၁၇ ရက်နေ့ ပင်လုံမြို့တွင်ပြုလုပ်သော လူထုနှင့်တွေ့ဆုံပွဲတွင် အရှေ့အလယ်ပိုင်းတိုင်း စစ်ဌာနချုပ် (ရလခ ) စစ်တိုင်းမှူး (ခိုလမ်) ဗိုလ်ချုပ်သန်းလှိုင်က တပ်အင်အားစေလွတ်ကာ တားဆီး ပိတ်ပင်ခဲ့သည်။

ဒီဇင်ဘာလ ၁၁ ရက်မှ ၁၆ ရက်နေ့အထိ တောင်ကြီးမြို့တွင် ကျင်းပသည့် အလုပ်ရုံဆွေးနွေးပွဲအပြီး လူထုနှင့် တွေ့ဆုံရေး အဖွဲ့ ၅ ဖွဲ့ သည် ဒီဇင်ဘာလ ၂၅ ရက်နေ့တောင်ကြီးတွင်ပြန်လည်တွေ့ဆုံသည်အထိ သျှမ်းပြည်တောင်ပိုင်း နမ့်စန်၊ ပင်လောင်း၊ သျှမ်းပြည်အရှေ့ပိုင်း ကျိုင်းတုံ၊ ကချင်ပြည်နယ် မိုးညှင်း၊ ကယားပြည်နယ်လွယ်ကော်အပြင် ပဲခူးတိုင်းအတွင်းရှိ သျှမ်းများနှင့်တွေ့ဆုံကာဆန္ဒ သဘောထား များကောက်ယူသွားမည်ဖြစ်ကြောင်း သိရသည်။

ရရှိလာသည့် လူထု သဘောထားအား သျှမ်းအမျိုးသားအဆင့် နိုင်ငံရေးဆွေးနွေးပွဲသို့ ဆွေးနွေးကာဘုံသဘောတူညီချက်များအား ၂၁ ရာစုပင်လုံညီလာခံ တတိယ အကြိမ်တွင် သျှမ်းအမျိုးသားများ၏ နိုင်ငံရေးလိုအပ်ချက်အဖြစ် တင်ပြဆွေးနွေးရန်ဖြစ်သည်။